ރައީސް އިބްރާހީމް މުޙައްމަދު ޞާލިޙް ، އިންސާފުގެ ހިނގާލުމުގައި
ފޮޓޯއިން ތިޔަ ފެނި ވަޑައިގަންނަވަނީ މޯލްޑިވިއަން ޑިމޮކްރެޓިކް ޕާޓީގެ ޕާލަމެންޓްރީ ގުރޫޕްގެ ލީޑަރ އިބްރާހީމް މުޙައްމަދު ޞާލިޙް އިންސާފަށް ހިންގަވާލައްވާ މަންޒަރެވެ. މިނިވަން ނޫހުގެ ޖަރނަލިސްޓުން ކަމަށްވާ އަޙްމަދު ރިޟްވާން ވީނުވީއެއް ނޭނގި ،ގެއްލުނުތާ ހަތަރު އަހަރު އަދި ޔާމީން ރަޝީދު މަރާލިތާ ދެއަހަރު ވެގެން ދިޔައިރު ވެސް އެމީހުންނަށް އިންސާފު ލިބިފައި ނުވާތީ އެމީހުންގެ އާއިލާއާއެކު އެމްޑީޕީން ބޭއްވި ހިނގާލުމުގައި އިސްކޮށް އެ ހުންނެވި އިބްރާހީމް މުޙައްމަދު ޞާލިޙެވެ.
އެމްޑީޕީގެ ލީޑަރު ރައީސް ނަޝީދަށް 2018 ގެ ރިޔާސީ އިންތިޚާބަށް ކުރިމަތި ލެވޭ ގޮތް ނުވުމާއެކު ، އުކުޅަސް ބަޣާވާތުން ހޯއްދެވި ޓިކެޓާއެކު ، ރައްޔިތުން ދެއްވި ވަރުގަދަ އިތުބާރުގެ ނަތީޖާއަކީ މިއަދު އިބްރާހީމް މުޙައްމަދު ޞާލިޙަކީ ރާއްޖޭގެ ވަލިއްޔުލް އަމްރެވެ. ދައުލަތުގެ މަސްލަހަތުތައް ބަލަހައްޓަވާ އެންމެ އިސް ވެރިޔާއެވެ.
އަމިއްލައަށް ޖަވާބު ހޯދާލަން އުނދަގޫ ނޫން ނަމަވެސް މިއީ ހަމަ އުފެދޭ ސުވާލެކެވެ. އިންސާފު ލިބި ހަމަވީތޯއެވެ؟
ރައީސް ޔާމީންގެ ވެރިކަމުގައި ޖަލުގައާއި އެހެނިހެން ގޮތް ގޮތުން މަރުވެ ދިޔަ މީހުންނާއި ވީނުވީއެއް ނޭނގި ގެއްލުނު މީހުންގެ ވާހަކައަކީ ވަރަށް ގިނަ ބަޔަކަށް ނުތަނަވަސްކަން ގެނުވި ވާހަކައެކެވެ. ރިޝްވާންގެ މަރަކީ ސީދާ ރައީސް ޔާމީން ޒިންމާ ނަންގަވަން ޖެހޭ ކަމެއް ކަމަށް މޭޑޭގައި މިހާރުގެ ހޯމް މިނިސްޓަރ ޝައިޚް އިމްރާން ވިދާޅުވި ވާހަކައަކީ ގިނަބައެއްގެ ލޭކެކުނު ވާހަކައެކެވެ. ހަމަ އެމޭރުމުން ރިޝްވާންގެ މަރާއި ގުޅިގެން އެތައް ބަޔަކު މަރާލެވިފައިވާ ކަމަށް 2018ގެ ރިޔާސީ އިންތިޚާބުގެ ކެމްޕެއިންގައި ޝައިޚް އިލްޔާސް ޙުސައިން ވިދާޅުވެ ނުސީދާކޮށް ނަމަވެސް އެހުރިހާ ކަމެއް ރައީސް ޔާމީނަށް ނުވަތަ އެމަނިކުފާނުގެ ސަރުކާރުގެ ބޮލަށް ޖެހިއެވެ.
ދުވަސް ބަދަލު ވެއްޖެއެވެ. މިއަދު ވެރިކަމުގައި ހުންނެވީ އިންސާފަށް ހިނގާލަށް ނިކުމެ ކުރިން އެ ހުންނެވި އިބްރާހީމް މުޙައްމަދު ޞާލިޙެވެ. އެމަނިކުފާނުގެ ޚާއްޞަ އަދި އެންމެ ބޮޑު އެއް ވަޢުދު ކަމުގައިވި ގެއްލުވާލެވިފައިވާ މީހުންނާއި މަރާލެވިފައިވާ މީހުންނަށް އިންސާފު ހޯދައިދޭން ރިޔާސީ ކޮމިޝަނެއް އުފެއްދެވިއެވެ. ރައީސް ޞާލިޙު އެދިވަޑައިގެންނެވި ގޮތަށް ރައްޔިތުންގެ މަޖިލީހުން ފުރިހަމަ އާރާއިބާރު އެ ކޮމިޝަނަށް ދެއްވިއެވެ. ނަމަވެސް އެ ކޮމިޝަނުން ބެލުނު މައްސަލައެއް ، ނިމުނު ކަމެއް ނެތެވެ. ނޫސްވެރިޔާ ޔާމީން ރަޝީދާއި ގުޅޭ ރިޕޯޓެއް ނެރުއްވުން ނޫން ކަމެއް އެ ކޮމިޝަނަށް ވީކަމަކަށް ނުވެއެވެ. އެ ރިޕޯޓްގައި ރައީސް ޔާމީނާއި ، އެ ނޫސްވެރިޔާގެ މަރާއި އެއްވެސް ވަރަކަށް ގުޅުމެއް ނެތްކަމަށް ކޮމިޝަންގެ ރައީސް ޙުސްނުއްސުޢޫދު ޔަގީންކަން ދެއްވުމާއި ގުޅިގެން އިތުރު މައްސަލައެއް ބެލުމުގެ މުހިންމުކަން ކުޑަވީވެސް ތޯއްޗެކެވެ.
މިއަދު ރިޝްވާނާއި ޔާމީންގެ އާއިލާގެ ކުރިމަތީގައި އިބްރާހީމް މުޙައްމަދު ޞާލިޙް ހުއްޓެން ނުޖެހޭނެކަން ޔަގީނެވެ. އެހެނީ ރައީސުލް ޖުމްހޫރިއްޔާގެ މަޤާމުގައި ހުރުމާއެކު ކުރިން އެޢާއިލާތަކާއެކު ނެންގެވި ފޮޓޯތަކަކީ މިއަދު މާ މުހިންމު ފޮޓޯތަކެއް ނޫނެވެ. އަދި އެމީހުންގެ ޢާއިލާގެ ބޭފުޅަކާއި ދިމާވިޔަސް ވެސް ދެއްވޭނެ ޖަވާބު އެމަނިކުފާނުގެ އެބަހުއްޓެވެ. ފުލެޓް ކޮމިޓީގެ މަސައްކަތް ހުއްޓިފައި އޮތީ ވެސް އެ ކޮމިޓީގެ މެމްބަރަކު ކޮވިޑަށް ފައްސި ވެގެން ކަމަށްވީތީ ، އެންމެ މީހަކަށް ދިމާވާ ކަމަކުން ދައުލަތުގެ ބޮޑެތި ކަންކަން ހުއްޓެމުންދާ އިރެއްގައި ރިޔާސީ ކޮމިޝަންގެ މަސައްކަތް ހުއްޓިފައިވާތީ ދޭނެ މާ ބައިވަރު ޖަވާބު ހުންނާނެ ނޫންތޯއެވެ. ޔާމީންގެ މި މަންމަގެ ހިތާމައަށް ތަސައްލީ ދޭނެ ކަމަށް އިބްރާހީމް ސޯލިޙް ވީ ވައުދަށް ޓަކައި އެ މަންމަ ރަށް ރަށަށް ގޮސް އިބްރާހީމް ސޯލިހަށް ވޯޓް ދިނުމަށް ކުރި މަސައްކަތް އެ ބުނެދެނީ އަސަރާ އެކުގައެވެ. ނަމަވެސް އެއީ މިއަދު އަސަރު ކުރާ އަސަރެއް ނޫނެވެ. ރިޝްވާންގެ އާއިލާއިން ހާމަ ކުރި ގޮތަށް ރިޟްވާނާއި ޔާމީންގެ ނަން ބޭނުން ކޮށްގެން ވެރިކަމަށް ވަޑައިގެންނެވި އިބްރާހީމް ސޯލިޙްގެ އިންސާފުގެ ވަޢުދުގައި އިންސާފު ހޯދައި ނުދެވުމަށްވުރެ ބޮޑު ބޭ އިންސާފެއް ދެން އޮންނާނެ ހެއްޔެވެ؟
އެމްޑީޕީއައް ފޮޓޯދެއްކިދާނެ އަމަލީ ގޮތުން އެއްކަމެއް ނުކުރެވޭނެ؛ ރައްޔިތުންގެ ލޮލުގަކެހި ވެރިއަދުން އަޅުވަނީ؛ މިއަދު އެމްޑީޕީގެ ރައީސް އެއިނީ ކޯޓުގަފޫހަރައިގެން މީހުންލައްވާ އެއްޗެހިކިޔަން ނޫޅެ އަނިޔާވެރިން އިސްތިއުފާ