ހައްޖު ގުރޫޕުތަކުން ނަގަން ބުނި އަދަދަށް ވުރެ ބޮޑެތި އަދަދުތަކުން ފައިސާ ނަގަމުން އަންނަކަމުގެ ޝަކުވާތަކެއް!

1444 ވަނަ އަހަރު މީހުން ހައްޖަށް ގެންދިޔުމުގެ ހުއްދަ އިސްލާމިކް މިނިސްޓްރީން ދީފައިވާ ގުރޫޕުތަކުން ހައްޖަށް ދާ މީހުންގެ އަތުން ބޮޑެތި އަދަދުތަކުން ފައިސާ ނަގަމުން އަންނަ ކަމުގެ ޝަކުވާތަކެއް ކުރަން ފަށައިފިއެވެ.

Ads by MWSC

މިއަހަރު ހައްޖަށް މީހުން ގެންދިޔުމަށް އިސްލާމިކް މިނިސްޓްރީން ހުއްދަ ދީފައިވަނީ 3 ކުންފުންޏަކަށެވެ. އެއީ

• އަލްޙަރަމައިން ޙައްޖު އެންޑް ޢުމްރާ ކޮމްޕެނީ މޯލްޑިވްސް ޕްރައިވެޓް ލިމިޓެޑު - 75،250 ރުފިޔާ
• ސިސިލްފަރު ޙައްޖު އެންޑް ޢުމްރާ ޕްރައިވެޓް ލިމިޓެޑު - 75،465 ރުފިޔާ
• އަލްމަނާސިކް ޕްރައިވެޓް ލިމިޓެޑު - 75،000 ރުފިޔާ

މިއިން ކޮންމެ ކުންފުންޏަކަށް 90 ހައްޖު ކޯޓާ ވަނީ ދީފައެވެ.

އެހެންނަމަވެސް މިގުރޫޕްތަކުން ހައްޖަށް ދާމީހުން އަތުން އިތުރަށް ފައިސާ ނަގަމުން އަންނަކަމުގެ ޝަކުވާތައް ލިިބެމުން އަންނަކަމަށް ބައެއް ދީނީ އިލްމުވެރިން ވަނީ ބުނެފައެވެ. މިގޮތުން ޝެއިހް އަލީ ޒައިދު ކުރެއްވި ޓްވީޓެއްގައި ވިދާޅުވީ ވަކި އަދަދަކަށް ހައްޖަށް ގެންގޮސްދޭނެކަމަށް ބުނެ ބިޑް ކާމިޔާބުކުރުމަށްފަހު "މޭޒުދަށުން" ބައެއް ގުރޫޕުތަކުން އެއްލައްކަ ފަންސާސްހާސް ރުފިޔާ ނަގާ ވާހަކަ އަޑުއަހާފައިވާކަމަށެވެ.

ޝެއިހް ޒައިދުގެ ޓްވީޓަށް ރިޕްލައިކުރެއްވި ބައެއް ފަރާތްތަކުން ވަނީ އިސްލާމިކް މިނިސްޓްރީއަށްވެސް ފާޑުކިޔައިފައެވެ. އެގޮތުން މިއަހަރު ޖާގަ ލިބޭނެކަމަށް ބުނެފައި އިން ނަމަވެސް ޖާގަ ނުލިބި ޖާގަ ފުލްވީ ކަމަށް ފަހުން އިސްލާމިކް މިނިސްޓްރީން ބުނެފައިވާކަމަށް ބުނެ މީހަކުވަނީ ޝަކުވާކޮށްފައެވެ.

"500 ވަނައިގައި ބައްޕައިނީ ލިބުނީ 1000 ކޯޓާ. މިފަހަރު ދެވޭގޮތެއް ނުވި. މިދިޔަ އަހަރު ހައްޖު ކޯޕަރޭޝަނުން ބުނެފައިވަނީ މިއަހަރު ދެވޭނޭ. ޖާގަ ހުސްވެއްޖެ" އެމީހާ ބުނެފައިވެއެވެ.

ބައެއް ފަރާތްތަކުން ބުނާގޮތުގައި އަގު ބޮޑު ވިޔަސް އިތުރުފައިސާ ދޭން ޖެހުނުކަމުގައިވިޔަސް ހައްޖަށް ދެވޭނަމަ ދާން ބޭނުންވެއެވެ. އެހެންކަމުން އެގޮތްވެސް "އޯކޭވެ" ފައިސާ ދައްކާފައިވާކަށް ޝޯޝަލް މީޑިޔާގައި ހިޔާލު ފާޅުކޮށްފައިވާ މީހަކު ބުނެފައިވެއެވެ.

ދީނީ އިލްމުވެރިޔާ ޑރ. މުހައްމަދު އިޔާޒުވެސް ވަނީ މިކަމާއި މެދު ހިތްހަމަނުޖެހުންފާޅުކޮށްފައެވެ. މިގޮތުން އޭނާ ވިދާޅުވީ މިމައްސަލާގައި އިސްލާމިކް މިނިސްޓްރީގެ އިހުމާލު ވަރަށް ބޮޑުކަން ހިތާމައާއި އެކު ފާހަގަ ކުރަންޖެހޭ ކަމަށެވެ.

"ޕްރޮޕޯސަލްގައި ޖަހާފައިހުރި ޚިދުމަތްތައް އެއަގަށް ނުދެވޭނެކަން ޔަޤީންވާޙާލު، އެފަދަ ކުންފުނިތަކަށް ހުއްދަދޭތީ މައްސަލަ އަކީ. ބުނާކަހަލަ "ޕްރޮޕޯސަލް ކާމިޔާބު ކުރުމަށް ކުޑައަގެއް ޖަހާށޭ.ފަހުން ބޮޑު އަގު ނެގިދާނެޔޭ." މިއީ ވަރަށް ހިތާހުރި މައްސަލައެއް. މަކަރާއި ޙީލަތް ނުހަދާ ތެދުވެރިކަމާއި އެކު އުޅެން މަގުދައްކަންތިބި ފަރާތްތަކުން ވައްކަން ކުރުވަނީ" ޑރ. އިޔާޒް ވިދާޅުވިއެވެ.

އިސްލާމިކް މިނިސްޓްރީން ކޮށްފައިވާ އިއުލާނެއްގައި ބުނީ ހުއްދަ ދީފައިވާ އަގަށްވުރެ އިތުރަށް ކުންފުނިތަކުން ފައިސާ ނެގުމާއި، ކުންފުނިތަކަށް ފައިސާ ދެއްކުމާއި، ހުއްދަ ދީފައިވާ ކޯޓާއަށްވުރެ އިތުރަށް މީހުން ޙައްޖަށް ގެންދިޔުމަށް އެއްވެސް ފަރާތަކުން ފައިސާ ނެގުމަކީ ދިވެހިރާއްޖެއިން ޙައްޖަށް މީހުން ގެންދިއުމާބެހޭ އުސޫލުގެ ދަށުން މަނާކަމެއް ކަމަށެވެ.