ޗައިނާއިން ޑްރޯން ހަދަން ބޭނުންކުރާ ސާމާނު ބޭރު ނުކުރެވޭ ގޮތަށް ހަދައިފި
ޓެކްނޮލޮޖީއަށް ވަނުމާ ގުޅިގެން އެމެރިކާއާ ދެމެދު އުފެދިފައިވާ ނުތަނަވަސްކަން އިތުރުވެފައިވާ ދަނޑިވަޅެއްގައި ޗައިނާއިން ވަނީ ބައެއް ޑްރޯންތަކާއި ޑްރޯންއާ ގުޅުންހުރި އާލާތްތައް އެކްސްޕޯޓް ކުރުން ކޮންޓްރޯލް ކުރަން ބޭނުންވާ ކަމަށް ބުނެ "ގައުމީ ސަލާމަތާއި މަސްލަހަތު" ހިމާޔަތް ކުރަން ބޭނުންވާ ކަމަށް ބުނެފަ އެވެ.
ކޮމާސް މިނިސްޓްރީން ބުނީ ބައެއް ޑްރޯން އިންޖީނާއި ލޭޒާއާއި މުވާސަލާތީ އާލާތްތަކާއި އެންޓި ޑްރޯން ސިސްޓަމްތައް ހިމެނޭ ގޮތަށް އިކުއިޕްމަންޓަށް އަޅާފައިވާ ފިޔަވަޅުތަކަށް އަމަލުކުރަން ފަށާނީ ސެޕްޓެމްބަރު މަހުގެ އެއްވަނަ ދުވަހުން ފެށިގެން ކަމަށެވެ.
މި ކޮންޓްރޯލްތަކުގެ ސަބަބުން ބައެއް ކޮންސިއުމާ ޑްރޯންތަކަށް ވެސް އަސަރު ކުރާ ކަމަށާއި އަސްކަރީ ބޭނުމަށް މަދަނީ އެއްވެސް ޑްރޯންއެއް އެކްސްޕޯޓް ނުކުރެވޭނެ ކަމަށް އެ މިނިސްޓްރީގެ ތަރުޖަމާނު ވިދާޅުވި އެވެ.
"ޗައިނާއިން މިފަހަރު ޑްރޯން ކޮންޓްރޯލް ކުރުމުގެ ފުރުސަތު ކުޑަކޮށް ފުޅާކުރުމަކީ ޒިންމާދާރު ބޮޑު ގައުމެއްގެ ހައިސިއްޔަތުން އަޅުގަނޑުމެންގެ ސްޓޭންޑް ދައްކުވައިދިނުމަށާއި، ދުނިޔޭގެ ސަލާމަތީ ކަންކަން ތަންފީޒުކުރުމަށާއި، ދުނިޔޭގެ ސުލްހަ މަސަލަސްކަން ދެމެހެއްޓުމަށް އެޅުނު މުހިންމު ފިޔަވަޅެއް،" ނަން ނޭނގޭ ތަރުޖަމާނު ވިދާޅުވި އެވެ.
އަދި ކަމާބެހޭ ފަރާތްތަކުން ކަމާގުޅުންހުރި ޤައުމުތަކާއި ސަރަޙައްދުތަކަށް އެކަން އަންގާފައިވާކަމަށްވެސް ތަރުޖަމާނު ވިދާޅުވިއެވެ.
ޗައިނާއަކީ ޑްރޯން އުފެއްދުމުގެ ބޮޑު ސިނާއަތެއް އޮންނަ ގައުމެއް ކަމަށާއި އެމެރިކާ ފަދަ ގިނަ މާކެޓުތަކަށް އެކްސްޕޯޓް ކުރާ ގައުމެކެވެ.
