އަޒްލިފާ ކިޔައިދިނީ "ހެޔޮ އެދިގެން"ފެލައިލާ ގޮތްތަކާއި އެކަމުން ދުރުވާންވީ މަގުތައް!

(ޓްރިވެންޑްރަމް، އިންޑިއާ) 12 އަހަރުގެ ދަރިފުޅު ގޮވައިގެން ތ. ގާދިއްފުށީ، އަޒްލިފާ އިބްރާހީމް މީގެ އަހަރެއްހައި ދުވަސްކުރީން ޓްރިވެންޑްރަމްއަށް އައީ ދެމައިންގެ ބޭސްފަރުވާއަކަށެވެ. އަޒްލިފާގެ ބޮލުގެ އެއްފަޅީގައި ރިއްސުމާއި ދަރިފުޅުގެ ގިނަ ކަންތައްތަކަށް ޑޮކްޓަރަށް ދައްކައި ޝިފާއެއް ހޯދުމަށެވެ. ނަމަވެސް އޭނާ މިހާރު އެ އިނީ މިރަށަށް ފައިބައެވެ. ކުރަންޖެހޭ ބޭސްފަރުވާއާއި ދަރިފުޅުގެ ތަޢުލީމަށް ވިސްނާއިރު ވެރިރަށް މާލޭގައި 20،30ހާހުން ނޫޅެވޭ ދިރިއުޅުން މި ރަށުގައި 10 ވަރަކަށް ހާސް ރުފިޔާއިން އުޅެލެވެއެވެ. އެހެންކަމުން ކައިރި މުސްތަގުބަލެއްގައި ރާއްޖެ އައުމުގެ ވިސްނުމެއް ނެތެވެ.

Ads by Sosun Fihaara

އަޒްލިފާގެ ދިރިއުޅުން މިހާރު އޮތީ މި ރަށުގައެވެ. މި ރަށަށް ފޭބީ އިރު ދިވެހީން އެންމެ ގިނައިން އުޅޭ ސަރަޙައްދުގައި އުޅުނު ނަމަވެސް މިހައިރު އޭނާ އުޅެނީ ދިވެހީންނާ މާދުރު ސަރަޙައްދެއްގައެވެ. ދިވެހީންނަށް "ހެޔޮ އެދިގެން "ދިވެހީން ފެލާ މީހުންގެ ތުރާލުން ސަލާމަތްވެގެންނެވެ.

އަހަރެއް ދުވަހުގެ ތަޖުރިބާ ހިއްސާކުރަން އަޒްލިފާ އިނީ ކެތްމަދުވެފައެވެ. އޭނާއަށް ހެދުނު "މިސްޓޭކްތައް" އެހެން ދިވެއްސަކު ތަކުރާރުކުރާކަށް އަޒްލިފާ ބޭނުމެއް ނުވެއެވެ. އެހެންވީމާ "ފައްސިޔަ" ޓީމުން މި މަސައްކަތް ކުރަނީ އަޒްލިފާގެ މިސްޓޭކްތަކާއި އެކަންކަމާ ދުރުހެލިވެ މި ރަށުގައި އުޅެވޭނެ ގޮތްތައް މި ރަށަށް އަންނަ މީހުންނާއި ފައިބައި ތިބޭ މީހުންނަށް ކިޔައިދެވޭތޯއެވެ. އަޒްލިފާގެ ތަޖުރިބާއިންނެވެ.

ދިވެހިންނަށް ޚާއްސަ އަގުތަކެއް

ޓްރިވެންޑްރަމަކީ ދިވެހިންގެ ސަހަރެކޭ ވެސް ބުނެއުޅެއެވެ. ބޭސްފަރުވާގެ ކަންކަމަށް ދިވެހީން ޓްރިވެންޑްރަމްއަށް ގޮސް އާންމުކޮށް ތިބެނީ ވަކި ސަރަަހައްދެއްގައެވެ. ސަބަބަކީ، އެ މާދުރަށް ދަތުރުނުކޮށް ހުރިހާ ޚިދުމަތްތައް ލިބޭ ސަރަހައްދެއްގެ ފަސޭހަކަމެވެ. މި ސަރަހައްދުގައި ދިވެއްސަކަށް އުޅެލުމަކީ އެއްވެސް ގޮތަކަށް އުނދަގޫކަމެއް ނޫނެވެ. ސަބަބަކީ މިތަނުގައި ދިވެހި ދަންނަ އިންޑިއާ އެތައް މީހުންނެއް އުޅޭތީއެވެ. ފިހާރައަކަށް ވަދެ ވިޔަސް ނުވަތަ އޮޓޯއަކަށް އެރިޔަސް ބައްދަލުވާނީ ދިވެހި ދަންނަ އިންޑިއާގެ ރައްޔިތުންނާއެވެ. މައްސަލަ ޖެހޭ ހިސާބަކީ މިއީއެވެ. މި ސަރަައްދުގެ ބައެއް މީހުން ދިވެހިންނަށް މާ ފަރިތައީއެވެ. އެހެންކަމުން ދިވެހީންނަށް އެ މީހުން ޚާއްޞަކަމެއް ދިނީއެވެ. މުދަލާއި ޚިދުމަތުގައި "ޚާއްޞަ އަގުތަކެއް"ވެސް ކަނޑައެޅީއެވެ.

"ދިވެއްސެއް ވެއްޖިއްޔާ މީޓަރެއް ނުޖައްސާ، ހުރިހައި ގޮތަކުން ބެލިޔަސް ދިވެހިންނަށް ކާބޯއެއްޗެހި ވެސް އަގު ބޮޑުކޮށް ވިއްކަނީ" އަޒްލިފާގެ ކަންބޮޑުވުން ހިއްސާ ކުރަމުން ކިޔައިދިނެވެ.

ރަނގަޅު ވާހަކައެކެވެ. ބައެއް ފަހަރު އޮޓޯ ދުއްވާ ފަރާތްތަކުން މީޓަރު ނުޖައްސައި ބޭނުން އަގެއް ކިޔައެވެ. މިހެންކަމުން އިންޑިއާގައި މަގުމަތިން ހޯދައިގެން އޮޓޯއަކަށް އަރާ ނަމަ މީޓަރު ޖެއްސިތޯ ބަލަންވާނެއެވެ. މީޓަރު ޖެއްސުމަކީ އިންޑިއާގެ ޤާނޫނުގައި ލާޒިމް ކަމެކެވެ. ދަތުރުގެ ކުލީގެ ގޮތުގައި ދޭން ޖެހޭނީ ޓެކްސީ މީޓަރަށް އެރި ވަރެވެ. ދެވަނަ އަދި އެންމެ ރައްކާތެރި ގޮތަކީ، އޫބާއިން ޓެކްސީ ނެގުމެވެ. ރާއްޖޭގައި އަމިއްލަ ޓެކްސީ އެޕްތައް ހުންނަ ގޮތަށް، އެ ޤައުމުގައި ވެސް އޫބާ ފަދަ އެޕްލިކޭޝަންތައް ބޭނުން ކުރެއެވެ. ތާކަށް ދާން ބޭނުން ނަމަ މިފަދަ ގޮތަކަށް ޓެކްސީ ނެގުން ބުއްދިވެރިއެވެ. އޭރުން ދަތުރު ފެށުމުގެ ކުރިން ދަތުރަށް އަރާވަރު އެނގޭނެއެވެ.

އަޒްލިފާ ފާހަގަ ކުރި ދެވަނަ ކަމަކީ ދިވެހިންނަށް ބޮޑު އަގުގައި އެއްޗެހި ވިއްކުމެވެ. އިންޑިއާއަކީ ބާގެއިން ކުރުމުގެ ރިކޯޑް އޮންނަ ޤައުމެކެވެ. 1000 ރުޕީސްއަށް ދޭން ބުނާ އެއްޗެއް ވާހަކަ ދައްކައިގެން 500 ރުޕީސްއަށް ކުޑަކޮށްލުމަކީ މާ އުދަނގޫކަމެއް ނޫނެވެ. އިންޕޯޓް ކުރާ މުދަލާއި އުފައްދާ މުދަލުގައި ވެސް އޭގެ އަގު ޖަހާފައި ހުންނާނެއެވެ. އެއަށް ވުރެ ބޮޑު އަގުގައި ތަކެތި ވިއްކުމަކީ ކުށެކެވެ. މިހެންކަމުން، ބާޒާރު ކުރަންދާއިރު މި ކަމާ މެދު ވިސްނައިލުން ބުއްދިވެރިއެވެ.

ދިވެހިން އުޅޭ ސަރަހައްދާ ދުރު މާ ރަނގަޅު

އިންޑިއާއަށް ދިރިއުޅުން ބަދަލުކޮށް އަޒްލިފާ ފުރަތަމަ ދިރިއުޅެމުން ދިޔައީ ދިވެހިން އާއްމުކޮށް އުޅެމުން އަންނަ ސަރަހައްދުގައެވެ. މެޑިކަލް ކޮލެޖް ހިސާބުގައެވެ. ނަމަވެސް ލިބެމުންދިޔަ ލަނޑުތަކާ އެކު، މީގެ ހަތަރު މަސް ކުރިން އަޒްލިފާ މުހިންމު ނިންމުމެއް ނިންމިއެވެ. އެއީ ޓްރިވެންޑްރަމްގެ އެހެން ސަރަހައްދަކަށް ދިރިއުޅުން ބަދަލު ކުރުމެވެ. މިހާރު އަޒްލިފާ ދިރިއުޅެމުން އަންނަނީ، ދިވެހިން އުޅެމުންދާ ހިސާބާ ދުރު ހިސާބެއްގައެވެ.

މި ހަތަރު މަސް ތެރޭގައި ދިރިއުޅުމަށް އައި ބަދަލު ވަރަށް ބޮޑަށް އެނގުނު ކަމަށް އޭނާ ކިޔައިދިނެވެ. ގެ ކުލިންނާއި އާއްމު ދިރިއުޅުމަށްދާ ޚަރަދުތަކުން ވެސް އެކަން ފާހަގަކުރެވުނެވެ.

"މި ހިސާބަކީ މުސްލިމުން ވަރަށް ގިނަ ހިސާބެއް، މި ހިސާބުން ބޮޑެތި ގޭގެ ވެސް ކުއްޔަށް ދެނީ ވަރަށް ކުޑަކޮށް، ދިވެހިން އުޅޭ ހިސާބުތަކުގައި ވަރަށް އަގު ބޮޑު" އަޒްލިފާ ކިޔައިދިނެއެވެ.

އަޒްލިފާ ބުނި ގޮތުގައި އިންޑިއާއަކީ ވަރަށް އަގު ހެޔޮ ތަނެކެވެ. ގިނަ ފަހަރަށް ލަނޑު ލިބެނީ މީހެއް މެދުވެރިކޮށް ކަންކަން ކުރަން އުޅުމުން ކަމަށް އޭނާ ފާހަގަކުރިއެވެ.

"އިންޑިއާ މީހަކު ނަގައިގެން، މިތަނުގެ މީހަކު ތްރޫކޮށް ކަމެއް ކުރަންޏާ ގެއްލުން ދައްކާ، ޚަރަދު ވެސް ވަރަށް ބޮޑުވޭ" އަޒްލިފާ ބުނި ގޮތުގައި، ބޭސްފަރުވާގެ ކަންކަމުގައި އެހީތެރިންގެ ގޮތުގައި އުޅޭ ބައެއް މީހުން ވެސް ބޮޑެތި އަގުތައް ނަގާ ކަމަށެވެ.

އާއްމުކޮށް ގިނަ ދިވެހިން އިންޑިއާއަށް ބޭސްފަރުވާގެ ކަންކަމުގައި ދަނީ އެޖެންޓެއް ނަގައިގެންނެވެ. މިގޮތަށް ނަގާ އެޖެންޓުން ބައެއް ފަހަރު މަކަރު ހަދައެވެ. މިގޮތަށް އެޖެންޓެއް ނަގާ ނަމަ، މީގެ ކުރިން ދިވެހިން ގޮވައިގެން އުޅޭ، ތަޖުރިބާ ހުރި މީހެއް ނެގުން ބުއްދިވެރިއެވެ. ތެދަށް ދަންނަވާ ނަމަ ޓްރާންސްލޭޓަރެއްގެ ބޭނުން ދިވެހިންނަކަށް ނުޖެހޭނެއެވެ. އެއަށް ވުރެ ދިވެހިން ކަންކަން ކުރަން މާ ފަރިތައެވެ. ހޮސްޕިޓަލުތަކުގައި ތިބޭ ޑޮކްޓަރުންނާ އިނގެރޭސިން ވާހަކަ ދައްކާއިރު ދިވެހީން އެ ބަހަށް ވެސް މާފަރިތައެވެ.

އަޒްލިފާ މިހާރު އެ އިނީ ދިވެހީން އާންމުކޮށް އުޅޭ ސަރަހައްދާ ދުރު ހިސާބެއްގައެވެ. މީހުންގެ ތައްޕާހުން އުޅެން ހަދައިގެން ބޮޑުވި ދިރިއުޅުމުގެ ޚަރަދު ކުޑަކޮށް ، މުސްލިމު ކޮމިޔުނިޓީއެއްގެ ތެރޭގައެވެ. އޭނާގެ މިވަގުތުގެ ވިސްނުމަކީ ދެމައިންނަށް ބޭސްފަރުވާ ކުރުމާ އެކު ދަރިފުޅަށް މި ރަށުން ރަނގަޅު ތަޢުލީމެއް ދިނުމެވެ. ގޭގެ ކުއްޔަށް ދައްކަން ޖެހޭ 4،500 ރުފިޔާއާ އެކު މަހަކު 13،000 ރުފިޔާއިން ހަމަޖެހިލައިގެން އަޒްލިފާގެ ޢާއިލާއަށް ދިރިއުޅެލެވޭތީ އޭނާގެ ހިތް މިހާރު އޮތީ އެ ރަށުގައެވެ. އޭނާގެ ނަޞޭޙަތަކީ "ފެލައިލުމެއްގެ"ތެރެއަށް ހުށަހެޅި ނުގަތުމެވެ.