ސީރިއަސް ހާލުގައި އޮތް ޔާސިރު ޔަހްޔާ ނިޔާވެއްޖެ!
އައިޖީއެމްއެޗުގައި ސީރިއަސް ހާލުގައި އޮތް ޔަމަނުގެ ޔާސިރު ޔަހްޔާ ސޯލިޙު ނިޔާވެއްޖެއެވެ.
ޓެރަރިޒަމާ ގުޅުން ހުރި ތުހުމަތުތަކެއްގައި ރާއްޖޭގައި ހައްޔަރުކޮށްފައި ހުރި ޔާސިރު ޔަހްޔާގެ ހާލު ދެރަވުމާއި ގުޅިގެން، އޭނާއަށް އައިޖީއެމްއެޗުން ދިޔައީ ފަރުވާ ދެމުންނެވެ.
ޔާސިރު ނިޔާވީ މީގެ ކުޑައިރުކޮޅެއް ކުރިން ކަމަށް އޭނާގެ ވަކީލުން ވަނީ ވިދާޅުވެފައެވެ.
އޭނާގެ ހާލު ސީރިއަސް ކަމަށް މިދިޔަ ހަފްތާތެރޭގައި ކޮމިޝަނާ އޮފް ޕްރިޒަންސް އަހުމަދު މުހައްމަދު ފުޅު ވަނީ ވިދާޅުވެފައެވެ.
ޔާސިރު ޔަހްޔާގެ ވަކީލުންގެ ޓީމުން ބުނިގޮތުގައި އޭނާއަށް އައިޖީއެމްއެޗުގައި ފަރުވާދެމުން ދިޔައީ ހާޓް އެޓޭކެއް ޖެހިގެންނެވެ.
ބަލިހާލަތު ދަށްވުމުގެ ސަބަބުން ޔާސިރު ޔަހްޔާގެ ވަކީލުން ވަނީ އޭނާ ގޭބަންދަށް ބަދަލު ކޮށްދިނުމަށް އެދި ވަގުތީ އަމުރަކަށް ސިވިލް ކޯޓުގައި މިދިޔަ މަހު އެދިފައެވެ. ނަމަވެސް ސިވިލް ކޯޓުން ވަނީ ޝަރީއަތުގެ ޤަވާއިދުތަކަށް ބިނާކޮށް އެއަމުރު ނެރެދިނުމަށް އިންކާރު ކޮށްފައެވެ.
2016 ވަނަ އަހަރު ޢަރަބި ޓީޗަރެއްގެ ގޮތުގައި ރާއްޖެ ގެނައި ޔާސިރު ޔަހުޔާއަކީ ޓެރަރިޒްޓެއްގެ ގޮތުގައި ބޭރުގެ މީޑިއާތަކުން ފާހަގަކުރުމާއި، ޓެރަރިޒަމާއި ގުޅުންހުރި ބެކްގްރައުންޑެއްވެސް އޭނާގެ އޮންނަކަން ކަމަށްބުނެ ކޯޓް ޢަމުރެއްގެ ދަށުން އޭނާ ހައްޔަރުކޮށްފައިވަނީ 2017 ވަނަ އަހަރުގެ މާރިޗް މަހުގެ 3 ވަނަ ދުވަހުއެވެ.
ޔާސިރު ޔަހުޔާއަކީ ޓެރަރިޒަމާއި ގުޅުންހުރި މީހެއްކަމަށް ހޯމް މިނިސްޓަރ އިމްރާން ޢަބްދުﷲ ވެސް ވަނީ ވިދާޅުވެފައެވެ. އަދި ރާއްޖެ ދޫކޮށް ދިއުމަށް އޭނާއަށް އެތައް ފަހަރެއްގެ މަތިން އަންގާފައިވާކަމަށާއި، ނަމަވެސް އޭނާ އެކަމަށް އިންކާރުކޮށް ޕާސްޕޯޓް ގެއްލިފައިވާކަމަށް ބުނަމުން އަންނަކަމަށް ވެސް މިނިސްޓަރ އިމްރާން ވިދާޅުވިއެވެ.
ދިވެއްސަކާއި ކައިވެނިކޮށްގެން ރާއްޖޭގައި އުޅުނު ޔާސިރު ނިޔާވިއިރު، އޭނާ ހައްޔަރު ކޮށްފައި ހުންނަތާ ތިން އަހަރަށްވުރެ ގިނަދުވަސް ވެފައިވެއެވެ.
މާތް ﷲ މަރްޙޫމްގެ ފާފަތައް ފުއްސަވާ ދެއްވާ ފުރާނައަށް ހެޔޮ ރަޙްމަތްލައްވާ ސުވަރުގޭގެ ދާއިމީ ނިޢުމަތް ދެއްވާށި އާމީން. އަދި މިފަދަ ހިތްދަތި ވަގުތެއްގައި އާއިލާއަށް ކެތްތެރިކަން ދެއްވާށި އާމީން.
إِنَّا لِلّهِ وَإِنَّـا إِلَيْهِرَاجِعُون
