މާފުށިން ފެންނަ އުފާވެރިކަމާއި ތަރައްޤީ ލިބެނީ ރާއްޖޭގައި އޮތް އަމާންކަމުގެ ސަބަބުން: ރައީސް ޞާލިޙް
ވޭތުވެދިޔަ ދުވަސްތަކުގައި އެމްޑީޕީގެ ސަރުކާރުން އެންމެ ބޮޑަށް އިސްކަމެއް ދިނީ ތަފާތު ކުރުމެއް ނެތި ހުރިހާ ރަށަކަށް ބޭނުންވާ އަސާސީ ހިދުމަތްތައް ފޯރުކޮށް ދިނުމަށް ކަމަށާއި, މާފުށިން ފެންނަ އުފާވެރިކަމާއި ތަރައްޤީ ލިބެނީ ރާއްޖޭގައި އޮތް އަމާންކަމުގެ ސަބަބުން ކަމަށް ރައީސް އިބްރާހީމް މުޙައްމަދު ޞާލިޙް ވިދާޅުވެއްޖެއެވެ.
ރައީސް ޞާލިޙް މިހެން ވިދާޅުވީ, ކ. މާފުށީގައި މިރޭ ބޭއްވި ކެމްޕޭނު ޖަލްސާގައި ދެއްކެވި ވާހަކަފުޅުގައެވެ.
"މިރަށުގެ ގެސްޓްހައުސްތައް ހިންގެނީ ވެސް ރާއްޖޭގައި އޮތް ހަމަޖެހުމުގެ ސަބަބުން. އެންމެ ފުރަތަމަ ކުރަން ޖެހުނު ކަމަކީ ހަލަބޮލިކަން ނައްތާލުން. ހަމަޖެހުން ގެނެސް އަމާންކަން ގެނައުން،" ރައީސް ވިދާޅުވީ، ރާއްޖޭގެ ވެރިކަމާ ހަވާލުވި އިރު ގައުމު އޮތީ، ވަރަށް ބޮޑު ހަލަބޮލިކަމެއްގައި ކަމަށާއި އެ ހަލަބޮލިކަން ނައްތާލާއި އަމާންކަމާއި ހަމަޖެހުން ރައްޔިތުންނަށް ގެނެސްދީފައިވާ ކަމަށެވެ.
މާފުށީގައި މިހާރު ކުރަމުންދާ މަސައްކަތްތަކާއި ކުރިއަށް ރޭވިފައި ހުރި މުހިންމު ކަންކަމަށް ރައީސް އަލިއަޅުވާލެއްވިއެވެ. ރައީސް ވަނީ ރައްޔިތުން އެދުނު ގޮތަށް މާފުށީގެ ބިން ކައުންސިލާ ހަވާލުކޮށް، އެ ބިން މާފުއްޓާ ގުޅުވާލުމުގެ މަސައްކަތް ކުރިއަށްދާ ކަމަށެވެ. އަދި މާފުށީގެ ބަނދަރު ބޮޑުކުރުމުގެ މަސައްކަތަކީ އެރަށަށް ލިބޭ ކުރިއެރުމެއް ކަމަށް ރައީސް ވިދާޅުވިއެވެ.
މީގެ އިތުރުން ސިއްހީ މަރުކަޒަށް ބަދަލުތައް ގެނެސް، އެ ތަނުން ކުރިން ނުލިބޭ ޚިދުމަތްތައް ލިބޭނެ އިންތިޒާމް ހަމަޖައްސައިދީފައި ވާކަމަށްވެސް ރައީސް ވިދާޅުވިއެވެ. އަދި ރަށުގެ ސިއްހީ މަރުކަޒު ހޮސްޕިޓަލަކަށް ބަދަލުކޮށްފައިވާކަން ރައީސް ވަނީ ފާހަގަކުރައްވާފައެވެ.
