މާރިޔާގެ ހެދުމުގެ އެޑިޓްކޮށްފައިވާ ފޮޓޯއެއް ޓްވީޓް ކުރުމުން ނަރީޝް ހޫނު ފެނަށް

ޑިފެންސް މިނިސްޓަރ މާރިޔާ އަޙްމަދު ދީނީ، މިނިވަން ދުވަހުގެ ތުރުކުރެއްވީ އިންޑިއާގެ ދިދަ ރަމްޒުކޮށްދޭ ހެދުމެއް ކަމަށް ބުނެ އެޑިޓްކޮށްފައިވާ ފޮޓޯއެއް ޓްވީޓް ކުރުމުން މާލެ ސިޓީ ކައުންސިލްގެ ޑެޕިއުޓީ މޭޔަރު ހޫނު ފެނަށް ވެއްޓިއްޖެއެވެ.

Ads by MWSC

މިނސްޓަރު މާރިޔާ ތުރުކުރައްވައިގެން ހުންނެވި ދިގު ހެދުމެއްގެ އެޑިޓްކޮށްފައިވާ ފޮޓޯއެއް ޓްވިޓަރގައި ހިއްސާ ކުރައްވަމުން ނަރީޝް ވިދާޅުވީ، ދިވެހި ރާއްޖޭގެ މިނިވަން ދުވަހު މިނިސްޓަރު މާރިޔާ ދީދީ އިންޑިއާގެ ޤައުމީ ދިދަ ރަމްޒުކޮށްދޭ ހެދުމެއް ތުރުކުރައްވައިގެން ވަޑައިގަތީ ދިވެހި ރައްޔިތުންނަށް ޖެއްސުމަށް ކަމަށެވެ.

ނަރީޝް ހިއްސާ ކުރެއްވި ފޮޓޯއަކީ އެޑިޓެއް ކަމަށް މީހުން ބުނަން ފެށުމުން، އަސްލު ފޮޓޯ ހިއްސާ ކުރަމުން ނަރީޝް ވިދާޅުވީ ދެ ފޮޓޯއިން ވެސް ރަމްޒުކޮށްދެނީ އިންޑިއާގެ ދިދަ ކަމަށެވެ.

ނަރީޝްގެ މި ޓްވީޓްތަކާއެކު އޭނާއަށް ބައެއް ފަރާތްތަކުން އަންނަނީ ފާޑު ކިޔަމުންނެވެ. އަދި މިފަދަ ކަންކަމަކީ ފިތުނަ އުފެއްދުން ކަމަށް ޓްވިޓަރގައި ޚިޔާލުފާޅު ކުރި ފަރާތްތަކުން ބުނެއެވެ.

މި ސަރުކާރު އައިފަހުން އިންޑިއާއެކު ވަރަށް ބޮޑަށް ގުޅުންވަނި ބަދަހިކޮށްފައެވެ. ސަރުކާރާ އިންޑިއާއެކު ހަދާފައިވާ އަސްކަރީ އެއްބަސްވުންތަކަށް އިދިކޮޅުން ވަރަށް ބޮޑަށް ފާޑު ކިޔައެވެ. ޑިފެންސްގައި ހުންނަވާ އިންޑިއާއެކު، އިންޑިއާއަށް ފައިދާވާނެހެން އެއްބަސްވުންތަކެއް ހަދާފައިވާ ކަމަށް އިދިކޮޅުން ތުހުމަތު ކުރެއެވެ. އިންޑިއާ މިލިޓަަރީ ރާއްޖޭގައި ތިބުމާ ދެކޮޅަށް ކަމަށްބުނެ "އިންޑިއާ އައުޓް" ކެންޕެއިނެއް އިދިކޮޅުން އަންނަނީ ހިންގަމުންނެވެ.