ޕިކްނިކް އައިލެންޑް ފެހިކުރުމަށް ސްޓެލްކޯއިން ކުޑަގިރީގައި ގަސް އިންދައިފި

ބުދަ ދުވަހު ކުރިއަށް ދިޔަ މި ޕްރޮގްރާމުގައި ސްޓެލްކޯގެ 80އަށް ވުރެ ގިނަ މުވައްޒަފުން ވަނީ ކުޑަގިރީގައި ގަސް އިންދައިފައެވެ.

އެ ރަށުގައި ސްޓެލްކޯއިން އިންދައިފައި ވަނީ، ފަސޭހައިން އަތިރިމަތީގައި ހެދޭ ގަސްތަކެވެ. ގިނައިން އިންދައިފައި ވަނީ މަގޫ ގަހާއި ކުރެދިގަހާއި ރުކެވެ. ކުޑަގިރި ހުޅުވައި އެ ރަށަށް މީހުން ޒިޔާރަތްކުރަން ފެށުމުން އެ ފަރާތްތަކަށް ވަރަށް ބޭނުންތެރި ކަމަކަށް މި ޕްރޮޖެކްޓް ވާނެކަމަށް ސްޓެލްކޯއިން ބުނެއެވެ.

ކުޑަގިރީގެ އިތުރުން ވެސް ރާއްޖޭގައި ސްޓެލްކޯއިން ޚިދުމަތް ދޭ ރަށްތައް ފެހި ކުރުމަށް އެ ކުންފުނިން މަސައްކަތް ކުރެއެވެ. އެގޮތުން، ކޮންމެ އަހަރަކު ވެސް ގަސްއިންދުމުގެ ޕްރޮގްރާމްތައް އެ ކުންފުނީގެ އެކި އޮފީސްތަކުގައި ކުރިއަށްދެއެވެ.

ކުޑަގިރިއަކީ ތިލަފުށީ ކައިރީގައި އޮންނަ ފަޅެކެވެ. އެ ފަޅު އޮންނަނީ ދޯނީގައި 30ވަރަކަށް މިނެޓުން އަދި ލޯންޗުގައި ދިިހަ ވަރަކަށް މިނެޓުން ދެވޭ ހިސާބުގައެވެ.