ޕީޕީއީ ގަތުމަށް އެޑްވާންސަށް 32 މިލިއަން ރުފިޔާ ހަރަދުކުރި، ލިބުނީ 2،000 ސާޖިކަލް ކެޕް

ހެލްތު މިނިސްޓްރީން ތިންލައްކައަށް ވުރެ ގިނަ ޕާސަނަލް ޕްރޮޓެކްޓިވް އިކްއިޕްމަންޓްސް (ޕީޕީއީ) ހޯދުމަށް 32 މިލިއަނަށް ރުފިޔާއަށް ވުރެ ބޮޑު އަދަދެއް ހޭދަކޮށްފައިވާ ކަމަށާއި ލިބިފައިވަނީ 2،000 ސާޖިކަލް ކެޕް އެކަނި ކަމަށް އޮޑިޓް ރިޕޯޓުން ހާމަވެއްޖެއެވެ.

Ads by MWSC

މިކަން ހާމަވެގެން ދިޔައީ އޮޑިޓާ ޖެނެރަލްގެ އޮފީހުން ނެރުނު ކޮވިޑް-19 އާ ގުޅިގެން ހެލްތު މިނިސްޓްރީން ކޮށްފައިވާ ހަރަދުތަކުގެ ކޮމްޕްލަޔަންސް އޮޑިޓު ރިޕޯޓުންނެވެ.

އެ ރިޕޯޓުގައި ބުނެފައިވަނީ ކޮވިޑް-19 އާ ގުޅިގެން ބޭނުންވާ ޕާރސަނަލް ޕްރޮޓެކްޓިވް އިކްއިޕްމަންޓްސް (ޕީޕީއީ) ހޯދުމަށް ޖުމްލަ 32،968،650 (ތިރީސްދެ މިލިއަން ނުވަ ލައްކަ ފަސްދޮޅަސް އަށް ހާސް ހަ ސަތޭކަ ފަންސާސް) ރުފިޔާ، މިނިސްޓްރީ އޮފް ހެލްތުން އެސް.ޓީ.އޯ އަށް އެޑްވާންސްކޮށް ޙަވާލުކޮށްފައިވާ ކަމަށެވެ.

ނަމަވެސް، އެ ގޮތުގެމަތިން ފައިސާ ދެއްކުނު ތަކެތީގެ ތެރެއިން 2,000 ސާޖަން ކެޕް ފިޔަވައި، ދެންހުރި ތަކެތި މިނިސްޓްރީއަށް ލިބިފައި ނުވާކަމަށް، އެ ފަރާތުން މައުލޫމާތު ދޭ ކަމަށް އޮޑިޓް ރިޕޯޓުގައި ފާހަގަ ކޮށްފައި ވެއެވެ.