އިންތިހާބުން ފުރުސަތެއް ހޯދަން ހުށަހެޅި މައްސަލަ ހައި ކޯޓުން ބަލައެއް ނުގަތް!
ރައްޔިތުންގެ މަޖިލީހުގެ އިންތިހާބުގައި ވާދަކުރުމުގެ ފުރުސަތު ހޯދުމަށް ހިތަދޫ މެދު ދާއިރާގެ މެންބަރު އަހުމަދު ރަޝީދު (ޗެކްމާކް ރަޝީދު) ހައި ކޯޓަށް ހުށަހެޅި މައްސަލަ ބަލައި ނުގަތުމަށް ނިންމައިފި އެވެ.
ރަޖިސްޓްރާ މަރިޔަމް ހޫރުޝީދާ ނިންމަވާފައި ވަނީ އިންތިހާބަށް ކުރިމަތިލުމަށް ހުށަހަޅާ ހުށަހެޅުންތަކާ ގުޅޭ ގޮތުން އިލެކްޝަން ކޮމިޝަނުން ނިންމާ ނިންމުންތަކާ ގުޅޭ މައްސަލަތައް ހުށަހަޅަން ޖެހޭނީ ސުޕްރީމް ކޯޓަށް ކަމުން ހައިކޯޓުން އެ މައްސަލަ ބެލިދާނެކަމަށް ނުފެންނަ ކަމަށެވެ.
ރަޝީދު މަޖިލިސް އިންތިހާބުގައި ވާދަނުކުރަން ނިންމެވީ ފެބްރުއަރީ 17ގަ އެވެ. އެއީ އަމިއްލަ ސަބަބުތަކަށްޓަކާ ކަމަށް އޭނާ އޭރު ވިދާޅުވި އެވެ.
އެނގިފައިވާ ގޮތުގައި ރަޝީދު އަލުން ވާދަކުރަން ހުށަހެޅުއްވީ އިންތިހާބު ބާއްވާ ތާރީހަށް ގެނައި ބަދަލާ ގުޅިގެންނެވެ.
އެންމެ ފުރަތަމަ އިންތިހާބު ބާއްވާނެ ތާރީހެއް ކަމުގައި ކަނޑައަޅާފައި އޮތީ މާޗު 17 އެވެ.
އެއީ ރޯދަމަހުގެ ތެރެކަމަށް ވާތީ، މަޖިލީހުން ވަނީ ރޯދަމަހު އެއްވެސް އިންތިހާބެއް ނުބޭއްވޭ ގޮތަށް ގާނޫނަށް ބަދަލު ގެނެސްފަ އެވެ. މިހާރު އިންތިހާބު ބާއްވާނެ ތާރީހެއްކަމުގެ ކަނޑައަޅާފައި އޮތީ އޭޕްރީލް 21 އެވެ.
ހިތަދޫ މެދު ދާއިރާއަށް މިހާރު ވާދަކުރާ ކެންޑިޑޭޓުންނަކީ އިދިކޮޅު އެމްޑީޕީގެ ކެންޑިޑޭޓު އަދި އައްޑޫ ސިޓީގެ ޑެޕިއުޓީ މޭޔަރު އަހުމަދު ޝުއާއު އާއި، ވެރިކަންކުރާ ޕީއެންސީގެ ކެންޑިޑޭޓު އަހުމަދު އަޒާން އެވެ.
އިންތިޚާބް ލަސް ކުރުމާއި ގުޅިގެން ވޯޓާސް ލިސްޓަށް ބޮޑެތި ބަދަލުތަކެއް އަންނަ އުސޫލުން އަހުމަދު ރަސީދަށްވެސް ފުރުސަތު ލިބެން ވާނެ ސަރުކާރުން މިހާރު ކޯޓްތަކަށް އަށް ބާނަމުން ދުވަނީ