ފައިސަލްގެ ދިފާއުގައި ގިނަ ބަޔަކު ނުކުމެއްޖެ!

ކުރީގެ ނައިބް ރައީސް ފައިސަލް ނަސީމް އަށް އެމަނިކުފާނުގެ ކޮއްކޯފުޅު ނަޒްރާ ނަސީމް (ނަޒޫ) ގެ ފިރިކަލުން އަހުމަދު މަހުލޫފް ކުރި ތުހުމަތުތަކާއި ގުޅިގެން، ފައިސަލް ދިފާއުކޮށް ގިނަ ބަޔަކު ސޯޝަލް މީޑިއާގައި ވާހަކަ ދައްކަން ފަށައިފިއެވެ.

Ads by Hajj Corporation

ފުވައްމުލަކު ދެކުނު ދާއިރާއަށް އެމްޑީޕީގެ ޓިކެޓުގައި ވާދަކުރި ނަޒޫ އާ ދެކޮޅަށް ފައިސަލް އެންޓި ކެމްޕޭނުކުރި ކަމަށް ބުނެ ކުރީގެ ޔޫތް މިނިސްޓަރު މަހުލޫފް އެމްޑީޕީގެ ވަޓްސް އެޕް ގްރޫޕަކަށް ފޮނުވާފައިވާ މެސެޖެއްގެ ސްކްރީން ޝޮޓެއް އިއްޔެ ވަނީ އާއްމުވެފައެވެ. ނަޒޫއާ ދެކޮޅަށް ފައިސަލް އެންޓި ކެމްޕޭނުކުރި ކަމަށް ބުނާ މައްސަލަ ބަލަން އެމްޑީޕީއަށް ހުށަހަޅާނެ ކަމަށްވެސް މަހުލޫފް ވިދާޅުވެފައިވެއެވެ.

އެ ތުހުމަތުތަކަށް އެންމެ ފުރަތަމަ ރައްދު ދިނީ ފައިސަލްގެ ކޮއްކޮ ހައިދަރު ނަސީމްއެވެ. ފޭސްބުކް ގައި ކުރި ޕޯސްޓެއް ގައި ހައިދަރު ބުނީ, އޭނާގެ ބޭބެއާ ގުޅުވާ ސޯޝަލް މީޑިއާގައި ބަދު ބަސް ބުނެ އަބުރަށް ހުތުރުވާ ވާހަކަ ދެއްކުން ބަލައިނުގަންނަ ކަމަށެވެ.

''ބޭބެ ފައިސަލް އަކީ އާއިލާގެ އެންމެންނަށްވެސް ދިމާވާ ކޮންމެ ކަމެއްގައިވެސް އެހީތެރިވާ އޯގާތެރިވާ މީހެއް'' ހައިދަރު ބުންޏެވެ.

އެ ޕޯސްޓަށް ކޮމެންޓުކުރި ގިނަ ބަޔަކު ސިފަކުރި ގޮތުގައި މަހުލޫފް މަސައްކަތްކުރަމުންދަނީ ފައިސަލްގެ  އަގުވައްޓާލުމުގެ މަސައްކަތެވެ. ފައިސަލް ނިސްބަތްވާ ފުނާޑު އަވަށުގެ ގިނަ އަދެއްގެ ބަޔަކު ދަނީ އެ މީހުން ތިބީ ފައިސަލްއާ އެކު ދެއްކުމުގެ ގޮތުން ސޯޝަލް މީޑިއާގައި ފޯސްޓުތައް ޖަހަމުންނެވެ.

ފައިސަލްގެ ކޮއްކޮ ސަފޫރާ ނަސީމް ބުނީ ''ބޭބެ އަކީ ބެސްޓު ކަމަށެވެ.''

މިއުޒިކް ކުޅުމުގައި ހަރަކާތްތެރިވާ ސަަފޫރާ އޭނާގެ ޕޭޖްގައި ކުރި ޕޯސްޓެއްގައި ވަނީ މަހުލޫފްގެ ވާހަކަ ދޮގުކޮށްފައެވެ.

''މަހުލޫފް ތި ހަދަނީ ދޮގު، ބޭބެ (ފައިސަލް) އަށް އެޓޭކް ކުރުން ހުއްޓާލާ'' ސަފޫރާ ބުންޏެވެ.

މަހުލޫފް 'އެކްސް' ގައި ލިޔެފައިވާ ޕޯސްޓަކަށް ފައިސަލްގެ ކޮއްކޮ ހައިބަރު ނަސީމް ކޮމެންޓުކުރަމުން ބުނީ، ފައިސަލް، ނަޒޫއާ ދެކޮޅަށް އެންޓި ކެމްޕޭނު ކޮށްފައިނުވާނެ ކަމަށެވެ.

''އެއީ އެންމެ ބަރާބަރު ޅިޔަނު'' ހައިބަރުގެ އަންހެނުން ޝިމްތާ މިންތާޒް ކުރި ކޮމެންޓުގައި ބުންޏެވެ.

ފުވައްމުލަކު ދެކުނު ދާއިރާއަށް އިންތިހާބުވި މެންބަރު އިބްރާހިމް ހުސެއިން (އިއްބެ) ގެ ކެމްޕޭނުގައި އިސްކޮޅު އުޅުނު މީހަކު ފޭސްބުކް ގައި ކުރި ޕޯސްޓެއްގައި ބުނީ، ފައިސަލް އަކީ ދިވެހި ތާރީހް މިހާތަނަށް ދުށް އެންމެ ހިންގުންތެރި ރައްޔިތުންނަށް އޯގާތެރި ހިތްހެޔޮ އެންމެންގެ ލޯތްބާއި އިހްތިރާމް ލިބިފައިވާ ބޭފުޅާ ކަމަށެވެ.

''އެބޭފުޅާގެ އަގުހުރި ގައުމީ ހިދުމަތް މުޅި ދިވެހި އުއްމަތް ފަހުރުވެރި ކަމާއެކު ބަލާގަނޭ'' ކައްޗޭ ނަމަކަށް ކިޔާ އައިޑީ އަކުން ކުރި ޕޯސްޓެއްގައި ބުންޏެވެ.

ނައިބް ރައީސަކަށް ފައިސަލް ހުންނެވިއިރު ހިލާލީގޭގެ ކަންތައްތައް ބަލަހައްޓަން އުޅުނު ސާއިމް މޫސާ ޓްވިޓާގައި ކުރި ޕޯސްޓެއްގައި ބުނީ، އެއްވެސް މީހަކަށް ވޯޓް ނުދިނުމަށް ފައިސަލް އެދިފައިނުވާ ކަމަށެވެ.

 ''ފެނިގެން ދިޔައީ އެންޓި ކެމްޕެއިންނާއި ދެކޮޅު ބޭފުޅެއްގެ ގޮތުގައި'' ސާއިމް ބުންޏެވެ.

މަހުލޫފް ވިދާޅުވީ ގޮތުގައި ނަޒޫއާ ފައިސަލްއާ ދެމެދު މައްސަލަ ފެށުނީ ރިޔާސީ އިންތިހާބުގައި ރައީސް އިބްރާހިމް މުހައްމަދު ސޯލިހުގެ ރަނިން މޭޓަކަށް ރައްޔިތުންގެ މަޖިލީހުގެ ހިތަދޫ އުތުރު ދާއިރާއަށް މެންބަރު މުހައްމަދު އަސްލަމް ހަމަޖެއްސި ހިސާބުންނެވެ.

މިކަމާއި ގުޅޭ ގޮތުން އަދި މިހާތަނަށް ފައިސަލް އެއްޗެއް ވިދާޅުވެފައެއް ނުވެއެވެ.