ކެނދިކުޅުދޫ ކައުންސިލުން ރައީސަށްކުރާ ތުހުމަތުތައް ތަހުގީގުކުރަން ޖެހޭ: ޔާމީން

ރައީސް ޑރ މުހައްމަދު މުއިއްޒު، ނ. ކެނދިކުޅުދޫ އަށް މި ދޭތެރެއިން ކުރެއްވި ރަސްމީ ދަތުރުފުޅުގައި ދައުލަތުގެ ވަސީލަތްތައް ބޭނުންކުރެއްވި ކަމަށް ބުނެ އެ ރަށު ކައުންސިލުންކުރާ ތުހުމަތުތައް ތަހުގީގުކުރަން ޖެހޭ ކަމަށް ކުރީގެ ރައީސް އަބްދުﷲ ޔާމީން ރޭ ވިދާޅުވެއްޖެއެވެ.

Ads by STELCO

ރައީސް އެ ރަށަށް ކުރެއްވި ދަތުުރުފުޅުގައި ސަރުކާރު ނިސްބަތްވާ ޕީޕީއެމް/ޕީއެންސީ ކެނޑިޑޭޓަށް ކެމްޕޭނު ކުރެއްވި ކަމަށާއި އަދި ދައުލަތުގެ އިދާރާތަކުގެ ނަހަމަ ބޭނުންހިފި ކަމަށް ބުނެ އެމްޑީޕީ މެމްބަރުން ހިމެނިވަޑައިގަންނަވާ ކެނދިކުޅުދޫ ކައުންސިލުން ބަޔާނެއް ނެރުނެވެ. އެ ބަޔާން ބާތިލުކުރަން ކައުންސިލުގެ ބެލެނިވެރިފަރާތް، ލޯކަލް ގަވަމެންޓް އޮތޯރިޓީ (އެލްޖީއޭ) އިން ކައުންސިލަށް އެންގިއެވެ. އެކަމަކު އެ ބާތިލުކުރަން ޖެހޭ ސަބަބެއް ނެތް ކަމަށް ބުނެ ކައުންސިލުން ވަނީ ދެކޮޅު ހަދާފައެވެ. އެލްޖީއޭއާ ކައުންސިލާ ދެމެދު އަރާރުންތަކެއްގެ ތެރޭގައި އޮއްވައި، ބަޔާން ބާތިލުކުރަން އެލްޖީއޭ އަށް އެންގިދާނެ ކަމަށް ގަބޫލުނުކުރައްވާ ކަމަށް ދާދި ފަހުން ބޭއްވި ނޫސްވެރިންގެ ބައްދަލުވުމެއްގައި ބަންޑާރަ ނައިބު އަހުމަދު އުޝާމް ވިދާޅުވެފައިވެއެވެ.

ޕީޕަލް ނޭޝަނަލް ފްރޮންޓް (ޕީއެންއެފް) އިން ސިލްސިލާކޮށް ބާއްވަމުންދާ ބައްދަލުވުމުގެ ތެރެއިން ރޭގެ ބައްދަލުވުމުގައި ވާހަކަފުޅު ދައްކަވަމުން މި ވަގުތު ގޭބަންދުގައި ހުންނެވި ޔާމީން ވިދާޅުވީ އެލްޖީއޭއިން، ބަޔާން ބާތިލުކުރަން އެންގުމުގެ ކުރިން ކައުންސިލުންކުރާ ތުހުމަތުތައް ބަލަން ޖެހޭ ކަމަށެވެ.

''ލޯކަލް ގަވަމެންޓް މިނިސްޓްރީން އެކަން ކުރައްވާފައެއް ނެތް، އެކަން ކުރެއްވިނަމަ ބަންޑާރާ ނައިބު އެހެން ވިދާޅުވާނެ ކަމެއް ނޭގެ، އަޅުގަނޑުމެން މި ތަނުން ކާކަށްތޯ އިތުބާރު ކުރަންވީ؟ ބަންޑާރަ ނައިބަށްތޯ ލޯކަލް ގަވަމެންޓް މިނިސްޓްރީއަށްތޯ، މިއީ ފިޔަވަޅު ނާޅައި ދޫކޮށްލެވިގެންވާނެ ކަމެއް ނޫން'' ޔާމީން ވިދާޅުވިއެވެ.

ބަޔާން ބާތިލުކުރަން އެލްޖީއޭއަށް ނޭންގޭނެ ކަމަށް ކަމަަށް އޭޖީ ވިދާޅުވި ވާހަކައަށް އިޝާރާތްކުރައްވާ ޔާމީން ވިދާޅުވީ އެ ވާހަކަައިން އެމަނިކުފާނަށް ފަހުމްވެވަޑައިގެންނެވީ، އޭޖީވެސް އެ ވިދާޅުވީ ރައީސް ކުރެއްވި ދަތުރުފުޅު ތަހުގީގުކުރައްވަން ޖެހޭކަން ކަމަށެވެ.

''މިކަން ނިމޭއިރު އެބަޖެހޭ ކެނދިކުޅުދޫ ކައުންސިލުން ދެއްކި ވާހަކަ ތަހުގީގުކުރަން. ނޫންނަމަ ބަންޑާރަ ނައިބު ވިދާޅުވާން އެބަޖެހޭ ރައީސް ކުރެއްވި ކަންތައް، ކެނދިކުޅުދޫއިން ތުހުމަތުކުރި ކަންތައް އެ ދަތުރުފުޅުތައް މި ސަރުކާރުން ތަހުގީގުކޮށްފާނެތޯ؟'' އެ ވަގުތު ވާހަކަ ދައްކަމުން ގެންދިޔަ ކެނޑިޑޭޓާ ޔާމީން ސުވާލުކުރެއްވިއެވެ.

މިހާރު ވެރިކަމުގައި ތިއްބެވި ބޭފުޅުންނަކީ، ކުރީގެ ރައީސް އިބްރާހިމް މުހައްމަދު ސޯލިހު ކެމްޕޭނު ދަތުރުފުޅުތަކުގައި ދައުލަތުގެ ވަސީލަތްތައް ނަހަމަ ގޮތުގައި ބޭނުންކުރުމުން އެކަމާއި ދެކޮޅަށް އެންމެ ބޮޑަށް ވަކާލާތު ކުރެއްވި ބޭފުޅުންނަށް ވާއިރު މިއަދު އެ ބޭފުޅުން ނަމޫނާ ދައްކަން ޖެހޭ ކަމަށް ވިދާޅުވިއެވެ.