އިނގުރައިދޫން އަންހެނަކާއި، އޮމަދޫން އަންހެނަކު ކޮވިޑް-19 އަށް ފައްސިިވެއްޖެ
ރ. އަތޮޅު އިނގުރައިދޫން އަންހެނަކާއި، އދ. އޮމަދޫން އަންހެނަކު ކޮވިޑް-19 އަށް ފައްސިިވެއްޖެ އެވެ.
އެޗްޕީއޭއިން މިއަދު ބުނީ ހޯމް ކަރަންޓީނުގައި ތިބި 2 އަންހެނަކު ކޮވިޑް-19 އަށް ފައްސިވެފައިވާ ކަމަށެވެ. އެގޮތުން އޭގެ ތެރޭގައި ހިމެނެނީ ރ. އިނގުރައިދޫން ފައްސިވި 36 އަހަރުގެ އަންހެނެއްގެ އިތުރުން އދ. އޮމަދޫއިން ފައްސިވި 58 އަހަރުގެ އަންހެނެކެވެ.
މީގެ ކުރިން އިނގުރައިދޫގައި ހޯމް ކަރަންޓީންގައި ތިބި ދެ މީހަކު ވަނީ ކޮވިޑް-19 ފައްސިވެފައެވެ. އަދި މިއީ އޮމަދޫން ކޮވިޑް-19 ގެ ކޭސް އެއް ފެނުނު ފުރަތަމަ ފަހަރެވެ.
މީގެ އިތުރު މިއަދު ކ. ގުޅިން ދެ މަހުގެ ތުއްތު އަންހެން ކުއްޖަކުވެސް ވަނީ ކޮވިޑް-19 އަށް ފައްސިވެފައެވެ.
މި ރަށްރަށުގެ އިތުރުން ރާއްޖޭގެ އިތުރު 20 ރަށެއްގައި ކޮވިޑްގެ ބަލި މީހުން އެބަތިއްބެވެ. އެއީ ހއ. ފިއްލަދޫ، ހދ. ކުރިނބި، ބ. ކުޑަރިލިކު، ކ. ތުލުސްދޫ، ފ. ނިލަންދޫ، ތ. މަޑިފުށި، ހިތަދޫ، ހއ. އިހަވަންދޫ، ނ. މިލަދޫ، ރ. ހުޅުދުއްފާރު، ކ. ހިންމަފުށި، ވ. ކެޔޮދޫ، ތ. ވިލުފުށި، އައްޑޫ ސިޓީ ފޭދޫ، ހދ. ނާވައިދޫ، ބ. ކަމަދޫ، ޅ. ނައިފަރު، އދ. މާމިގިލި، ވ. ތިނަދޫގެ އިތުުރުން ފުވައްމުލަކު ސިޓީއެވެ.
