ޕްރިންސިޕަލަށް ޖިންސީ ފުރައްސާރައިގެ ތުހުމަތު ކުރި ޓީޗަރުން ބަދަލުކުރީ ބަދަލު ހިފަންކަމަށް ނިންމައިފި
އިއްޒުއްދީން ސްކޫލުގެ ކުރީގެ ޕްރިންސިޕަލް އިސްމާއިލް ނަސީރާ ދެކޮޅަށް އެ ސްކޫލުގެ ހަތަރު ޓީޗަރަކު ބަޔާންދީފައި ވަނިކޮށް އެ ޓީޗަރުންތައް ކުއްލި ގޮތަކަށް އެހެން ސްކޫލަކަށް ބަދަލުކުރީ "ބަދަލު ހިފަން" ކަމަށް އެޗްއާރުސީއެމްގެ ވިސްލްބްލޯވާ ޕްރޮޓެކްޝަން ޔުނިޓުން ނިންމައިފިއެވެ.
މަޢުލޫމާތު ގޮތުގައި އެ ހަތަރު ޓީޗަރުން އިއްޒުއްދީން ސްކޫލްގެ ކުރީގެ ޕްރިންސިޕަލާ ދެކޮޅަށް މިދިޔަ އަހަރު ބަޔާން ދިނީ ޖިންސީ ފުރައްސާރަކުރަމުންދާކަމަށް ތުހުމަތުކޮށެވެ. އަދި މި މައްސަލައިގެ ބަޔާން ނަގައި ކަން ހިނގި ގޮތް ބަލަމުން ދަނިކޮށް އެޑިއުކޭޝަން މިނިސްޓްރީން ނިންމީ އެ ހަތަރު ޓީޗަރުން އެހެން ސްކޫލަކަށް ބަދަލުކުރުމަށެވެ.
މިނިސްޓްރީގެ އެ އަމަލު ކުށްވެރިކޮށް އެއީ ބޭއިންސާފެއް ކަމަށް އޭރު ޓީޗަރުން ބުނުމުން، އެޑިއުކޭޝަނުން ނެރުނު ކުރު ބަޔާނެއްގައި ބުނެފައި ވަނީ ޓީޗަރުން އެހެން ސްކޫލްތަކަށް ބަދަލުކުރުމުގައި ހުށަހެޅި ޖިންސީގޯނާގެ މައްސަލައާ ގުޅުމެއް ނެތް ކަމަށެވެ. އެހެންކަމުން އެކަމުގެ ހިތްހަމަނުޖެހުމުގައި ހަތަރު ޓީޗަރުން ވެސް އިސްތިއުފާ ދިނެވެ.
މި މައްސަލަ އެ ހަތަރު ޓީޗަރުންގެ ފަރާތުން ހިއުމަން ރައިޓްސް ކޮމިޝަންގެ ވިސްލްބްލޯވާ ޔުނިޓަށް ހުށަހެޅުމުން މައްސަލަ ނިމުނީ ޓީޗަރުންނާ އެއްކޮޅަށެވެ.
Ads by STO
