ކެނދިކުޅުދޫ ހޮސްޕިޓަލަށް ފައިސާ ހަމަޖެއްސީ މި ސަރުކާރުން، ސޯލިހު ހެއްދެވީ އިތުރުފުޅެއް: ހަލީލް
ނ. ކެނދިކުޅުދޫ ހޮސްޕިޓަލް އެޅުމަށް ފައިނޭންސް ހަމަޖެއްސީ އެމަނިކުފާނުގެ ސަރުކާރުގައި ކަމަށް ވިދާޅުވެ ކުރީގެ ރައީސް އިބްރާހިމް މުހައްމަދު ސޯލިހު ހެއްދެވި އިތުރުފުޅެއް ކަމަށް ސަރުކާރުން ބުނެފިއެވެ.
ރައްޔިތުންގެ މަޖިލީހުގެ އިންތިހާބުގެ ކެމްޕޭނަށް މިވަގުތު ނ. އަތޮޅަށް ކުރައްވަމުންދާ ދަތުރުގައި ކެނދިކުޅުދޫ އަށް ވަޑައިގެން އެ ރަށު ހޮސްޕިޓަލް އަޅަމުންދާ ސަރަހައްދުގައި ވާހަކަފުޅު ދައްކަވަމުން ސޯލިހު ވަނީ ހޮސްޕިޓަލުގެ މަސައްކަތް ވީހާވެސް އަވަހަށް ނިންމައި ދޭން ސަރުކާރަށް ގޮވާލައްވާފައެވެ. މދިޔަ ފަސް އަހަރު ވެރިކަމުގައި ހުންނެވި ސޯލިހު ވިދާޅުވީ އެ މަޝްރޫއުއަށް ބޭނުންވާ ފައިސާ، ބޭންކު އޮފް މޯލްޑިވްސް މެދުވެރިކޮށް ހަމަޖައްސާފައި ވާނެ ކަމަށެވެ.
"ފައިސާ ވެސް ހުންނާނެ އެކަމަށް ހަމަޖެހިފައި. ބޭންކް އޮފް މޯލްޑިވްސް އިން ފައިސާ ހޯދާފައި އަޅުގަނޑުމެން މި މަސައްކަތް ފެށީ'' އިދިކޮޅު އެމްޑީޕީގެ އެޑްވައިޒަރުގެ މަގާމުވެސް ފުރުއްވަމުން ގެންދަވާ ސޯލިހު ވިދާޅުވިއެވެ.
''ހަމަ ހުސް ދޮގެއް، ހަމަސް ހުސްދޮގެއް''ރ. އަތޮޅަށް، ރައީސް ޑރ މުހައްމަދު މުއިއްޒު ކުރައްވަމުން ގެންދަވާ ދަތުރުފުޅުގައި އެމަނިކުފާނާ އެކު ބައިވެރިވެވަޑައިގަންނަވާ ހެލްތު މިނިސްޓަރު ޑރ އަބްދުﷲ ހަލީލް މީދޫ ރައްޔިތުންނާ ވާހަކަ ދައްކަވައި ވިދާޅުވިއެވެ.
ހަލީލް ވިދާޅުވީ ކެނދިކުޅުދޫ ގައި 30 އެނދުގެ އާ ހޮސްޕިޓަލެއް އިމާރާތް ކުރުމަށް މިދިޔަ އަހަރުގެ ޖެނުއަރީ މަހުގެ ފަސް ވަނަ ދުވަހު ފައިނޭންސިންގެ އުސޫލުން ބަޔަކާއި ހަވާލުކުރެވުނެ ކަމަށެވެ. ނަމަވެސް ފައިސާ ހަމަޖެހޭނެ އެއްވެސް ގޮތެއް ކޮންޓްރެކްޓަރުންނަށް ހޯދިފައިނުވާ ކަމަށެވެ.
''އަޅުގަނޑުމެން ހަމަޖައްސައިދިނީ، މި ސަރުކާރުން، ރައީސް ހަމަޖައްސައިދެއްވީ'' ހުއްޓިފައި ހުރި ހުރިހާ މަޝްރޫއުތައް ކުރިއަށް ގެންދިޔުމަކީ ރައީސް މުއިއްޒު ވަރަށް ބޮޑަށް ބޭނުންފުޅުވެވަޑައިގަންނަވާ ކަމެއް ކަމަށް ވިދާޅުވިއެވެ.
ހަލީލް ވިދާޅުވީ ކުރީ ސަރުކާރުން އެ މަޝްރޫއުއަށް ކަނޑައެޅީ 193 ތިން މިލިއަން ރުފިިޔާގެ ކަމަށާއި ނަމަވެސް 135 މިލިއަން ރުފިޔާއަށް އެވަރުގެ ހޮސްޕިޓަލެއް އެޅޭނެ ކަމަށް ތަޖުރިބާކާރުން ލަފާދިފައިވާ ކަމަށެވެ. ކެނދިކުޅުދޫ ހޮސްޕިޓަލަށް މިއަހަރުގެ ޑޮމެސްޓިކް ބަޖެޓުން 3.9 މިލިއަން ރުފިޔާ ހިމަނާފައިވާއިރު އަންނަ އަހަރަށް ލަފާކޮށްފައިވާ ބަޖެޓުގައި ހިމަނާފައިވަނީ ފަސް މިލިއަން ރުފިޔާއެވެ.
