ޝަލަބީ އާއި ޝިފާގެ "އިންޑިއަން" ވެޑިންގ ޕާޓީ
ރާއްޖޭގެ މަޝްހޫރު ދެ ލަވަކިޔުންތެރިން ކަމުގައިވާ ޝަލަބީ އިބްރާހިމް އާއި ޝިފާ އިބްރާހިމް ކައިވެނި ކުރުން ވެގެން ދިޔައީ ގިނަ ބަޔަކަށް ވަރަށް ހައިރާންކަން ލިބުނު ޚަބަރަކަށެވެ. ޝަލަބީ އާއި ޝިފާއާއި ދެމެދު ގުޅުމެއްވާ ކަމުގެ އަޑުތައް ކުރިން ފެތުރުނު ނަމަވެސް، ރަސްމީކޮށް އެކަން އެނގިފައެއް ނުވެއެވެ.
މީގެ ތިން ދުވަސް ކުރިން ޝަލަބީ އާއި ޝިފާ ކައިވެނި ކުރީ ވީޑިއޯ ކޮންފަރެންސް މެދުވެެރިކޮށެވެ. އެދެމަފިރިންވެސް ކައިވެނި ކުރުމުގެ ހަފްލާ ބޭއްވީ ދިވެހި ގޮތަކަށެވެ. އެހަފްލާގައި ދެމަފިރިންގެ އާއިލާގެ އިތުރުން ބައިވެރިވީ އެމީހުންގެ ރަށްޓެހިންނެވެ.
މި ދެމަފިރިން ވަނީ އެމީހުންގެ ކައިވެނީގެ ޕާޓީ ތަފާތު ކޮށްލާފައެވެ. ކައިވެނި ޕާޓީ ބޭއްވީ "އިންޑިއަން ވެޑިންގ" ތީމަކަށެވެ.
ކައިވެނި ޕާޓީގައި ޝިފާ ހުރީ "ރޯގް ބައި ނަޖޫ" ޑިޒައިން ކޮށްފައިވާ ގަދަ ރަތް ކުލައިގެ އިންޑިއަން ޑްރެސްއެއް ލައިގެނެވެ. "ގްލޯމޯ" ގެ މޭކަޕެއްގައި ހުރިއިރު، ޝިފާގެ އަތުގައި ހީނާފަތްވެސް އަޅާފައި ހުއްޓެވެ.
ޝަލަބީ ހުރީ "ރޯގް ބައި ނަޖޫ" ޑިޒައިން ކޮށްފައިވާ ކަޅުކުލައިގެ ޖޯދްޕޫރީ ސޫޓެއް ލައިގެންނެވެ.
ޝަލަބީ އާއި ޝިފާގެ ކައިވެނި ޕާޓީގެ ބެކްޑްރޮޕް ވެސް ތައްޔާރު ކޮށްފައިވަނީ އިންޑިއާ މީހުންގެ ހަފްލާތަކުގައި ހުންނަ ކަހަލަ ގޮތަކަށެވެ.
މިކައިވެނި ޕާޓީގެ ތައްޔާރީތައް އެކުލަވާލައިގެން ވީޑިއޯ ކްރިއޭޓަރ ޝާރިގް ނެގި ވީޑިއޯ މިހާރު އޭނާ ވަނީ އިންސްޓަގްރާމްގައި ހިއްސާ ކޮށްފައެވެ. މީގެއިތުރުން ކައިވެނި ޕާޓީގައި ނެގި ބައެއް ފޮޓޯތައް "ޕްރޯލައިޓް" ސްޓޫޑިއޯ" އިން ވަނީ ހިއްސާ ކޮށްފައެވެ.
އުފާވެރި ހަޔާތަކަށް އެދެން. ދިވެހި ސަގާފަތް މުޅިން ނެތިދާނީ… ދެރަ