އަޅުގަނޑުމެން ބްރިޖް އަޅާނަން, ދައްކާނީ ވާހަކައެއް ނޫން: ރައީސް
މި ސަރުކާރުން ބްރިޖު އަޅާނެ ކަމުގެ ވައުދު ވެފައިވާނަމަ, އެ ވައުދެއް ފުއްދާނެ ކަމަށް ރައީސް ޑރ. މުހައްމަދު މުއިއްޒު މިރޭ ވިދާޅުވެއްޖެ އެވެ.
ރައީސް މިފަދައިން ވިދާޅުވީ, މާލޭގެ އާ މޭޔަރު އާދަމް އާޒިމާއި އާ ތިން ކައުންސިލަރުން ހުވާ ކުރުމަށް މިރޭ ދަރުބާރުގޭގައި ބޭއްވި ރަސްމިއްޔާތުގައި މި ސަރުކާރުގެ އުންމީދީ ރަސްމާލެއާއި މާލެ ގުޅުވާލުމަށް އަންޑަވޯޓާ ޓަނަލެއް އަޅާނެ ކަން އިއުލާނު ކުރެއްވުމަށްފަހު ދެއްކެވި ވާހަކަފުޅުގަ އެވެ.
ރައީސް ވިދާޅުވީ ކުރިއަށް އޮތް ތަނުގައި މެނިފެސްޓޯގައިވާ ގޮތުން ރާއްޖޭގެ އެކި ސަރަހައްދުތަކުގައި ބްރިޖުތަކާއި ކޯޒްވޭތައް އެޅިގެންދާ ތަން ފެންނާނެ ކަމަށާއި މިހާރު ކުރިއަށް ދަނީ އެކަމުގެ ފަންނީ މަސައްކަތްތައް ކަމަށެވެ.
"... އަޅުގަނޑުމެން އަނގަބަހަކުން އެކަނި ބްރިޖު އަޅާނީ, އަމަލީ ގޮތުން އިރާދަކުރެއްވިއްޔާ ބްރިޖު އަޅާފައި ދައްކާނަން," ސިނަމާލެ ބްރިޖު އެޅިއިރު ހައުސިން މިނިސްޓަރުކަން ކުރެއްވި ރައީސް ވިދާޅުވި އެވެ.
ރައީސްގެ މުހިންމު ވައުދެއް ކަމަށްވާ އައްޑޫ ބްރިޖު މަސައްކަތުގެ ފީސިބިލިޓީ މަސައްކަތް ނިމިފައިވާ ކަން ފާހަގަކޮށް ރައީސް ވިދާޅުވީ, އެ މަސައްކަތް ވަރަށް އަވަހަށް ކުރެހުމާއި އިންޖިނިއަރިންގެ މަސައްކަތް ނިންމައި ކޮންޓްރެކްޓަރަކާ ހަވާލުކުރެވޭނެ ކަމަށެވެ.
އައްޑޫ ބްރިޖުގެ މަސައްކަތް މި ދައުރު ނިމުމުގެ ކުރިން ނިންމާނެ ކަމުގެ ޔަގީންކަން ރައީސް މިރޭ ދެއްވެވި އެވެ.
