ޑރ. މުޢިއްޒުގެ ސަރުކާރުގައި، ރައީސް ޞާލިޙް އަދި ރައީސް ޔާމީންގެ ސަރުކާރަށްވުރެ ސިޔާސީ މަޤާމުތައް މަދު

އިންތިޚާބީ ރައިސުލްޖުމްހޫރިއްޔާ ޑރ. މުހައްމަދު މުޢިއްޒުގެ ސަރުކާރުގައި ސިޔާސީ މަޤާމުތަކުގެ އަދަދު މި ސަރުކާރަށްވުރެ ދެގުނަ ދަށްކޮށްފިއެވެ.

Ads by STELCO

އިންތިޚާބީ ރައީސް މުޢިއްޒުގެ ތަރުޖަމާނު މުޙައްމަދު ފިރުޒުލް މިއަދު ބޭއްވި ނޫސްވެރިންގެ ބައްދަލުވުމެއްގައި ވިދާޅުވީ، ޑރ. މުޢިއްޒުގެ ސަރުކާރުގައި ސިޔާސީ މަޤާމުތަކާއި ގުޅޭގޮތުން އެމަނިކުފާނު މުހިންމު ނިންމެވުންތަކެއް ނިންމަވައިފިކަމަށެވެ.

އެގޮތުން، އެމަނިކުފާނުގެ ސަރުކާރުގައި ސިޔާސީ މަޤާމުތަކުގެ އަދަދު 700 އަށްވުރެ ގިނަ ނުކުރުމަށް ޑރ. މުޢިއްޒު ނިންމަވާފައިވާކަމަށް ފިރުޒުލް ވިދާޅުވިއެވެ.

"މި އަދަދު ނިންމަވާފައި މިވަނީ ސަރުކާރުގެ ވުޒާރާތަކާއި ރައީސުލްޖުމްހޫރިއްޔާގެ އޮފީހާއި, ރައީސުލްޖުމްހޫރިއްޔާގެ ގެކޮޅާއި, ނައިބު ރައީސްގެ ގެކޮޅާއި މިހުރިހާ ތަންތަނެއްގައި މަސައްކަތް ކުރައްވާ އިދާރީ މުވައްޒިފުން ހިމެނޭހެން" ފިރުޒުލް ވިދާޅުވިއެވެ.

މި އަދަދަކީ މިހާރުގެ ރައީސް، ރައީސް ޞާލިޙުގެ ވެރިކަމުގައި ސަރުކާރުގެ ސިޔާސީ މަޤާމުތަކުގެ އަދަދަށް ބަލާއިރު ދެގުނަ މަދު އަދަދެކެވެ.

"މިއަދަދަކީ މި އަދުގެ, ރައީސް އިބްރާޙީމް މުޙައްމަދު ޞާލިޙްގެ ސަރުކާރުގެ ސިޔާސީ މަޤާމުތަކުގެ އަދަދު ކަަމަށްވާ, 1063 މަޤާމަށްވުރެ މަދު އަދަދެއް. އަޅުގަނޑު މި އަދަދު ކޯޓް މިކުރަނީ ދިވެހި ދައުލަތުގެ 2023 ވަނަ އަހަރުގެ ބަޖެޓަށް ރިއާޔަތްކޮށް. އަދި ހަމައެހެންމެ, 700 މި އަދަދު މީ ރައީސް ޔާމީންގެ ސިޔާސީ މަޤާމުކަމަށް މިއަދުގެ ސަރުކާރުގެ ކުރީގެ ތަރުޖަމާނު ފާހަގަ ކުރައްވާފައިވާ 808 މި އަދަދަށްވުރެވެސް މަދު އަދަދެއް ކަމަށް ފާހަގަ ކުރަން" ފިރުޒުލް ވިދާޅުވިއެވެ.

ޑރ. މުޢިއްޒުގެ ސަރުކާރުގައި ސިޔާސީ މަޤާމުތަކުގެ އަދަދު, މި ސަރުކާރު އަދި ރައީސް ޔާމީންގެ ސަރުކާރަށްވުރެ ވެސް މަދުކަމަށްވެސް ފިރުޒުލްވަނީ ފާހަގަކުރައްވާފައެވެ.