މެލޭޝިޔާގައި ބާއްވާ ޤުރުއާން މުބާރާތެއްގައި ރާއްޖެ ތަމްސީލްކުރާނެ ބައިވެރިން ހޯދަނީ!
މެލޭޝިއާ ސަރުކާރުން އިންތިޒާމްކުރައްވައިގެން 2023 އޮގަސްޓް މަހުގެ 6 އިން 12 އަށް ކުއާލަލަންޕޫރުގައި ބޭއްވުމަށް ހަމަޖެހިފައިވާ 63 ވަނަ "އިންޓަރނޭޝަނަލް އަލް-ޤުރްއާން ރިސައިޓަލް އެންޑް މެމޮރައިޒިން އެސެމްބްލީ 2023" ޤުރްއާން މުބާރާތުގައި ދިވެހިރާއްޖެ ތަމްސީލުކޮށްދޭނެ ބައިވެރިން ހޯދުމަށް އިޢުލާނުކޮށްފިއެވެ.
ކީރިތި ޤުރުއާނާ ބޭހޭ މަރުކަޒުން ކުރެއްވި އިޢުލާނެއްގައި ވިދާޅުވީ، މި ޤުރްއާން މުބާރާތުގައި ދިވެހިރާއްޖެއިން، އަންހެން އަދި ފިރިހެން ބައިވެރިޔަކު، ބައިވެރި ކުރުމުގެ ފުރުޞަތު ވަނީ ލިބިފައިކަމަށާއި މި މުބާރާތަށް ހޮވާނީ ބަލައިގެން ކިޔެވުމުގެބަޔާއި ނުބަލާ ކިޔެވުމުގެ ބައިން، ކޮންމެ ބަޔަކުން 1 ބައިވެރިއެއް ކަމަށެވެ. އަދި މި މުބާރާތަށް ބައިވެރިން ހޮވުމުގައި ޤައުމީ މުބާރާތަކުން 1 ވަނަ ލިބިފައިވާ ފަރާތްތަކަށް އިސްކަން ދެވޭނެކަމަށްވެސް މި އިޢުލާނުގައި ވެއެވެ.
މި އިޢުލާނުގައި އިތުރަށް ވިދާޅުވީ، މި މުބާރާތުގައި ބައިވެރިވުމަށް އެދޭ ފަރާތްތަކުން މިކަމަށް އެދި ހުށަހަޅާ ސިޓީ އާއި ވަނަވަރު، އައި.ޑީ ކާޑުގެ ކޮޕީ އަދި ޝަރުޠު ހަމަވުމަށް ބޭނުންވާ ލިޔުންތައް 11 މެއި 2023 ވާ ބުރާސްފަތި ދުވަހުގެ 13:30 ގެ ކުރިން، ޤުރްއާނާބެހޭ ޤައުމީ މަރުކަޒަށް ހުށަހެޅުއްވުން އެދޭކަމަށެވެ.
އަދި އީ މެއިލް ކުރައްވަނީނަމަ [email protected] އެޑްރެހަށް ކަމަށާއި މި މުބާރާތުގައި ބައިވެރިކުރާނެ 2 ބައިވެރިން ހޮވާނީ މިކަމަށް އެދި ހުށަހަޅާ ފަރާތްތައް އެ މަރުކަޒުން އިމްތިޙާނު ކުރުމަށްފަހު ކަމަށްވެސް މި އިޢުލާނުގައި ވެއެވެ.
