ގޮޓަބަޔާ ރާއްޖެ ފުރުވާލީ އޮންނަ އުސޫލުގެ ތެރެއިން ޤާނޫނާ އެއްގޮތަށް: ލަންކާގެ އެއާފޯސް
މިލިޓަރީ ފްލައިޓެއްގައި ރޭ މެންދަމުގެ ވަގުތެއްގައި ރާއްޖެ ވަޑައިގަތް ލަންކާގެ ރައީސް ގޮޓަބަޔާ ރާޖަޕަކްސަ، ރާއްޖެ ވަޑައިގެންފައިވަނީ އޮންނަ އުސޫލުގެ ތެރެއިން ކަމަށާއި އެކަމުގައި ޤާނޫނާ ޚިލާފު އެއްވެސް ކަމެއް ނުހިނގާ ކަމަށް ލަންކާގެ އެއާފޯސް އިން ވިދާޅުވެއްޖެއެވެ.
އަސްކަރީ އުޅަނދެއްގައި ގޮޓަބަޔާ ރާއްޖެއަށް ފުރުވާލުމާ ގުޅިގެން ލަންކާގެ ގިނަ ބަޔަކު ދަނީ ނުރުހުންފާޅު ކުރަމުންނެވެ. މި ދަނޑިވަޅުގައި ލަންކާގެ އެއާފޯސް އިން ނެރުނު ބަޔާނެއްގައި ވިދާޅުވެފައިވަނީ، ރައީސް ފުރުވާލާފައިވަނީ އޮންނަ އުސޫލުގެ ތެރެއިން ޑިފެންސް މިނިސްޓްރީގެ ހުއްދައާވެސް އެކުގައި ކަމަށެވެ.
"އެކަން ކުރީ، އިމިގްރޭޝަނާއި ކަސްޓަމްސް އަދި ކަމާ ގުޅުން ހުރި ހުރިހާ އިދާރާއެއްގެ ހުއްދަ ލިބިގެން" ރައީސް ގޮޓަބަޔާ ފުރުވާލަން އެހީވި ކަމަށް އެއްބަސްވުމުން ނެރުނު ބަޔާނެއްގައި އެއާފޯސްއިން ވިދާޅުވިއެވެ.
ރޭ ވެލާނާ އިންޓަރނޭޝަނަލް އެއާޕޯޓްގައި ގޮޓަބަޔާ ޖައްސާފައިވަނީ މެންދަމު 3 ޖަހާކަންހާއިރުއެވެ. އޭނާ ރާއްޖެ އައިސްފައިވަނީ އަނބިކަބަލުން އަދި އިތުރު ދެ ބޮޑީގާޑުންނާއިއެކުގައެވެ.
