މިއޮތީ މުޅި އުންމަތް އެއްބައިވެ އެކަތިގަނޑަކަށްވާންވީ ވަގުތު ޖެހިފައި: އިމްރާން
މުޅި އުންމަތް އެއްބައިވެ އެކަތިގަނޑަކަށްވާންވީ ވަގުތު މިއޮތީ ޖެހިފައިކަމަށް ހޯމް މިނިސްޓަރު އަދި އަދާލާތު ޕާޓީގެ ރައީސް އިމްރާން އަބްދުﷲ ވިދާޅުވެއްޖެއެވެ.
އިމްރާން އެކްސްގައި ކުރެއްވި ޕޯސްޓެއްގައި މިހެން ވިދާޅުވެފައިމިވަނީ ފަލަސްތީނުގެ ރައްޔިތުންނަށް އިޒްރޭލުން ދެމުންގެންދާ ހަމަލާތަކާއި ގުޅުވައިގެން ކަމަށް ބެލެވެއެވެ.
އެގޮތުން އިމްރާން ވިދާޅުވީ މި ވަގުތަކީ ފަރުދީ ތަފާތުތަކާއި މަސްލަޙަތުތައް އެއްފަރާތްކޮށްލަންވީ ވަގުތުކަމަށެވެ. އެހެންނޫނީ މި އުންމަތުގެ ކަރާމާތާއި ޝަރަފާއި، އިއްޒަތް ސަލާމަތްވާނެ އެއްވެސް ގޮތެއް ނެތްކަމަށްވެސް އެބޭފުޅާ ވިދާޅުވެފައިވެއެވެ.
ފަލަސްތީނުގެ ބިންތަކަށް ވެރިވެގަނެ، އެ ތަނުގައި ވަޒަންވެރިވެގެން އުޅޭ ޔަހޫދީންގެ އާންމުން ފަލަސްތީނުގެ އާންމު ރައްޔިތުންނާ އަމާޒުކޮށް ދެމުންދާ ހަމަލާތަކުގައި ފަލަސްތީނުގެ ކުށެއްނެތް 700 އަށްވުރެ ގިނަ ރައްޔިތުން ޝަހީދުވެފައިވާއިރު އިސްލާމީ އެކި އެކި ޤައުމުތަކުންނާއި ވަކި ވަކި ފަރުދުންވެސް އަންނަނީ ފަލަސްތީނުގެ ރައްޔިތުންނާ މެދު ހިންގާ ލާއިންސާނީ އަމަލުތައް ކުށްވެރިކުރަމުންނެވެ.
ދިވެހިރާއްޖެއިންވެސް މި ހަމަލާ ކުށްވެރިކުރަމުންދާއިރު އިމްރާން ވިދާޅުވީ ކޮންމެ މުސްލިމަކު އެމީހެއްގެ ދައުރު ފުރިހަމަ އަށް އަދާކުރަންވީކަމަށެވެ.
