މުޢިއްޒުއާއި ސާޖިދާ ބައްދަލުވެވަޑައިގެންނެވި ގޮތާއި ގުޅޭ ޝައުގުވެރި ވާހަކަތަކެއް

ޕީއެންސީގެ ރިޔާސީ ކެންޑިޑޭޓް، ޑރ.މުޙައްމަދު މުޢިއްޒުއާއި އަނބިކަނބަލުން ސާޖިދާ މުޙައްމަދު އެންމެ ފުރަތަމަ ބައްދަލުވެވަޑައިގެންނެވި ގޮތާއި ގުޅޭގޮތުން ޝައުގުވެރި ވާހަކަތަކެއް ހިއްސާ ކުރައްވައިފިއެވެ.

Ads by STELCO

އޮންލައިން ނޫސް "މިހާރު" އަށް ދެއްވި ބަސްދީގަތުމެއްގެ ތެރެއިން، ސާޖިދާ ވިދާޅުވީ، އެންމެ ފުރަތަމަ މުޢިއްޒުއާއި ވާހަކަ ދެކެވުނީ އީމެއިލް މެދުވެރިކޮށް ކަމަށާއި، ދެ ބޭފުޅުންގެ ގުޅުމަށް މަގުކޮށައިދިނީ އާއިލާ ތެރެއިން ކަމަށެވެ.

"އަޅުގަނޑު އޭރު ހުރީ، ފައިނަލް އިޔަރގައި، ފުރަތަމަ ޑިގްރީ ހަދަން ވެގެން ރާއްޖެއިން ބޭރުގަ، ދެން ހަމަ ޖެނުއަރީ އެކެއްގަ، 2003ގަ، އެރޭ 12 ޖެހިއިރު، މަންމަ އަޅުގަނޑަށް މި ގުޅާލަނީ، ގުޅާފަ މި ބުނީ، އެބަހުއްޓޭ ވަރަށް ރަނގަޅު ކުއްޖެއް. އީމެއިލް އެޑްރެސް ފޮނުވާލަންހެއްޔޭ، އެ ކުއްޖާއާ ވާހަކަ ދައްކަން؟ ދެން އަޅުގަނޑު އައިއިރު ބުނެފަ އޮންނާނީ، މަންމަ މިފަހަރު ކުއްޖަކު ހޯދައިފިއްޔާ އަޅުގަނޑު އެކަން ކުރާނަމޭ. ދެން މަންމަ މެން ތިބީ، އަޅުގަނޑު ތަންކޮޅެއް ލަހުން މީހަކާ އިންނަހެން ހީވެގެން، އެކަމާ ކަންބޮޑުވެފަ، ދެން އެހެން ބުނެފަ އަޅުގަނޑު އައީ، އަސްލު މަޖަލަކަށް ބުނީ." ސާޖިދާ ވިދާޅުވިއެވެ.

މުޢިއްޒުއަށް ސާޖިދާގެ މެއިލް ލިބިވަޑައިގަތުމުން، އަނެއް ދުވަހު ހެނދުނު މެއިލްއެއް ކުރެއްވި ކަމަށާއި، އޭގެ ފަހުން އެމްއެސްއެންއިން ޗެޓް ކުރައްވަން ފެށުނު ކަމަށް ވެސް ސާޖިދާ ވިދާޅުވިއެވެ.

"ދެން ހަމަ ކޮންމެ ދުވަހަކު ވަން އަވަރ، ހޭދަ ކުރަން ހަމަ ޗެޓް ކުރުމުގަ، ވާހަކަ ދައްކަން. އަނެއްހެން ބުނަންޏާމު އޭރުގަ ދިމައެއް ނުވޭ، ދުވަހަކު ވެސް." ސާޖިދާ ވިދާޅުވިއެވެ.

ކައިވެނި ބައްލަވައިގަންނަން އާނ ބަސް ވިދާޅުވިއިރު، މުޢިއްޒުގެ ދެކަނބަލުން ފޯނުން ނޫންގޮތަކަށް ބައްދަލުވެވަޑައިގެންފައެއް ނުވެއެވެ. ސާޖިދާއަށް މުޢިއްޒު ފެނިވަޑައިގަތީ، 2003 ‏ވަނަ އަހަރުގެ އޭޕްރީލް މަހުގެ 30 ވަނަ ދުވަހު، މާލެ ވަޑައިގަތުމުން އެއާޕޯޓުންނެވެ.

"ހަމަ ވާހަކަ ދައްކަމުން ދައްކަމުން ގޮއްސަ، އަޅުގަނޑަށް ވަރަށް ކަމުގޮއްސި، މުޢިއްޒުގެ ވިސްނުމާއި އެއްޗެހި."

ސާޖިދާ އިތުރަށް ވިދާޅުވީ މުޢިއްޒު އަކީ ވަރަށް މަޑުމައިތިރި ބޭފުޅެއްކަން ވާހަކަ ދެއްކެވި ގޮތުން ވެސް އެނގިވަޑައިގެންނެވި ކަމަށާއި، އެއީ ވަރަށް ކަމުދިޔަ ސިފައެއް ކަމަށެވެ.