ރާއްޖެއިން މީހަކު މަކުނު ވިދުރިއަށް ޝައްކު ކުރެވިގެން ޓެސްޓް ކުރަނީ
ދުނިޔޭގައި ހަލުވި ކަމާއެކު މިހާރު ފެތުރެމުން އަންނަ މަކުނު ވިދުރި (މަންކީޕޮކް) އަށް ރާއްޖެއިން މީހަކު ޝައްކު ކުރެވިގެން އެ މީހާ ޓެސްޓް ކުރުމުގެ މަސައްކަތް ފަށައިފިއެވެ.
"ދެން" އަށް މައުލޫމާތު ލިބިފައިވާ ގޮތުގައި ބަލި ޖެހިފައިވާ ކަމަށް ޝައްކު ކުރެވިފައިވަނީ ބޭރު މީހެކެވެ. ނަމަވެސް މިމީހާ ގުޅޭ އިތުރު ތަފްސީލެއް ނުލިބެއެވެ.
އެ މީހާ މިވަގުތު ހުރީ ޓްރީޓޮޕް ހޮސްޕިޓަލުގައި ކަރަންޓީންކޮށްފައި ކަމަށް މައުލޫމާތު ލިބެއެވެ.
ދުނިޔޭގައި މަންކީޕޮކްސް ހަލުވި ކަމާއެކު ފެތުރޭތީ ދުނިޔޭގެ ސިއްހަތާ ބެހޭ ޖަމިއްޔާއިން ވަނީ ކުއްލި ނުރައްކަލުގެ ހާލަތު އިއުލާންކޮށްފައެވެ. މިހާތަނަށް މިބަލި 75 ޤައުމަކުން ފެނިފައިވާއިރު، 16,000 މީހަކަށް ބަލިޖެހިފައިވެއެވެ. މި ބަލީގައި މިހާތަނަށް މަރުވެފައިވަނީ 5 މީހެކެވެ.
މި ބަލި ވަނީ އަވައްޓެރި އިންޑިއާއިން ވެސް ފެނިފައެވެ. އިންޑިއާއިން މި ބަލިޖެހިފައިވަނީ 4 މީހުންނަށެވެ. ބަލި ޖެހުނު މީހުންގެ ތެރެއިން ދެ މީހުންނަކީ ޤައުމުން ބޭރަށް ދަތުރު ނުކުރާ ދެ މީހުންނެވެ. ދެން ތިބި ދެ މީހުންނަކީ މެދުއިރުމަތިން އެ ޤައުމަށް އައި ދެ މީހުންނެވެ.
