ސަލަފުގެ ރައްދެއް މަހްލޫފަށް: ލޯ އަނދިރީ ކޮންފަރާތެއްތޯ ބެލުމަށް، ޢިލްމުވެރިން ކުރާ މަސައްކަތް ދިރާސާކޮށްލާ!

ވަކި ބަޔަކު ވެރިކަމުގައި ތިބޭއިރު ޖަމްއިއްޔަތުއްސަލަފުގެ ބޭފުޅުންނަށް ބައެއް މަންޒަރުތައް ނުފެންނަކަމަށް ދޭހަވާ މޭރުމަކުން މިނިސްޓަރ އޮފް ޔޫތު ސްޕޯޓްސް އެންޑް ކޮމިއުނިޓީ އެމްޕަވަމެންޓް އަހްމަދު މަހްލޫފު، ޖަމީޢަތުލް ސަލަފަށް ފާޑުވިދާޅުވުމުން، އެ ޖަމިއްޔާއިން ރައްދުދީފިއެވެ.
ޔޫތު މިނިސްޓްރީއާއި އިންޑިއަން ކަލްޗަރަލް ސެންޓަރާއި ރާއްޖޭގައި ހުންނަ އިންޑިއާ ހައި ކޮމިޝަން ގުޅިގެން މިއަދު ހެނދުނު ގަލޮޅު ދަނޑުގައި ކުރިއަށް ގެންދަން އުޅުނު ޔޯގާގެ ހަރަކާތް ކުރިއަށް ދަނިކޮށް ބަޔަކު މީހުން ވަނީ އެތަނަށް ވަދެ ހަމަނުޖެހުން ހިންގައި އެހަރަކާތް ހުއްޓުވައިފައެވެ. އަދި އެހަމަނުޖެހުން ހިންގި ފަރާތްތައް ވަރަށް އަވަހަށް ޤާނޫނުގެ ކުރިމައްޗަށް ގެންނާނެ ކަމަށާއި އެ މައްސަލަ ސީރިއަސް މައްސަލައެއްގެ ގޮތުގައި ފުލުހުން ބަލަމުން ދާނެ ކަމަށް ފުލުހުން ވިދާޅުވިއެވެ.
މިކަމާ ގުޅިގެން ޔޫތު މިނިސްޓަރު މަހްލޫފް މިއަދު ވިދާޅުވީ ވަކި ބަޔަކު ވެރިކަމުގައި ތިބޭއިރު ޖަމިއްޔަތުއްސަލަފުގެ ބޭފުޅުންނަށް ބައެއް މަންޒަރުތައް ނުފެންނަ ކަމަށާއި މީގެ ކުރީގެ ސަރުކާރުތަކުން ވެސް ޔޯގާ ޑޭ ފާހަގަކޮށްފައިވާ ކަމަށެވެ. އަދި ދީނީ މީހުން ދީނީ ކަންކަމުގައި އުޅުއްވައިފައި ސިޔާސީ މީހުންނަށް ސިޔާސީ ކަންކަން ދޫކޮށްލީމާ ރަނގަޅުވާނެ ކަމަށް ވެސް މިނިސްޓަރ މަޙްލޫފް ވިދާޅުވިއެވެ.
މިނިސްޓަރުގެ އެ ވާހަކަތަކަށް ރައްދު ދެމުން ސަލަފްގެ ރައީސް ޢަބްދުﷲ ބިން ޖަނާބް މިއަދު ކުރެއްވި ޓްވީޓެއްގައި ވިދާޅުވީ ލޯ އަނދިރީ ކޮންފަރާތެއްތޯ ނިންމެވުމަށް، ރާއްޖޭގެ ޢިލްމުވެރިން ކުރައްވައިފައިވާ މަސައްކަތްތަކުގެ ދިރާސާއެއް ހެއްދެވުން ރަނގަޅުވާނެ ކަމަށާއި ގަދަހުން ޖެހިފައިވާ ބަލިމީހާއަށް ވަރަށް ގިނަ ފަހަރު އަނގަ ހިތިވެ، މީރު އެއްޗެހީގެ ރަހަ ގެއްލި، މީރު ނުވާތަން ވެސް އަންނާނެ ކަމަށެވެ.




-1.webp)


ކޮމެންޓް
މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.