އިންޑިއާ އައުޓް ކެންޕެއިންގައި އިސްކޮށް ހަރަކާތްތެރިވާ ސަމަދުބެ އިންޑިއާއިން ޑީޕޯޓްކޮށްލައިފި

އިންޑިއާގެ ބެންގަލޫރަށް ގޮސް ހުއްޓާ، ޕީޕީއެމް ހުޅުމާލެ ދާއިރާގެ ރައީސް އަބްދުއް ސަމަދު (ސަމަދުބެ) ޑީޕޯޓްކޮށްލައިފިއެވެ.
މައުލޫމާތު ލިބިފައިވާ ގޮތުގައި ސަމަދުބެ އިންޑިއާއަށް ގޮސްފައިވަނީ ބޭސްފަރުވާއަށް އާއިލާއެކުގައެވެ. ސަމަދުބެގެ އާއިލާއަށް އިންޑިއާގައި ބޭސްފަރުވާގެ ހުއްދަދިން ނަމަވެސް ސަމަދުބެ މިއަދު ޑީޕޯޓްކޮށްލަން ނިންމާފައިވާކަން ވަނީ އިނގިފަައެވެ. ސަމަދުގެ ހައްޔަރުކޮށްގެން ގެންގޮސްފައިވަނީ އިންޑިއާގެ މަނިޕާލް ހޮސްޕިޓަލުގައި ހުއްޓާ ކަމަށް ޕީޕީއެމްގެ އޮފިޝަލުންނާ ހަވާލާދީ ނޫސްތަކުން ރިޕޯޓްކުރެއެވެ،
ސަމަދުބެއަކީ އިދިކޮޅުން ހިންގަމުން އަންނަ އިންޑިއާ އައުޓް ކެންޕެއިންގައި އިސްކޮށް ހަރަކާތްތެރިވަމުން އަންނަ ފަރާތެކެވެ. އެގޮތުން އިންޑިއާގެ ހައި ކޮމިޝަނަރު އުޅުއްވާ ގެކޮޅު ކައިރީ ކުރި ބައެއް މުޒާހަރާތަކުގައި ވެސް ސަމަދުބެ އިސް ސަފުގައި ހަރަކާތްތެރިވެފައިވެއެވެ. ބައެއް މުޒާހަރާތަކުން ސަމަދުބެ ފުލުހުންގެ ހައްޔަރަށް ވެސް ގެންދެއެވެ.
އިންޑިއާއާ ދެކޮޅަށް އަޑު އުފުލާ ސިޔާސ ފަރާތްތައް އެ ޤައުމުން މީގެ ކުރިން ވެސް ޑީޕޯޓްކުރެއެވެ. މިގޮތަށް ސިޔާސީ ވާހަކަ ދައްކާ ފަރާތްތައް ޤައުމަށް ނާރުވާ އަނބުރާ ފޮނުވާލާ ނަމަވެސް، އެ ފަރާތްތަކުގެ އާއިލާއަށް ބޭސްފަރުވާއަށް ހުރަހެއް ނާޅައެވެ. އިންޑިއާއަކީ ގިނަ އަދަދެއްގެ ދިވެހިން ބޭސް ފަރުވާއަށް ދަތުރު ކުރަމުން އަންނަ ޤައުމެކެވެ.
އިންޑިއާ އައުޓް ކެންޕެއިން ފުރަތަމަ ފަށާފައިވަނީ އިންޑިއާގެ ސިފައިން ރާއްޖެއިން ބޭލުމަށް ކަމަށް ބުނެއެވެ. ނަމަވެސް ހަރަކާތް ފުޅާވެގެން ގޮސް، އިންޑިއާއަށް މީހުން ނުދިއުމަށް ގޮވާލުމާއި، ރާއްޖޭގައި އުޅޭ އިންޑިއާ ޓީޗަރުންނާއި މުދައްރިސުންނަށް ވެސް ފުރައްސާރަވަނީ ކުރިމަތިވެފައެވެ.
އިދިކޮޅުން އިންޑިއާއާ ދެކޮޅަށް ހިންގަމުން އަންނަ އިންޑިއާ އައުޓް ކެންޕެއިން ހަރަކާތަކީ ޤައުމީ ސަލާމަތަށް ނުރައްކާވާ ކަމެއް ކަމަށް ބުނެ ސަރުކާރުން އެ ކެންޕެއިން ވަނީ ހުއްޓުވާފައެވެ. އެއާއެކު، އިދިކޮޅުގެ ކެންޕެއިން މިހާރު ވަނީ ވަރަށް ބޮޑަށް މަޑު ޖެހިފައެވެ.







ކޮމެންޓް
މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.