ސަރުކާރުގެ ތާއިދާ އެކު ހޮވުނު ހަ މެންބަރުން ޕީއެންސީއަށް

އާދިއްތަ ދުވަހު ބޭއްވި ރައްޔިތުންގެ މަޖިލީހުގެ އިންތިހާބުގައި ސަރުކާރުގެ ތާއިދާއެކު މަޖިލީހަށް އިންތިހާބުވެވަޑައިގެންނެވި ހަ މެންބަރަކު ޕީއެންސީ އަށް ސޮއިކޮށްފިއެވެ.
އެ މެމްބަރުންނަކީ
- ޔާސީން އަބްދުﷲ (ނައިފަރު ދާއިރާ)
- އަހްމަދު ޒަމީރު (މައްޗަންގޮޅި މެދު ދާއިރާ)
- އަހުމަދު ރިޔާޒް (ތިމަރަފުށި ދާއިރާ)
- ހަސަން ޒަރީރު (މަތިވެރި ދާއިރާ)
- ޢާޒިމް ޢަބްދުލް އަޒީޒް (ވިލިނގިލި ދާއިރާ) / މި ދާއިރާއަށް ޕީއެންސީގެ ޓިކެޓުގައި ޔަޒްމީދު މުހައްމަދު ވާދަކުރެއްވިއެވެ. ނަމަވެސް އޭނާ އަށް ވަނީ އިންތިހާބު ނާކާމިޔާބުވެފައެވެ.
- ޑރ. އަނާރާ ނައިމް (ހުރާ ދާއިރާ)
ޕީއެންސީ/ޕީޕީއެމް ޓިކެޓުގައި މަޖީލިސް އިންތިހާބު ކާމިޔާބު ކުރީ 66 ކެންޑިޑޭޓުންނެވެ.
ޖުމްހޫރީ ޕާޓީގެ ލީޑާރު ގާސިމް އިބްރާހިމް އާއި އެމްޑީއޭގެ ލީޑަރު އަހުމަދު ސިޔާމް އަދި އެމްއެންޕީގެ ރައީސް މުހައްމަދު ނާޒިމް (ކާނަލް ނާޒިމް) ވާދަކުރި ދާއިރާތަކަށް ޕީއެންސީން ވާދައެއް ނުކުރެއެވެ. ސަރުކާރުން ތާއިދުކުރީ މި ތިން ސިޔާސީ ލީޑަރުންނަށެވެ. ވެލިދޫ ދާއިރާއަށް ޕީއެންސީގެ ޓިކެޓުގައި ކެންޑިޑޭޓަކު ވާދަކުރި ނަމަވެސް އެމްޑީއޭގެ ޓިކެޓުގައި އިންތިހާބުވި މުހައްމަދު އައްބާސް އަށް ސަރުކާރުން ތާއިދުއޮތެވެ. ރޭ ޕީއެސްއެމްގައި ވާހަކަ ދައްކަވަމުން ސަރުކާރުގެ އިސް ވަޒީރު އަބްދުއްރަހީމް އަބްދުﷲ ވިދާޅުވީ މަޖިލީހުގައި ޖުމްލަ 80 މެންބަރަކު ސަރުކާރާއެކު މަސައްކަތްކުރާނެ ކަމަށެވެ. ''އެހެންވީމަ އަޅުގަނޑު ގަބޫލުކުރަނީ 80 މައްޗަށް އަޅުގަނޑުމެންގެ އަދަދު ހިނގައިދާނެ'' ފޮނަދޫ ދާއިރާއަށް އިންތިހާބުވެވަޑައިގެންނެވި އަބްދުއްރަހީމް ވިދާޅުވިއެވެ. އަބްދުއްރަހީމް ވިދާޅުވި ފަދައިން 80 މެންބަރުން ސަރުކާރާއެކު ތިބޭނެނަމަ މަޖިލީހުގައި ސަރުކާރާ ދެކޮޅަށް ތިބޭނީ ވާދަވެރި އެމްޑީޕީގެ 12 މެންބަރުންގެ އިތުރަށް އަމިއްލަ އެންމެ މެންބަރެކެވެ.



ކޮމެންޓް
މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.