އައްމަޓީ ދޫކޮށްލި މައްސަލަ އާދީއްތަ ދުވަހު ސުޕްރީމް ކޯޓުން ނިންމަނީ
ސީލައިފްގެ މެނޭޖިންގް ޑިރެކްޓަރ އަހުމަދު މޫސާ (އައްމަޓީ) ބަންދުން ދޫކޮށްލި މައްސަލަ އަންނަ އާދީއްތަ ދުވަހު ނިންމަން ސުޕްރީމް ކޯޓުން ތާވަލްކޮށްފިއެވެ.
ޚިޔާނާތުގެ ގިނަ ދައުވާތަކެއް އުފުލިފައިވާ އައްމަޓީ ދޫކޮށްލަން ކްރިމިނަލް ކޯޓުން މިދިޔަ މަހު އަމުރު ކުރުމުން، ދައުލަތުން ވަނީ އެ މައްސަލަ ހައިކޯޓުގައި އިސްތިއުނާފުކޮށްފައެވެ. ނަމަވެސް ހައިކޯޓުން ވަނީ އެ މައްސަލަ ބޭރުކޮށްލައިފައެވެ.
ހައި ކޯޓުން އައްމަޓީގެ މައްސަލަ ބޭރުކޮށްލައިފައި ވަނީ، އިސްތިއުނާފް މުއްދަތުގެ ގޮތުގައި އެ ބާވަތުގެ މައްސަލަތަކަށް އޮންނަ 48 ގަޑިއިރުގެ މުއްދަތު ހަމަވެފައިވާތީ ކަމަށް ބުނެއެވެ. ދައުލަތުން ބުނާގޮތުން 48 ގަޑިއިރު ގުނަން ޖެހޭނީ ދަށު ކޯޓުން އެ ނިންމުމެއް ނިންމާ ދުވަސް ނުހިމަނައެވެ. ނަމަވެސް ހައި ކޯޓުން ނިންމީ ދަށު ކޯޓުގެ ނިންމުން ނިންމާ މިނެޓުން ފެށިގެން މުއްދަތު ހިނގަން ފަށާނެ ކަމަށެވެ.
ހައި ކޯޓުން އެ މައްސަލަ ބޭރުކޮށްލުމުން ދައުލަތުން ވަނީ އެ މައްސަލަ ސުޕްރީމް ކޯޓުގައި އިސްތިއުނާފު ކޮށްފައެވެ. މައްސަލައިގެ އިސްތިއުނާފު އަޑުއެހުންތައް ނިންމައިލުމަށް ފަހު އަންނަ އާދީއްތަ ދުވަހު ހެނދުނު މި މައްސަލައާ މެދު ގޮތެއް ނިންމުމުގެ އަޑުއެހުމެއް ބޭއްވުމަށް ވަނީ ތާވަލު ކޮށްފައެވެ.
