އިމްރާން, ޑިމޮކްރެޓްސް ސިފަ ކުރެއްވީ ފަންޏެއްގެ ގޮތުގައި, ވިދާޅުވީ ފަސޭހަވެގެންދާއިރު ލަކުނެއް ވެސް ނުހުންނާނެ ކަމަށް
ރައީސް އިބްރާހީމް މުޙައްމަދު ޞާލިޙްގެ ކޯލިޝަނުގައި ދާދިފަހުން ފަންޏެއް އެޅި ކަމަށާއި, ނަމަވެސް އެކަން ނިމިގެންދާއިރު އެންމެ ލަކުނެއް ވެސް ނުހުންނާނެ ކަމަށް އަދާލަތު ޕާޓީގެ ރައީސް ޝެއިޚް އިމްރާން ވިދާޅުވެއްޖެއެވެ.
ޝެއިޚް އިމްރާން މިހެން ވިދާޅުވީ, ފޯކައިދޫގައި ރޭ އޮތް, އެމްޑީޕީގެ ކެންޕެއިން ޖަލްސާ, "އުފާވެރި އަމާން ރާއްޖެ"ގައި ދެއްކެވި ވާހަކަފުޅުގައެވެ.
ފަންޏެއް އެޅި ވާހަކަ ޝެއިޚް އިމްރާން ވިދާޅުވި ނަމަވެސް, އެކަން ރައްދު ކުރެއްވީ ކޮންބަޔަކާ ކަމެއް ވިދާޅުވެފައެއްނުވެއެވެ.
"ވޭތުވެދިޔަ ދުވަސްކޮޅުގައި ކޮންމެވެސް ވަރެއްގެ ފަންޏެއް އަޅައިގެން, ހިތިފަތް ޖަހައިގެން ބައެއް ފަނިތަކަށް ފަރުވާ ދޭން ޖެހުމަކީ ހިތާމަހުރި ކަމެއް. އެހެންނަމަވެސް އަޅުގަނޑު ޤަބޫލު ކުރަނީ އެއްކޮށް ބަލި ފަސޭހަވެގެންދާއިރު އެންމެ ލަކުނެއް ވެސް ނުހުންނާނޭ." ޝެއިޚް އިމްރާން ވިދާޅުވިއެވެ.
އިމްރާން މިއިޝާރާތް ކުރެއްވީ އެމްޑީޕީގެ އެތެރެ، ބައިބައިވެ އުފައްދާފައިވާ ދަ ޑިމޮކްރެޓްސްއަށް އިޝާރާތް ކުރައްވާ ކަމަށް ލަފާ ކުރެއެވެ. ޝެއިޚް އިމްރާން ވަނީ މީގެ ކުރިން ވެސް ރައީސް ނަޝީދު އިސްކޮށް ހުންނަވާ އުފައްދަވާ އެ ޕާޓީއަށް ފާޑު ވިދާޅުވެފައެވެ.
ޝެއިޚް އިމްރާންގެ ވާހަކަފުޅުގައި އިތުރަށް ވިދާޅުވީ, "ރާއްޖެ ދެކެމުން މިދާ ހުރިހާ އުފަލަކާއި, ހުރިހާ ތަރައްޤީއަކާއި, ކުރިއެރުން މި ގެނެސްދެނީ މި ކޯލިޝަންގެ ހުރިހާ އެންމެން ބައިވެރި ވެގެން މިއަދާ ހަމައަށް ގެނެސްދީގެން" ކަމަށެވެ. އަދި ކޯލިޝަނެއްގައި މުހިންމު ކަންކަމަށް އެމަނިކުފާނު ދެކެވަޑައިގަންނަވާ ކަންތައްތައް ވިދާޅުވިއެވެ.
"ކޯލިޝަނެއް ދެމި އޮންނަނީ އޭގައި މުހިންމު ސިފަތަކެއް ދެމި ހުރުމުން. ކޯލިޝަންގެ ބައިވެރިން އެެއްބަޔަކު އަނެއްބަޔަކަށް އިޙްތިރާމް ކުރާބަޔަކަށް ވެގެން. ކޯލިޝަންގެ ބައިވެރިންނަކީ އެއްބަކު އަނެއް ބަޔަކަށް މަޝްވަރާ ކުރެވޭ ބަޔަކަށް ވެގެން, އެއްބަޔަކު އަނެއް ބަޔަކަށް ޓޮރޮލޯޓް ކުރަން ދަސްކުރާ ބަޔަކަށް ވެގެން" ޝެއިޚް އިމްރާން ވިދާޅުވިއެވެ.
ޝެއިޚް އިމްރާން އިތުރަށް ވިދާޅުވީ, ރައީސް ޞާލިޙްގެ ކިބައިން ފެނިގެންދަނީ އެންމެންގެ ތަފާތުތައް ނައްތާލާ, ޤައުމީ މަސްލަހަތު އިސްކޮށްގެން ޤައުމައިގެން ކުރިޔަށް ދިއުމުގެ މަޝްވަރާއާއެކު ކުރިޔަށް ވަޑައިގަންނަވާތަން ކަމަށާއި, އެއީ ޙަޤީޤީ ލީޑަރުން ކަމަށެވެ.
Ads by STO
