ޕްރައިމަރީ ގަޑުބަޑުކުރަން ފުރުސަތެއް ނޯންނާނެ، އެފަދަ ވާހަކަ ދައްކާތީ ކަންބޮޑުވޭ: ރައީސް ޞާލިޙްގެ ޓީމް
މާދަމާ ބޭއްވުމަށް ހަމަޖެހިފައިވާ އެމްޑީޕީގެ ރިޔާސީ ޕްރައިމަރީ އޮޅުވާލަން މަސައްކަތް ކުރަމުންދާ ކަމަށް ބުނެ އެ އިންތިހާބުގައި ވާދަކުރައްވާ އެޕާޓީގެ ރައީސް އަދި ކުރީގެ ރައީސް މުހައްމަދު ނަޝީދުގެ ކެމްޕޭން ޓީމުން ދެއްކި ވާހަކަތަކާއި ގުޅިގެން އިންތިހާބުގައި ވާދަކުރައްވާ ރައީސް އިބްރާހިމް މުހައްމަދު ޞާލިޙް ޓީމުން މިރޭ ކަންބޮޑުވުންފާޅު ކުރައްވައިފިއެވެ.
އެ ޕާޓީން މިރޭ ނެރުނު ބަޔާނެއްގައި ވިދާޅުވީ، މާދަމާ ބާއްވާ އެމްޑީޕީގެ ވާދަވެރި ރިޔާސީ ޕްރައިމަރީއަކީ އެ ޕާޓީގެ އެންމެހައި ހަމަތަކާއި އުސޫލުތައް ނަގަހައްޓާ ފުރިހަމަ ޑިމޮކްރެޓިކް އިންތިހާބަކަށް ހެދުމަށް، އެ ޕްރައިމަރީގައި ވާދަކުރައްވާ ކެންޑިޑޭޓް ރައީސް އިބްރާހިމް މުހައްމަދު ޞާލިޙް އިރުޝާދު ދެއްވާފައިވާ ކަމަށެވެ.
މިއަދު ހަވީރު ބޭއްވި މީޑިއާ ބްރީފިންއެއްގައި، ނަޝީދުގެ ކެމްޕެއިން އެޖެންޓް، ހެންވޭރު ހުޅަނގު ދާއިރާގެ މެމްބަރު ހަސަން ލަތީފު ވިދާޅުވީ، އިންތިހާބުގެ ނަތީޖާ އޮޅުވާލުމަށް ރައީސް ޞާލިޙްގެ ޓީމުން އެކި ގޮތްގޮތުން މަސައްކަތް ކުރަމުން އަންނަ ކަމަށެވެ.
އެކަމާ ގުޅިގެން ރައީސްގެ ކެމްޕެއިން ޓީމުން ނެރުނު ބަޔާނެއްގައި ބުނީ މިނިވަން ޑިމޮކްރެޓިކް ދެފުށްފެންނަ އިންތިހާބީ އުސޫލުތައް ތައާރަފް ކުރީ އެމްޑީޕީން ކަމަށްވާއިރު އެ ޕާޓީގެ އެތެރޭގެ އިންތިހާބެއް ގަޑުބަޑު ކުރުމަކީ އޮތް ފުރުސަތެއް ނޫންކަން އެނގިތިބެ ވާދަވެރި ކެންޑިޑޭޓުގެ ފަރާތުން އެއްވެސް އަސާސެއް ނެތި އެފަދަ ތުހުމަތާ އިލްޒާމު އެޅުވުމަކީ ހިތާމަހުރި ކަމެއް ކަމަށެވެ.
