ޕާޓީި ރަޖިސްޓްރީކުރުމުގެ ހުއްދަ ނުދީ ލަސްކުރާ ކަމަށް ބުނެ ޑިމޮކްރެޓްސްއިން ކޯޓަށް
“ދަ ޑިމޮކްރެޓްސް” އުފެއްދުމަށް ބޭނުންވާ ފޯމު ހުށަހެޅިތާ ގިނަ ދުވަސްތަކެއް ވެފައިވީ ނަމަވެސް، އެ ޕާޓީ އުފެއްދުމުގެ ހުއްދަ އިލެކްޝަންސް ކޮމިޝަން (އީސީ)ން ހިފަހައްޓަމުންދާ ކަމަށް ބުނެ، އެ ޕާޓީ އުފެއްދުމުގައި ހަރަކާތްތެރިވާ ބޭފުޅުން މިއަދު ސިވިލް ކޯޓަށް މައްސަލައެއް ހުށަހަޅައިފިއެވެ.
ޕާޓީތަކުގެ ފަރާތުން މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަފުޅުދައްކަވަމުން ހަސަން ވިދާޅުވީ ޕާޓީއަށް ހުއްދަ ދިނުން ލަސްކޮށްފައިވާތީ އެ މައްސަލަ ކޯޓަށް ހުށަހަޅާފައިވާ ކަމަށެވެ.
އެ ޕާޓީން ކޯޓަށް ހުށަހެޅި މައްސަލާގައި ބުނީ، ދަ ޑިމޮކްރެޓްސްގެ ނަމުގައި ސިޔާސީ ޕާޓީއެއް އުފެއްދުމަށް އިލެކްޝަންސް ކޮމިޝަނުން ދޫކޮށްފައިވާ ހުއްދައިގެ ދަށުން ޕާޓީ ރަޖިސްޓްރީ ކުރަން ބޭނުންވާ އަދަދަށް ފޯމު ހުށަހަޅާފައިވާ ކަމަށާއި އެ ފޯމުތައް ސައްހަކަން ކަށަވަރު ކުރުމުގެ މަސައްކަތް ނިމިފައިވާ ކަމަށް އިލެކްޝަންސް ކޮމިޝަނުން ބުނެފައިވާ ކަމަށެވެ.
އެހެންނަމަވެސް އެއްވެސް ސަބަބެއް ނެތި، ޕާޓީ ރަޖިސްޓްރީ ކުރުން ލަސްކުރުމުގެ ނިޔަތުގައި އިލެކްޝަނުން މަސައްކަތް ކުރަމުންދާ ކަމަށާއި އެކަން ކުރަމުންދަނީ ގާނޫނުއަސާސީ އާއި އިލެކްޝަންސް ކޮމިޝަނުގެ ގާނޫނު އަދި ސިޔާސީ ޕާޓީތަކުގެ ގާނޫނާ ވެސް ހިލާފަށް ކަމަށް ބުނެފައިވެއެވެ.
އަދި ދުސްތޫރީ ގޮތުން ކަށަވަރުކޮށްދީފައިވާ އަސާސީ ހައްގުތަކަށް ވެސް އުނިކަން އަންނަ ގޮތަށް އެ ކޮމިޝަނުން ދަނީ މަސައްކަތްކުރަމުން ކަމަށް ބުނެފައި ވެއެވެ.
Ads by STO
