ބަރަކާތްތެރި ރަމަޟާން މަހުގައި އިސްރާއީލުން ފަލަސްތީނުގެ ރައްޔިތުންނަށް ކުރަމުންދާ އަނިޔާގެ ކުޑަމިންވަރެއް!
ގުނަމުން މިދާ ބަރަކާތްތެރި ރަމަޟާން މަހުގައި ހައްދުފަހަނައަޅާފައިވާ އިސްރާއިލުން ފަލަސްތީނުގެ ނިކަމެތި ރައްޔިތުންނާއި ދެކޮޅަށް ލާއިންސާނީ އެތައް ޖަރީމާތަކެއް ހިނގަމުން އެބަ ގެންދެއެވެ.
ފަލަސްތީނުގެ ހަބަރުތައް ގެނެސްދޭ ޓައިމްސް އޮފް ޣައްޒާގައި ބުނެފައިވާގޮތުން އިސްރާއީލް ސިފައިން ގެންދަނީ ފަލަސްތީނުގެ ނަބްލުސްގެ ގޭގެއަށް ވަދެގަނެ ޒުވާނުންނާއި އަންހެނުންނަށް އަނިޔާކޮށް ހައްޔަރުކުރަމުންނެވެ. މީގެ އިތުރުން ފަލަސްތީނުގެ އާއްމު ރައްޔިތުންގެ މުދަލަށް ގެއްލުން ދެމުންނެވެ.
އަދި ހަމައެހެންމެ ފަލަސްތީނުގެ ސުކޫލު ދަރިވަރުންނަށް ބިރުދައްކައި އެކުދިންނާއި އެކުދިންގެ ދަބަސްތައް ޗެކްކުރުމާއި އެކިއެކި ތުހުމަތުތައްކޮށް ފަލަސްތީނުގެ ޒުވާނުންނަށް އަނިޔާކުރާނެ އެކި ބަހަނާތައް އިސްރާއީލު ސިފައިން ގެންދަނީ ދައްކަމުންކަމަށް އެނޫހުން ވަނީ ބުނެފައެވެ.
ދައުރުވަމުން އަންނަ ވީޑިއޯތަކުން ފެންނަގޮތުގައި އެކި ސަބަބުތަކާއި ބަހަނާތައް ދައްކައިގެން އިސްރާއީލުން ގެންދަނީ ރޯދަމަހު ފަލަސްތީނުގެ ރައްޔިތުންނަށް ޖެއްސުންކޮށް ފުރައްސާރަކުރަމުންނެވެ. މިގޮތުން ފަލަސްތީނުގެ އެކިއެކި ސިޓީތައް އަވަސްއަވަހަށް "ރެއިޑް" ކުރަމުންދާކަން ފާހަގަކޮށްލެވެއެވެ.
