މި ސަރުކާރަކުގެ އެއްވެސް ޕްލޭނެއް ނެތް: ސޯލިހު
ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ސަރުކާރުން ވެރިކަމަށް އައީ ނުފުއްދޭ ދޮގު ވައުދުތަކެއް ވެވަޑައިގެން ކަމަށާއި، ސަރުކާރަކު އެއްވެސް ޕްލޭނެއް ނެތް ކަމަށް ފާއިތުވި ފަސް އަހަރު ވެރިކަމުގައި ހުންނެވި ރައީސް އިބްރާހިމް މުހައްމަދު ސޯލިހު ވިދާޅުވެއްޖެ އެވެ.
އޭޕްރީލް މަހު ބާއްވާ ރައްޔިތުންގެ މަޖިލިސް އިންތިހާބުގައި އެމްޑީޕީއިން ވާދާކުރައްވާ ތިން ކެންޑިޑޭޓުންނާ އެކު ރޭ ބޭއްވި ތަރާވީސް ޖަލްސާގައި ވާހަކަ ދައްކަވަމުން ރައީސް ސޯލިހު ވިދާޅުވީ މި ސަރުކާރުން ސިޔާސަތުތައް ބައްޓަންކުރުމުގައި އެއްވެސް ޕްލޭނެއް ނެތް ކަމަށެވެ.
"އަޅުގަނޑު މި ދަންނަވަނީ މި ސަރުކާރަކު އެއްވެސްކަހަލަގެ ޕްލޭނެއް ނެތޭ ސިޔާސަތުތައް ބައްޓަންކުރުމުގައެއް. އެހެން ނަމަކަ އެ ފުށިދިއްގަރު ފަޅު މިހާރު ހުއްޓިފައެއް ނޯންނާނެ." ސޯލިހު ވިދާޅުވި އެވެ.
ރައީސް މުއިއްޒު ވެރިކަމަށް ވަޑައިގެން ކުރެއްވި ކަމަކީ ރައްޔިތުން އެކަންކަމަކަަށް ބޭނުންޖެހިފައި ތިބި ބިޔަ މަޝްރޫތައް އިއުލާންކުރެއްވުން ކަމަށެވެ. އެގޮތުން ފުށިދިއްގަރު ފަޅުން ބިޔަ ބިމެއް ހިއްކުމާއި، އެއާޕޯޓު ތަރައްގީކުރުުމުގެ މަޝްރޫ އާއި، ގދ. ތިނަދޫ އަދި ގއ. ވިލިނގިލީގައި އަޅަން އިއުލާނުކުރި އެއާޕޯޓުގެ ވާހަކަ ސޯލިހު ފާހަގަކުރި އެވެ.
"އަޅުގަނޑު ހިތުން ރައީސް ޑރ. މުއިއްޒު ހީފުޅުކުރައްވަނީކަންނޭނގެ ރައްޔިތުންނަކީ އެހާ ގަމާރު ބައެކޭ. ނޫން އެހެނެއް ނޫން މިއަދު ދިވެހި ރައްޔިތުން ތިބީ. އެ ދައްކަވަނީ ކޮން ވާހަކައެއްކަން އެ ހަދަނީ ދޮގުކަން ވަރަށް ސާފުކޮށް އެބަ އެނގޭ" ސޯލިހު ވިދާޅުވި އެވެ.
ސޯލިހު އިތުރަށް ވިދާޅުވީ ރައީސް މުއިއްޒު ހަރުދަނާ އިގްތިސާދީ ފިޔަވަޅުތައް ކަމަށް ވިދާޅުވެ، ކުރައްވާ ހަމައެކަނި ކަމަކީ އެތައް ޕްރޮޖެކްޓެއް ހުއްޓާލުން ކަމަށެވެ. މިހާތަނަށް 1700 ޕްރޮޖެކްޓު ހުއްޓާލިކަމަށް ވިދާޅުވި އެވެ.
