އޮމަދޫ ސްކޫލު ތަރައްޤީކުރުމަށް ޖަޕާނުން 80,000 ޑޮލަރުގެ އެހީއެއް ދީފި

އދ.އޮމަދޫ ސްކޫލު ތަރައްޤީކުރުމުގެ މަޝްރޫޢުއަށް ޖަޕާނު ސަރުކާރުން 80,000 އަށްވުރެ ގިނަ ޑޮލަރުގެ ހިލޭ އެހީއެއް ދީފިއެވެ.

Ads by Sosun Fihaara

އޮމަދޫ ސްކޫލު ތަރައްޤީކުރުމުގެ މަޝްރޫޢުއަށް ޖަޕާނުން ދިނީ 80,731 ޑޮލަރުގެ ހިލޭ އެހީއެކެވެ.

މި އެހީ ދިނުމުގެ އެއްބަސްވުމުގައި ޖަޕާނު ސަރުކާރުން މިއަދު ވަނީ އޮމަދޫ ސްކޫލާއެކު އެއްބަސްވުމުގައި ސޮއިކޮށްފައެވެ.

ޖަޕާނު ސަރުކާރުގެ ފަރާތުން އެއްބަސްވުމުގައި ސޮއިކުރެއްވީ އެ ޤައުމުން ރާއްޖެއަށް ކަނޑައަޅުއްވާފައި ހުންނަވާ ސަފީރު ތަކެއުޗި މިދޮރި އެވެ. އޮމަދޫ ސްކޫލުގެ ފަރާތުން ސޮއިކުރެއްވީ އެ ސްކޫލުގެ ޕްރިންސިޕަލް ޙަސަން އާމިރެވެ.

ރާއްޖެއާއި ޖަޕާނާއި ދެ ޤައުމުގެ ދެމެދު ސިޔާސީ ގުޅުން ޤާއިމުކުރިތާ 55 އަހަރު ފުރިފައިވާއިރު, ޖަޕާނަކީ އެކި ދާއިރާތަކުން ރާއްޖެއަށް ބޮޑެތި އެހީތަކެއްވާ ޤައުމެއްކަން ފާހަގަކޮށްލެވެއެވެ.