ފައްޔާޒަށް ވުރެ ވަކީން ކުޅަދާނަ މީހަކު އެމްޑީޕީ ހިންގާކަށް ނުލިބޭނެ: އައްޑޫ މޭޔަރު
އެމްޑީޕީ ހިންގާލަން އިކޮނޮމިކް މިނިސްޓަރ ފައްޔާޒު އިސްމާޢީލަށް ވުރެ ވަކީން މޮޅު މީހަކު ނުލިބޭނެ ކަމަށް އައްޑޫ ސިޓީގެ މޭޔަރު ޢަލީ ނިޒާރު ވިދާޅުވެއްޖެއެވެ.
އެމްޑީޕީ ޗެއަރޕަރސަންކަމަށް ވާދަކުރައްވާ ފައްޔާޒު އިސްމާޢީލްގެ "ހިންގާލަން"ކެންޕެއިންގެ ޙަފްލާއެއްގައި ވާހަކަދައްކަވަމުން ޢަލީ ނިޒާރު ވިދާޅުވީ ރައްޔިތުންގެ މަޖިލީހުގައި ފައްޔާޒު އިސްމާޢީލްއާ އެކީ މަސައްކަތް ކުރުމުގެ ފުރުސަތު ލިބުނު ކަމަށާއި އޭނާ އަކީ ބުނަން ޖެހޭ ބަސް ކޮންމެ ތަނެއްގައި ވެސް ބުނުމުގެ ޤާބިލްކަން ހުރި އަދި އެ ވާހަކަ ދައްކަމުން ދިޔަ މީހެއް ކަމަށެވެ.
"ޤާބިލްކަން ހުރި މީހެއް ، ތަޢުލީމާއި ކުޅަދާނަކަން ހުރި މީހެއް، ހީވާގިކަން ހުރި މީހެއް ، ޕާޓީ ހިންގުމަކަށް އޭނާއަށް ވުރެ ވަކީން މޮޅު މީހަކު މި ޕާޓީއަށް ލިބިދާނެކަމަކަށް ނުދެކެން" ޢަލީ ނިޒާރު ވިދާޅުވިއެވެ.
އޭނާ ވިދާޅުވީ އިމްތިޔާޒް ފަހުމީއާ އެކީ ވެސް މަސައްކަތް ކުރެއްވި ކަމަށާއި އެހެން ނަމަވެސް ދެ ކެނޑިޑޭޓުންގެ ތެރެއިން ހަމަގައިމު ވެސް ފައްޔާޒު އިސްމާޢީލަކީ ހުރިހައި ގޮތަކަށް ބަލާއިރު ވެސް އެންމެ ކުޅަދާނަ ކެނޑިޑޭޓް ކަމަށެވެ. އެހެންކަމުން އައްޑޫ ސިޓީ ރައްޔިތުންގެ މަޞްލަޙަތު އިސްކުރުމަށާއި ޕާޓީގެ ތެރެއިން ކަންކަން ނިންމުމަށް ވެސް އެންމެ ރަނގަޅު ގޮތަކީ ފައްޔާޒު ހޮއްވެވުންކަން ފާހަގަ ކުރައްވައި ފައްޔާޒަށް ވޯޓް ދެއްވުމަށް އޭނާ އެދިވަޑައިގަތެވެ.
މީގެ އިތުރުން މި ސަރުކާރުން އައްޑޫ ސިޓީގައި ހިންގި ތަރައްޤީގެ ޕްރޮޖެކްޓްތަކުގެ އެންމެ އިސް މޭސްތިރިއަކީ ފައްޔާޒުކަން ފާހަގަ ކުރައްވައި އެ މަސައްކަތުގެ އަދާހަމަތައް އަބަދުވެސް ފައްޔާޒު ހޯއްދަވާކަން ފާހަގަ ކުރައްވަމުން ނިޒާރު ވިދާޅުވީ އައްޑޫގެ ކޮންމެ މަޖިލިސް މެމްބަރަކު ވެސް ޕްރޮޖެކްޓްތަކާ ގުޅިގެން މަޝްވަރާ ހޯއްދަވަނީ ފައްޔާޒު ނުވަތަ ފިނޭންސް މިނިސްޓަރ އަމީރުގެ އަރިއަހުން ކަމަށެވެ.
