އަހަރު ވެސް ނުފުރޭ ދެ ކުޑަކުއްޖަކު ކޮވިޑަށް ފައްސި ވެއްޖެ
އަހަރު ވެސް ނުފުރޭ ދެ ކުޑަކުއްޖަކު ކޮވިޑް-19 އަށް ފައްސި ވެއްޖެއެވެ.
ހެލްތު ޕްރޮޓެކްޝަން އެޖެންސީ (އެޗްޕީއޭ)ގެ ޑޭޝްބޯޑުން ދައްކާ ގޮތުގައި މިދިޔަ ހުކުރު ދުވަހު ފައްސިވެ ވެފައި ވަނީ ނުވަ މަހުގެ ފިރިހެން ކުއްޖަކާއި ހަ މަހުގެ އަންހެން ކުއްޖެއް ކަމަށެވެ.
މީގެ ތެރެއިން ނުވަ މަހުގެ ތުއްތު ކުއްޖާއަކީ "އެޗްޒެޑްއާރު" ކުލަސްޓާއަަށް ނިސްބަތްވާ ކުއްޖެވެ. އަދި ހަ މަހުގެ ތުއްތު ކުއްޖާއަކީ އެއްވެސް ކުލަސްޓާއަކާ ގުޅުމެއް ނެތް، އިންޑިޕެންޑެންޓް ކޭސް އެކެވެ. މި ދެ ކުދިންގެ ވެސް ހާލު ރަނގަޅު ކަމަށް ޑޭޝްބޯޑުން ދައްކައެވެ.
އެޗްޕީއޭގެ ޑޭޝްބޯޑަށް ބަލާއިރު މިހާތަނަށް 10 އަހަރުން ދަށުގެ 189 ކުއްޖަކު ކޮވިޑަށް ފައްސި ވެފައި ވެއެވެ.
މާލެ ސަރަހައްދުގައި އިއުލާންކުރި ލޮކްޑައުނަށް ބޮޑެތި ލުއިތަކެއް ދިން ފަހުން އަނެއްކާވެސް މި ބައްޔަށް ފައްސިވާ މީހުންގެ އަދަދު ވަނީ ބޮޑުތަނުން އިތުރުވާން ފަށާފައެވެ. އެގޮތުން އިއްޔެ އެކަނި ވެސް 156 މީހަކު މި ބައްޔަށް ފައްސިވި ވިއިރު، އޭގެތެރެއިން 134 މީހުންނަކީ ދިވެހިންނެވެ.
އިއްޔެ ފައްސިވި މީހުންނާއެކު ރާއްޖޭގެ އަދަދު ވަނީ 3,949 އަށް އަރާފައެވެ. މީގެތެރެއިން ފަރުވާ ދެމުން އަންނަނީ 1305 މީހުންނަށެވެ. އެގޮތުން 72 މީހަކަށް ފަރުވާ ދެމުން އަންނަނީ ހޮސްޕިޓަލުގައެވެ. އަދި މި ބަލިން ރަނގަޅުވި މީހުންގެ ޖުމްލަ އަދަދު 2،613 އަށް އަރާފައިވާއިރު މި ބަލީގައި 17 މީހަކު ވަނީ މަރުވެފައެވެ.
