ޢަލީ ޞާލިޙަށް ހަމަލާދިނީ ސަލްމާނު މިސްކިތުގައި ހަމަނުޖެހުން ހިންގި މީހާ

ޖުމްހޫރީ ޕާޓީގެ ތަރުޖަމާނު އަދި އެންވަޔަރަމަންޓް މިނިސްޓްރީގެ ސްޓޭޓް މިނިސްޓަރު ޢަލީ ޞާލިޙަށް ތޫނު އެއްޗަކުން ހަމަލާދިން މައްސަލައިގައި ހައްޔަރުކުރީ މީގެ ދުވަސްކޮޅެއް ކުރިން ކިންގް ސަލްމާނު މިސްކިތުގައި ހަމަނުޖެހުން ހިންގި މީހާކަން ކަށަވަރުވެއްޖެއެވެ.
މިއަދު މެންދުރުފަހު 13:30 ހާއިރު ހުޅުމާލޭގައި ހުންނަ ސޮނީ ހާޑްވެއާ ފިހާރަ ކައިރިން ސައިކަލުގައި ދަނިކޮށް ޢަލީ ޞާލިޙަށް ހަމަލާދިނީ ކަޓަރަކުންނެވެ.
ސައިކަލެއްގައި އައި އެ މީހާ އުޅުނީ ޢަލީ ޞާލިޙްގެ ކަރަށް ހަމަލާދޭށެވެ. ނަމަވެސް އެ ވަގުތު އަތް ނެގުމުން ކަޓަރު އެޅިފައިވަނީ ޢަލީ ޞާލިޙްގެ އަތުގައެވެ. ލިބުނު ޒަޚަމްތަކަށް އޭނާ ވަނީ ހުޅުމާލޭ ހޮސްޕިޓަލުގައި ފަރުވާ ހޯއްދަވައިފައެވެ.
މި މައްސަލައިގައި ދިވެހި ފިރިހެނަކު ހައްޔަރުކޮށްފައިވާ ކަމަށާއި މައްސަލަ ތަޙްޤީޤުކުރަމުން އަންނަ ކަމަށް ފުލުހުން ބުންޏެވެ.
އެނގިފައިވާ ގޮތުގައި ހައްޔަރުކުރީ ޢުމުރުން 43 އަަހަރުގެ މީހެކެވެ. އޭނާއަކީ މިދިޔަ ޖުލައި 01 ވަނަ ދުވަހު ހުކުރު ނަމާދު ވަގުތު ސަލްމާން މިސްކިތުގެ މިންބަރަށް އަރައި އަޑުގަދަކުރި މީހެކެވެ. އެ ގޮތުން އެ ދުވަހު އޭނާ ހައްޔަރުކުރިއެވެ. ހައްޔަރުކުރިތާ މާގިނައިރެއް ނުވަނީސް, އޭނާގެ ޢާއިލާއާއި އޭނާ ހަވާލުކުރިއެވެ. އެއީ ނަފްސާނީ ބަލި ހުންނަ މީހެއްކަމަށް ބުނެފައެވެ.






ކޮމެންޓް
މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.