މަޢުލޫމާތު ހުރީ ފުލުސް އޮފީހުގައި، ކޯޓުން ކުރި ޙުކުމް އިސްތިޢުނާފުކުރާނަން: ޕީޖީ
ޕްރޮސިކިއުޓާރ ޖެނެރަލް (ޕީޖީ) ގެ އޮފީހުން ކޯޓެއްގެ ހުރުމަތް ކެނޑިކަމަށް ނިންމައި، އެ އޮފީސް 10،000 ރުފިޔާއިން ޖޫރިމަނާކުރުމަށް ކޯޓުން ކުރި ޙުކުމަކީ އިންސާފުވެރި ޙުކުމެއް ނޫންކަމަށާއި، އެ މައްސަލަ ހައިކޯޓުގައި އިސްތިޢުނާފުކުރާނެކަމަށް އެ އޮފީހުން މިއަދު ވިދާޅުވެއްޖެއެވެ.
ޕީޖީ އޮފީސް ޖޫރިމަނާކޮށްފައިވަނީ ޖިނާއީ މައްސަލައަކާއި ގުޅޭގޮތުން ސ. ފޭދޫ މެޖިސްޓްރޭޓް ކޯޓުން ހާމަކުރަން އެދުނު ބައެއް މަޢުލޫމާތު ނުދިނުމާއި ގުޅިގެންނެވެ. މިދިޔަ އެޕްރީލް މަހު ފޭދޫ ކޯޓުން ނެރުއްވު އަމުރާއި އެއްގޮތަށް ޕީޖީގެ އޮފީހުން މަޢުލޫމާތު ހާމަކޮށްފައި ނުވާކަމަށާއި އޭގެ ފަހުން ދިން ދެ ފުރުޞަތުގައިވެސް މަޢުލޫމާތު ހާމަކޮށްފައިނުވާކަމަށް ކޯޓުގެ ޙުކުމުގައި ބަޔާންކޮށްފައިވެއެވެ. އެހެންކަމުން ތަކުރާރުކޮށް ކޯޓުގެ އަމުރަކަށް ތަބާނުވިކަމަށް ބަލައި، އެއީ ކޯޓުގެ ހުރުމަތް ކެނޑިކަމުގެ އަމަލެއްކަމަށް ނިންމައި، އޭގެ އަދަބެއްގެ ގޮތުން ޕީޖީ އޮފީސް 10،000 ރުފިޔާއިން ޖޫރިމަނާކުރީކަމަށް ޙުކުމުގައި ބަޔާންކޮށްފައިވެއެވެ.
މިކަމަށް ރައްދު ދެއްވައި ޕީޖީ އޮފީހުން ނެރުއްވި ބަޔާނެއްގައި ވަނީ ކޯޓުން ހޯދަށް އެދުނު މަޢުލޫމާތަކީ ދިވެހި ފުލުހުންގެ ޚިދުމަތުގައި ހުރި މަޢުލޫމާތެއްކަމަށާއި، އެ މަޢުލޫމާތު އެ އިދާރާއަށް ހުށަހަޅައިގެން ލިބޭނެކަމަށެވެ. އަދި ޕީޖީ އޮފީހުން އެއްވެސް ލިޔެކިޔުމެއް ނުފޮރުވާނެކަމަށްވެސް ބަޔާނުގައި ވިދާޅުވެފައިވެއެވެ.
އެހެންކަމުން އެފަދަ ކަމަކަށް ބަލައި ކޯޓުން ކުރި ޙުކުމަކީ އިންސާފުވެރި ޙުކުމަކަށް ނުވާތީ، ކޯޓުގެ ނިންމުން އިސްތިޢުނާފުކުރުމުގެ މަސައްކަތްކުރަމުންދާކަމަށްވެސް ބަޔާނުގައި ވިދާޅުވެފައިވެއެވެ.
މީގެ އިތުރުން މި ބަޔާނުގައި ކޯޓުތަކުގެ ހުރުމަތް ކެނޑުމުގެ އަދަބުތައް ދެވެނީ ޝަރީޢަތުގެ މަޖިލީހުގައި ހިނގާ ކަންތައްތަކަށްކަމަށާއި، ޝަރީއަތުން ބޭރުގައި ހިނގިކަމަށް މިފަދަ އަދަބެއް ދިނުމުން ސުވާލު އުފެދޭކަމަށް ވަނީ ވިދާޅުވެފައެވެ.
ސ. ފޭދޫ މެޖިސްޓްރޭޓް ކޯޓުން މަޢުލޫމާތު ހޯދުމަށް އަމުރުކޮށްފައިވަނީ ދައުލަތުގެ ހެކިވެރިންގެ ކުށުގެ ރެކޯޑާއި ހައްޔަރު ރެކޯޑެވެ. ދައުލަތުން ކުށުގެ ރެކޯޑު ކުރިން ހާމަކޮށްފައިވީނަމަވެސް، މިހައިތަނަށް ހައްޔަރު ރެކޯޑެއް ހާމަކޮށްފައެއްނުވެއެވެ. މި މަޢުލޫމާތު ހާމަކުރުމަށް ހައި ކޯޓު އަދި ސުޕްރީމް ކޯޓުންވެސް ވަނީ އަމުރުކޮށްފައެވެ.
ޕީޖީން މޮޅު ވާހަކަ ނުދައްކާ.. ޕީޖީން ކޯޓަށް ދިޔައީ ދައުލަތް ތަމްސީލު ކުރަން.. ކޯޓުން ބުނި އެ މަޢުލޫމާތަކީ އެހެން އިދާރާއަކުން ހޯދަންޖެހޭ އެއްޗަކަސް އެ ހޯދައިގެން ކޯޓަށް ދިޔުމަކީ ޕީޖީ ކުރަންޖެހޭ ކަމެެއް.