އާލިއާއާއި ރަންބީރު ހަނީމޫނަށްދާ ގައުމު ވެސް ނިންމައިފި
މިހިނގާ އޭޕްރީލް މަހުގެ 17ވަނަ ދުވަހު ބޮލީވުޑް ދެތަރިންކަމަށްވާ އާލިއާ ބަޓްއާއި ރަންބީރް ކަޕޫރުގެ ކައިވެނި ކުރާކަމުގެ ޚަބަރުތަކުން އިންޑިއާގެ ހުރިހާ މީޑިއާތަކެއްގައި ފަލަ ސުރުހީ ދަނީ އަޅަމުންނެވެ. ދެތަރިންގެ އާއިލާއާ އެކު މަދު ރަހުމަތްތެރިންތަކަކަށް ދައުވަތުދީގެން ބާއްވާ މިހަފްލާ އޮންނާނީ މުމްބާއިގައި ހުންނަ "އާރް ކޭ" ހައުސްގައެވެ.
އާލިއާއާއި ރަންބީރުގެ ކައިވެންޏާއި ގުޅިގެން ދެތަރިންކުރެ އެއްވެސް ތަރިއަކު މިހާތަނަށް މީޑިއާގައި ވާހަކަ ދައްކައިފައެއް ނުވެއެވެ. އެހެން ނަމަވެސް ގާތް ބައެއް ފަރާތްތަކުން މިކައިވެނީގެ ވާހަކަ ވަނީ ދައްކައިފައެވެ. އެގޮތުން އާލިއާގެ ބޭބެ ރާހުލް ބަޓް ބުނީ ކައިވެނީގެ ހުރިހާ ތައްޔާރީތަކެއްވެ ނިމިފައިވާކަމަށާއި ދައުވަތު ވެސް މިހާރު ލިބިފައިވާ ކަމަށެވެ. ބޮމްބޭ ޓައިމްސްއަށް ދިން އިންޓަވިއުއެއްގައި ރާހުލް ބުނީ އެ ހަފްލާގައި އޭނާ ނުނަށާނެ ކަމަށެވެ.
އިންޑިއާ ޓުޑޭގައި ބުނެފައިވާގޮތުން އާލިއާއާއި ރަންބީރު ކައިވެންޏަށް ފަހު ހަނީމޫނަށް ދާން ހަމަޖެހިފައި ވަނީ ސައުތު އެފްރިކާއަށެވެ. މިހިނގާ 2022ވަނަ އަހަރުގެ އައު އަހަރާއި ދިމާކޮށް ވެސް މިދެތަރިން ޗުއްޓީ ހޭދަކުރަން ދިޔައީ އެގައުމަށެވެ. ރިޕޯޓުތައް ބުނާގޮތުން އާލިއާއާއި ރަންބީރު ހަނީމޫނަށް ގޮސް ސަފާރީއެއް ކުއްޔަށް ނަގައި ވަގުތު ހޭދަކުރާނެއެވެ.
އެކަމަކު އެހެން ރިޕޯޓެއްގައި ބުނީ އާލިއާ މިހާރު މަސައްކަތް ކުރަމުންދާ "ރޮކީ އޯރް ރާނީ ކީ ޕްރޭމް ކަހާނީ"ގެ ލަވައެއް ޝޫޓުކުރަން މިމަހުގެ ތެރޭގައި އާލިއާ ސްވިޒަލޭންޑަށް ދާން ހަމަޖެހިފައިވާ ކަމަށެވެ. މިދަތުރުގައި ރަންބީރު ވެސް ބައިވެރިވެދާނެކަމަށް ރިޕޯޓުތައް ބުނެއެވެ.
އާލިއާގެ ގާތް ރަހުމަތްތެރިން ބުނި ގޮތުގައި ހަނީމޫނަށް ދާނެ ގައުމެއް މިހާރު ވަނީ މުޅިން ފައިނަލް ކޮށްފައެވެ. އެހެން ނަމަވެސް އެކަން ހާމަކުރާނީ އާލިއާއާއި ރަންބީރުކަމަށްވުމުން އެކަމާ ބެހޭ ގޮތުން މީޑިއާތަކާއި ވާހަކަދައްކަން ބޭނުން ނުވާކަމަށް ބުންޏެވެ.
