މިދިޔަ މަހު އަސާސީ ބާވަތްތަކުގެ އަގުތައް ހުރީ %0.96ގައި

މިދިޔަ އޮކްޓޫބަރު މަހު މާލޭގައި ޒަރޫރީ ތަކެތީގެ އަގުތައް އުފުން ހުރީ 0.96 ޕަސެންޓުގައި ކަމަށް ދައްކައިފިއެވެ.
މޯލްޑިވްސް ބިއުރޯ އޮފް ސްޓެޓިސްޓިކްސް (އެމްބީއެސް)އިން އާއްމުކުރި ތަފާސް ހިސާބުތައް ދައްކާ ގޮތުން ސެޕްޓެމްބަރު މަހާ އަޅާބަލާއިރު އޮކްޓޫބަރު މަހު ޒަރޫރީ ތަކެތީގެ އަގުތައް ވަނީ އެންމެ 1.01 އިންސައްތައިގެ އުފުލުމެކެވެ.
އޮކްޓޫބަރު މަހު އެންމެ ބޮޑަށް އަގު އުފުލިފައި ވަނީ މޭވާގެ ބާވަތްތަކުން (3.32 އިންސައްތަ)އެވެ. މީގެ އިތުރުން ގޮވާމުގެ ބާވަތްތައް (1.92 އިންސައްތަ) ހަކުރާއި ޗޮކްލެޓް ފަދަ ބާވަތްތައް (1.51 އިންސައްތަ) ތެލާއި ސަރުބީ (1.38 އިންސައްތަ) އަދި އެއްގަމު މަހުގެ އަގު (1.04 އިންސައްތަ) ވަނީ އުފުލިފައެވެ. ނަމަވެސް، ތަރުކާރީގެ އަގު 0.38 އިންސައްތަ އަދި މަހުގެ ބާވަތްތަކުގެ އަގު 0.31 އިންސައްތަ ވަނީ ދަށްވެފައެވެ.
އަހަރު ދުވަހުގެ ތެރޭ ބަލާނަމަ ކާބޯތަކެތީގެ އަގުތައް ވަނީ 10.73 އިންސައްތަ އުފުލިފައެވެ.
އަހަރު ދުވަހުގެ ތެރޭ އައިސްފައިވާ ބަދަލު:
އެއްގަމު މަސް: 23.97 އިންސައްތަ އިތުރުވެފައި
ތަރުކާރީ: 22.16 އިންސައްތަ އިތުރުވެފައި
މޭވާ: 13.24 އިންސައްތަ އިތުރުވެފައި
ކިރާއި ބިހުގެ ބާވަތްތައް: 12.11 އިންސައްތަ އިތުރުވެފައި
ތެލާއި ސަރުބީ: 10.20 އިންސައްތަ އިތުރުވެފައި
މި ތަފާސް ހިސާބުތައް ދައްކާ ގޮތުން ބުއިންތައް (ބެވަރޭޖަސް)ގެ އަގުތައް ސެޕްޓެމްބަރު މަހާ އަޅާބަލާއިރު ބުއިންތަކުގެ އަގު 1.45 އިންސައްތަ އުފުލުނުއިރު، އަހަރީ ނިސްބަތުން ވަނީ 7.42 އިންސައްތަ މައްޗަށް ގޮސްފައެވެ. މީގެ ތެރެއިން ކޮފީގެ ބާވަތްތަކުގެ އަގު އަހަރެއްގެ ތެރޭގައި 23.22 އިންސައްތަ ވަނީ އުފުލިފައެވެ.
ޕާސަނަލް ކެއާ (ޒާތީ ސާފުތާހިރުކަމަށް ބޭނުންކުރާ ތަކެތި)ގެ ބައިގެ އަގުތައް މަހުން މަހަށް 1.53 އިންސައްތަ އުފުލުނުއިރު، އަހަރީ ނިސްބަތުން ވަނީ 4.86 އިންސައްތަ އިތުރުވެފައެވެ. ގޭހާއި އެހެނިހެން ތެލުގެ އަގުތައް ސެޕްޓެމްބަރު މަހާ އަޅާބަލާއިރު އޮކްޓޫބަރު މަހު ގޭހާއި ތެލުގެ އަގަށް އެއްވެސް ބަދަލެއް އައިސްފައި ނުވި ނަމަވެސް، މިދިޔަ އަހަރުގެ އޮކްޓޫބަރު މަހާ އަޅާބަލާއިރު އަގުތައް ހުރީ 13.82 އިންސައްތަ މަތީގައެވެ.





ކޮމެންޓް
މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.