ރައީސަކީ ލާމަރުކަޒީ ނިޒާމުގެ ޗެމްޕިއަނެއް: އާދަމް ޝަރީފް
ރައީސް ޑރ މުހައްމަދު މުއިއްޒަކީ ލާމަރުކަޒީ ނިޒާމުގެ ޗެމްޕިއަނެއް ކަމަށް މިނިސްޓާ އޮފް ސިޓީސް، ލޯކަލް ގަވަމަންމަންޓް އެންޑް ޕަބްލިކް ވާކްސް އާދަމް ޝަރީފް ވިދާޅުވެއްޖެއެވެ.
މާލެ ސިޓީގެ ކައުންސިލަށް އަލަށް އިންތިހާބުވި ތިން ކައުންސިލް މެމްބަރުންނާއި މޭޔަރު ހުވާކުރުމަށް ބޭއްވި ރަސްމިއްޔާތުގައި އާދަމް ޝަރީފް ވިދާޅުވީ، އެ ރަސްމިއްޔާތަށް ރައީސް ވަޑައިގެންނެވުމަކީ މަލްޓި ޕާޓީ ނިޒާމުގެ ތެރެއިން ވެރިކަމެއް ކުރަމުންދާއިރު އާއި ލާމަރުކަޒީ ނިޒާމުގެ ތެރެއިން މަސައްކަތްކުރައްވަމުން ގެންދަވާ ކައުންސިލަރުންނަށް ރީތި ނަމުނާއެއް ކަމަށެވެ.
ރާއްޖޭގެ ވެރިކަމުގައި މިއަދު ހުންނެވީ ލާމަރުކަޒީ ނިޒާމަށް ތަޖުރިބާ އާއި އެކީގައި ފުރިހަމަޔަށް ތައްޔާރުވެވަޑައިގެން ހުންނެވި އެއް ޗެމްޕިއަންކަން ހޯއްދެވުމަށް ފުރާ ފުރިހަމަވެފައި ހުރި ވެރިއެއް.
އާދަމް ޝަރީފް ވިދާޅުވީ ރައީސް މުއިއްޒު، މާލޭގެ މޭޔަރުކަމުގައި ހުންނެވިއިރު މާލެއަށް ހެޔޮބަދަލުތަކެއް ގެންނަވާފައިވާ ކަމަށެވެ. ވެރިކަމަށް ރައީސް މުއިއްޒު އިންތިހާބުވި އެއް ސަބަބަކީވެސް މާލެއަށް ގެނައި ހެޔޮ ބަދަލުތައް ކަމަށްވެސް ވިދާޅުވިއެވެ. ''މާލޭގެ ރައްޔިތުން މަގުމަތިވެދިޔަކަށް ރައީސް ނުދެއްވާނެ'' އާދަމް ޝަރީފް ވިދާޅުވިއެވެ.
މިނިސްޓަރު ވިދާޅުވި ގޮތުގައި އިދިކޮޅު އެމްޑީޕީގެ ފަރާތުން މާލޭގެ މޭޔަރުކަމަށް އިންތިހާބުވެވަޑައިގެންނެވި އާދަމް އާޒިމްގެ ފަރާތްޕުޅުން ރައްޔިތުން ދެކޭ އުއްމީދަކީ ސަރުކާރާ ގުޅިގެން މަސައްކަތްކުރުން ކަމަށެވެ. އަދި ރައީސް 'ހިންގެވި މަގުން' އާޒިމްވެސް މަސައްކަތްކުރައްވާނެ ކަމަށް އުއްމީދު ކުރައްވާނެ ކަމަށް ވިދާޅުވިއެވެ.
އާދަމް ޝަރީފް ވިދާޅުވީ، ލާމަރުކަޒީ ނިޒާމުން ރާއްޖެ ހިންގުމަށް ތައްޔާރުވަމުން އަންނައިރު ލިބިވަޑައިގެންނަވާ އެންމެ ބޮޑު އުފަލަކީ ކައުންސިލްތައް ބާރުވެރިކުރުވުމަށް ސަރުކާރުން ގެންގުޅޭ ސިޔާސަތުތުގެ ދަށުން ހެޔޮ ބަދަލުތަކެއް ފެންނަމުން އަންނަ ކަމަށެވެ.
''ކައުންސިލްތަކަށް ބޭނުންވާ ކަންތައްތައް ފުރިހަމައަށް ކޮށްދިނުމުގައި އިރާދަކުރެެއްވިއްޔާ ހެޔޮ ބަދަލުތަކެއް ރައީސްގެ ޒައާމަތުގައި ވޭތުވެދިޔަ މަދު ދުވަސްކޮޅުގެ ތެރޭގައި ގެންނެވިކަން މިއީ އަޅުގަނޑުމެން އެންމެން އުފާކުރަން ޖެހޭ ކަމެއް'' މިނިސްޓަރު ވިދާޅުވިއެވެ.
އާދަމް ޝަރީފް ވިދާޅުވި ގޮތުގައި ބައްދަލުވި ކައުންސިލްތަކުން އެންމެ ބޮޑަށް އެދިފައިވަނީ އެ ކައުންސިލްތައް ބާރުވެރިވެގެން ދިޔުން ކަމަށެވެ. އަދި މާލީ ގޮތުން ތަނަވަސްކަން ލިބޭނެ ގޮތެއްގެ މަތިން ކަަންކަން ކުރެވޭނެ ނިޒާމެއް ފަހިކޮށްދިނުން ކަމަށެވެ. އެކަން ފަހިކޮށްދިނުމަށްޓަކައި ރައީސް މުއިއްޒު ވަނީ ކައުންސިލްތަކަށް އާމްދަނީ ލިބޭނެ ގޮތުގެ އިންތިޒާމު ހަމަޖެއްސުމަށްޓަކައި ވަޒީރުންގެ މަޖިލީހުގައި މަޝްވަރާކުރައްވާފައެވެ.އެ ނިންމުމާއި އެކު ކޮންމެ ކައުންސިލަކަށް ބޭނުންވާ ފަޅުރަށެއް މިހާރު ވަނީ ހަމަޖައްސާފައެވެ.
''ލާމަރުކަޒީ ނިޒާމުގެ ޗެމްޕިއަންކަން ރައީސް އެހެރީ ހޯއްދަވާފައި'' ރައީސް އަށް ތައުރީފް ކުރައްވަމުން މިނިސްޓަރު ވިދާޅުވިއެވެ.
