މިލިޓަރީ އެންމެ ބޫޓު ޖޯޑެއް ވެސް ރާއްޖޭގައި ހުރުމަށް ޑރ. މުއިއްޒު އެދިނުލައްވާ, ރައީސް ނަޝީދު ހެއްދެވީ އިތުރުފުޅެއް: ތަރުޖަމާނު

ރާއްޖޭގައި ބޭރު ޤައުމެއްގެ މިލިޓަރީ އެންމެ ޖޯޑެއް ވެސް ހުރުމަށް އިންތިޚާބީ ރައީސް ޑރ. މުޙައްމަދު މުއިއްޒު އެދިނުލައްވާ ކަމަށާއި, ޑރ. މުޢިއްޒުއަށް ނިސްބަތްކޮށް, ރައްޔިތުންގެ މަޖިލީހުގެ ރައީސް, ރައީސސް ނަޝީދު ދެއްކެވީ ދޮގު ވާހަކަފުޅެއް ކަމަށް, އިންތިޚާބީ ރައީސްގެ އޮފީހުގެ އިންތިޤާލީ ތަރުޖަމާނު މުޙައްމަދު ފިރުޒުލް ވިދާޅުވެއްޖެއެވެ.
"އިންޑިއާގެ ދަ ހިންދޫ ނޫހަށް ދެއްވި އިންޓަރވިއުއެއްގައި ރައްޔިތުންގެ މަޖިލީހުގެ ރައީސް, ރައީސް މުޙައްމަދު ނަޝީދު, މުއިއްޒުއާ ހަވާލާ ދެއްވާ އިންޑިއާގެ ސިފައިންގެ 75 ބޭކަލުން ރުހި ވަޑައިގަންނަވާނެ ކަމަށް, މިފަދަ މޭރުމަކުން ވާހަކަ ދައްކަވާފައިވާތީ އެކަމާ އަޅުގަނޑު އެޑްރެސް ކުރަން" ކޮންމެ ދުވަހަކު ބާއްވާ ނޫސްވެރިންގެ ބައްދަލުވުން ފެށުމުގެ ކުރިން ދެއްވި ހުސާލާ ބަޔާނުގައި ފިރުޒުލް ވިދާޅުވިއެވެ.
"އަޅުގަނޑު ބުނެލަން ބޭނުން, އެ ވާހަކަތަކަކީ އެއްވެސް ހާލެއްގައި އިންތިޚާބީ ރައީސުލްޖުމްހޫރިއްޔާއާ މަޝްވަރާ ކުރެވިގެން ދެކިވިފައިވާ ވާހަކަތަކެއް ނޫން."
ފިރުޒުލް ވިދާޅުވީ, އިންޑިއާ އެކަނި ނޫން ކަމަށާއި, އެއްވެސް ޤައުމެއްގެ ސިފައިންގެ އެންމެ ބޫޓު ޖޯޑެއް ވެސް ދިވެހި ފަސްގަނޑުގައި ހުރުމަކަށް ޑރ. މުއިއްޒު ދުވަހަކު ވެސް އެދިނުލައްވާނެ ކަމަށެވެ. އަދި ދިވެހިން ވެސް އެގޮތަށް ނިންމާފައިވާ ކަމަށާއި, ރައީސް ނަޝީދު އެ ނިންމެވުމާ ފުށުއަރާގޮތަށް ވާހަކަފުޅު ދެއްކެވުން ބަލައިނުގަނެވޭ ކަމަށެވެ.
"ދިވެހިންގެ ނިންމެވުމާ ފުށުއަރާގޮތަށް ރައިސް ނަޝީދު ދައްކަވާ ވާހަކަފުޅުތަކާމެދު ހިތާމަކުރަން, އަދި ހަމައެހެންމެ, ޑރ. މުއިއްޒުއަށް ނިސްބަތް ކުރައްވާ ދެއްކެވީތީ ހިތާމަ ކުރަން, އަދި އެގޮތަށް އެކަން ނުކުރަން އިލްތިމާސް ކުރަން" ފިރުޒުލް ވިދާޅުވިއެވެ.





ކޮމެންޓް
މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.