ހެލްތު މިނިސްޓަރ މަގާމުން އެކަހެރި ވެއްޖެ
ހެލްތު މިނިސްޓަރ އަބްދުﷲ އަމީން، އެމަގާމުން "އެކަހެރި" ވެއްޖެއެވެ.
ހެލްތު މިނިސްޓަރ ކަމުގެ މަގާމުން އަމީން "އެކަހެރި" ވެއްޖެކަން އެމަނިކުފާނު އަންގަވާފައި ވަނީ ރައީސް އިބްރާހިމް މުޙައްމަދު ޞާލިޙަށް މިއަދު ފޮނުއްވެވި ސިޓީއަކުންނެވެ.
މިނިސްޓަރ އަމީން ރައީސް ޞާލިޙަށް ފޮނުއްވި އެސިޓީގައި ވިދާޅުވެފައިވަނީ ކޮވިޑްގެ ހާލަތާއި ގުޅިގެން މިނިސްޓްރީ އޮފް ހެލްތުގެ ޚަރަދުތަކުގެ ކޮމްޕްލައެންސް އޮޑިޓް ރިޕޯޓުގައި ފާހަގަ ކޮށްފައިވާ ކަންތައްތަކާއި ގުޅިގެން، ކަމާއިބެހޭ މުއައްސަސާތަކުން މިމައްސަލަ ތަހުގީގުކޮށް ގޮތެއް ނިންމަން ދެން ނުވަތަ ރައީސް ޞާލިޙު ވަކި ގޮތެއް އަންގަވަން ދެން، މިނިސްޓަރ އޮފް ހެލްތުގެ މަސައްކަތުން އެކަހެރި ވާން ގަސްދުކުރައްވާ ކަމަށެވެ.
މިނިސްޓަރ އަމީން މަގާމުން އެކަހެރިވުމަށް ނިންމާފައިވާއިރު، ކޮވިޑްގެ ހާލަތާއި ގުޅިގެން ކުރި ޚަރަދުތަކުގައި އޮޑިޓު ރިޕޯޓުން ފާހަގަވި ކޮރަޕްޝަންތައް ތަހުގީގުކުރަން ރައީސް ޞާލިޙު މިއަދު ވަނީ އޭސީސީ އަށާއި ފުލުހުންނަށް އަންގަވާފައެވެ.
ކޮވިޑާއި ގުޅިގެން މިނިސްޓްރީ އޮފް ހެލްތުން ޚިޔާނާތްތަކެއް ހިންގާފައިވާކަން، އޮޑިޓާ ޖެނެރަލް ޙަސަން ޒިޔަތު ސޮއި ކުރައްވާ އިއްޔެ އާއްމުކުރި އޮޑިޓް ރިޕޯޓުން ވަނީ ހާމަވެފައެވެ.
އެގޮތުން ކޮވިޑް-19އާ ގުޅިގެން ރާއްޖެ އަށް ބޭނުންވާ ވެންޓިލޭޓަރުތައް ގަތުމުގައި ދުބާއީގެ ކުންފުންޏަކާ 75 ވެންޓިލޭޓަރުގެ ގެންނަން ހަވާލުކުރީ ޑަބްލިއުއެޗްއޯގެ ލަފައާ އެކު ކަމަށް ހެލްތު މިނިސްޓްރީން ބުނެފައި ވިޔަސް އެ ކުންފުންޏާ އެކު ހިންގާފައިވާ މުއާމަލާތަކީ މުޅިން ވެސް މަކަރާއި ހީލަތްކަން އެރިޕޯޓުން ހާމަވެފައިވެއެވެ.
ރާއްޖެ އަށް 145 ވެންޓިލޭޓަރު ގެންނަން ތިން ކުންފުންޏަކާ ހަވާލުކުރުމުގައި ބޮޑެތި އޮޅުވާލުންތަކެއް ހުރި ކަމުގެ ތުހުމަތު ވަނީ މީގެ ދުވަސްކޮޅެއް ކުރިން ވެސް ކުރެވިފައެވެ.
އިއްޔެ އާންމުކުރި އޮޑިޓް އޮފީހުގެ ޚާއްސަ އޮޑިޓުން ހާމަވަނީ އެކަމުގައި ކޮރަޕްޝަނަށް މަގުފަހިވާ ކަންތައްތަކެއް ހިންގާފައިވާ ކަމެވެ.
އެންމެ ބޮޑު މައްސަލައަކީ 75 ވެންޓިލޭޓަރު ގެންނަން ދުބާއީގެ އެގްޒެކިއުޓާސް ޖެނެރަލް ޓްރޭޑިންއާ 34 މިލިއަން ރުފިޔާ އަށް ހަވާލުކޮށް، ބޮޑެތި އޮޅުވާލުންތަކެއް އޮޅުވާލާފައި ވުމެވެ. ވެންޓިލޭޓަރުތައް ގެންނަން އެ ކުންފުންޏާ ހަވާލުކުރީ ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) މެދުވެރިކޮށް ކަމަށް ހެލްތުން ބުނަމުން އައި ވާހަކަ ވެސް އެއޮޑިޓު ރިޕޯޓުގައި ވަނީ ދޮގުކޮށްފަ އެވެ.
