އަފްޣާނިސްތާނުގައި ދިން ބޮމުގެ ހަމަލާއެއްގައި 15 މީހުން މަރުވެއްޖެ
އަފްޣާނިސްތާނުގެ އުތުރުގައި އޮންނަ ސަމަންގަން ޕްރޮވިންސްގެ ވެރިރަށް އައިބަކްގައި ދިން ބޮމުގެ ހަމަލާއެއްގައި 15 މީހުން މަރުވެެއްޖެއެވެ.
އަލްޖަޒީރާ ނޫހުން ރިޕޯޓް ކޮށްފައިވާ ގޮތުގައި މި ހަމަލާ ދީފައިވަނީ ދީނީ ތަޢުލީމު އުނގަންނައިދޭ މަދަރުސާއެއްގައެވެ. ހަމަލާގައި މަރުވި މީހުންގެ ތެރޭގައި ގިނަ އަދަދެއްގެ ދަރިވަރުންވެސް ހިމެނެއެވެ.
ރިޕޯޓްތައް ބުނާ ގޮތުގައި، މި ހަމަލާގައި އިތުރު 20 މީހަކަށް އެކި ވަރުގެ ޒަހަމްތައްވެސް ލިބިފައިވެއެވެ.
މި ހަަމަލާގެ ޒިންމާ އަދި އެއްވެސް ފަރާތަކުން ނަގާފައި ނުވާއިރު، މިކަން އަންނަނީ ތަޙުޤީޤު ކުރަމުންނެވެ.
އަފްޣާނިސްތާނުގެ ފެޑެރަލް އިންޓީރިއާ މިނިސްޓްރީގެ ތަރުޖަމާނު އަބްދުލް ނާފީ ޓަކޯރު ވަނީ ބޮން ގޮއްވައިލިކަން ކަށަވަރުކޮށްދެއްވައިފައެވެ.
"އަޅުގަނޑުމެންގެ ޑިޓެކްޓިވް އާއި ސަލާމަތީ ބާރުތަކުން މަސައްކަތް ކުރަމުން ދަނީ މާފު ނުކުރެވޭ ވަރުގެ މި ޖަރީމާ ހިންގި ފަރާތްތައް ދެނެގަނެ އިންސާފުގެ ކުރިމައްޗަށް ގެނައުމަށް،" ޓަކޯރު ވިދާޅުވިއެވެ.
އަފްޣާނިސްތާނުގެ ވެރިރަށް ކާބުލްގެ އުތުރުން ގާތްގަނޑަކަށް 200 ކިލޯމީޓަރު (124 މޭލު) ދުރުގައި އޮންނަ އައިބަކްގެ ޑޮކްޓަރަކު ވިދާޅުވީ މަރުވި މީހުންގެ ތެރޭގައި ގިނައީ ޒުވާނުން ކަމަށެވެ.
