ރައީސް ނަޝީދުގެ ވެރިކަމުގައި މަޖިލީހުގެ ކަންކަން ނިންމީ މުލިއާގޭގެ ކާ ކޮޓަރިން: ރޮޒައިނާ
2008 އިން 2012 އަށް ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދުގެ ވެރިކަމުގައި ރައްޔިތުންގެ މަޖިލީހުގެ ކަންތައްތައް ނިންމަމުން ދިޔައީ ކޮންމެ ދުވަހަކު މުލިއާގެއަށް މެންދުރު ކާންގޮސް އެތަނުން ނިންމާ ގޮތަކަށް ކަމަށް ރައްޔިތުންގެ މަޖިލީހުގެ އައްޑޫ މީދޫ ދާއިރާގެ މެންބަރު ރޮޒައިނާ އާދަމް ވިދާޅުވެއްޖެއެވެ.
މިއަދު މަޖިލީހުގައި ރޮޒައިނާ މިހެން ވިދާޅުވެފައިވަނީ ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙު ވިދާޅުވާހާގޮތަކަށް މަޖިލީހުގައި ތިއްބެވި އެމްޑީޕީއަށް ނިސްބަތްވާ މެމްބަރުން ކަންކަން ކުރައްވާކަމަށް މަޖިލީހުގެ މާފަންނު އުތުރު ދާއިރާގެ މެންބަރު އިމްތިޔާޒް ފަހުމީ (އިންތި) ވިދާޅުވެފައިވާތީކަމަށް ރޮޒައިނާ ވިދާޅުވިއެވެ.
"އަޅުގަނޑުމެން މި ތަނުގައި މަސައްކަތްކުރަނީ ރައީސް ޞާލިޙް ވިދާޅުވާހާ ގޮތަކަށް ކަމަށް ދޭހަވާގޮތަށް ކަމަށް ދެންނެވީމާ އަޅުގަނޑު މި ދަންނަވާލަނީ 2008 އިން 2012 އަށް ކޮންމެ ދުވަހަކު މެންދުރު ކާން މުލިއާގެއަށް ދާ ބަޔަކު ގޮސް އެތަނުން ނިންމާ ގޮތަކަށް މަޖިލީހުގައި ކަންތައް ކުރަމުންދިޔަ ބަޔަކު މިއަދު އެހެން ބުނީމަކާ އަޅުގަނޑުމެން ހައިރާނެއް ނުވޭ" ރޮޒައިނާ ވިދާޅުވިއެވެ.
އެގޮތުން، ރައްޔިތުންގެ މަޖިލީހަކުން މިހާތަނަށް މި ސަރުކާރުން ހުށަހެޅި އެއްވެސް ކަމެއް ސަރުކާރުން ހުށަހަޅާފައިވާގޮތަކަށް ފާސްކޮށްފައިނުވާނެ ކަމަށާއި އެމްޑީޕީ މެމްބަރުން މަޖިލީހުގައި މަސައްކަތްކުރައްވާއިރު، އަދި ކުރައްވަމުން ގެންދަވާއިރު ރައީސް ޞާލިހް އެބޭފުޅުންނަށް ނުފޫޒު ފޯރުވުމުގެ ގޮތުން އެއްވެސް ކަމެއް ކޮށްފައިނުވާނެކަމަށް ރޮޒައިނާ ވިދާޅުވިއެވެ.
"މި މަޖިލީހަކުންނެއް މިހާތާކަށް ސަރުކާރުން ހުށަހެޅި އެއްވެސް އެއްޗެއް ސަރުކާރުން ހުށަހަޅާފައިވާހާ ގޮތަކަށް ފާސްކޮށްފައި ނޯންނާނެ، އަޅުގަނޑުމެން މި މަޖިލީހުގައި މަސައްކަތްކުރިއިރުގައި، ކުރަމުންދާއިރުގައި، ރައީސް ޞާލިޙް އަޅުގަނޑުމެންނަށް ނުފޫޒު ފޯރުވާކަށް އެއްކަމެއްވެސް ކޮށްފަކާއެއް ނެތް" ރޮޒައިނާ ވިދާޅުވިއެވެ.
އަދި ރައީސް ޞާލިޙް މަޖިލީހަށް ނުފޫޒު ނުފޯރުއްވާކަން ހާމަވާ ކަންތައްތަކުގެ ތެރޭގައި އެޗްއާރްސީއެމަށް މެމްބަރަކު ނަގަން ވެގެން މަޖިލީހަށް ރައީސުލްޖުމްހޫރިއްޔާ ފޮނުއްވީ އެންމެ ނަމަކަށްވާއިރު އެ ފަހަރުވެސް މަޖިލީހުން އެ ނަން ކަމުނުދާތީ ކޮމިޓީން ބޭރު ކޮށްލާފަ އޮތް އޮތުމަށް ރޮޒައިނާ އިޝާރާތްކުރެއްވިއެވެ.
"އެހެންވީމާ އޭގެން އެނގޭ ކަމަކީ ރައީސުލްޖުމްހޫރިއްޔާ މިތަނަށް ފޮނުވާހާ އެއްޗެއް ފޮނުވާހާ ގޮތަކަށް ފާސްކުރާކަށް އަޅުގަނޑުމެންނަށް މަޖުބޫރެއްވެސް ނޫންކަން، އަދި އަޅުގަނޑުމެން އެގޮތަކަށް އެކަން ކޮށްގެން ރައީސުލްޖުމްހޫރިއްޔާގެ އެކަމާ ދޭތެރޭގައި މައްސަލައެއްވެސް ނެތްކަން" ރޮޒައިނާ ވިދާޅުވިއެވެ.
މިއަދުގެ ޖަލްސާގައި ރައީސް ނަޝީދުވެސް ވިދާޅުވެފައިވަނީ ރައީސުލްޖުމްޙޫރިއްޔާ އިބްރާހިމް މުޙައްމަދު ޞާލިޙަށް އެމްޑީޕީގެ މެމްބަރުންގެ ކޮންޓްރޯލް އޮންނަކަމަށް އެމަނިކުފާނު ވިދާޅުވިކަން ރޮޒައިނާއަށް ހަނދުމަފުޅުކުރައްވާފައެވެ.
ރައީސް ނަޝީދު އެކަން ފާހަގަކުރެއްވުމުން ރޮޒައިނާވަނީ އެކަމަށްވެސް ރައްދު ދެއްވާފައެވެ.
"ރަނގަޅު. ރާއްޖޭގެ ރައީސުލްޖުމްހޫރިއްޔާ ނިސްބަތްވަނީ އެމްޑީޕީއަށް، މިތާނގައި އޮތީ އެމްޑީޕީގެ މެޖޯރިޓީ، އެހެންވީމާ މި މަޖިލީހަކީ އެމަނިކުފާނުގެ ކޮންޓްރޯލްގަ އޮންނަ މަޖިލީހެކޭ ވިދާޅުވެވިދާނެ، އެހެންނަމަވެސް އަޅުގަނޑުމެން ކުރާ ކޮންމެ ކޮންމެ ކަމަކަށް އެމަނިކުފާނު އޭގެ ތެރެއަށް އަތްބާނައިގެން އެކަންކަން ކުރަންވީގޮތް ކިޔައިދީ، ކޮންމެ ދުވަހަކު މެންދުރު އަޅުގަނޑުމެން މުލިއާގެއަށް ގެންގޮސް ކާންދީފަ އަޅުގަނޑުމެންނަށް ހަދަންވީގޮތް ކިޔައިދީފަކާ ނުފޮނުވާ" ރޮޒައިނާ ވިދާޅުވިއެވެ.
މީގެ އިތުރުން ރޮޒައިނާ ވިދާޅުވީ މިއަށްވުރެ މިނިވަންކަމާއެކު ސަރުކާރެއްގެ ނުފޫޒު ނެތި ޕާޓީއެއްގެ މެމްބަރުން މަސައްކަތްކުރި ފަހަރެއް ނާންނާނެކަމަށާއި އެމްޑީޕީގެ މެމްބަރުން މަޖިލީހުގައި މަސައްކަތްކުރައްވަނީ ރައީސް ޞާލިޙުގެ އެއްވެސް ނުފޫޒެއް ނެތިކަމަށެވެ.
