މަސައްކަތުގެ ބުރަ ކުޑަކުރަން އަޑު އުފުލައިފި

މަސައްކަތުގެ މާހައުލުގައި، މަސައްކަތްތެރިންނަށް އުފުލަން ޖެހޭ ބުރަ ކުޑަކޮށް ދިނުމަށާއި، މަސައްކަތްތެރިންގެ ހައްގުތައް ރައްކާތެރި ކުރުމަށް ގޮވާލައި އަޑު އުފުލައިފިއެވެ.
މިއަދު ފާހަގަކުރަމުންދާ މަސައްކަތްތެރިންގެ ދުވަސް (މޭޑޭ) އާ ގުޅިގެން މާލޭ ގައި ރެލީއެއް ބޭއްވިއެވެ. ހަވީރު 4:30 އެހާކަށްހާއިރު ރަސްފަންނު ސަރަހައްދުން ފެށި ރެލީ އިންތިޒާމް ކުރީ ރާއްޖޭގައި ހިންގާ ހަ ޔޫނިއަންއަކުންނެވެ. އެ ރެލީ ލީޑްކުރީ މޯލްޑިވްސް ޓްރޭޑް ޔޫނިއަން ކޮންގްރެސް އިންނެވެ.
ގާތްގަނޑަކަށް ދޮޅުގަޑިއިރަށް ކުރިއަށް ދިޔަ ރެލީގެ ބައިވެރިން މުޅިންހެން ފާޅުކުރި މަސައްކަތުގެ މާހައުލުގައި ކުރިމަތިވާ ގޮންޖެހުންތަކެވެ. އެ މައްސަލަތަކަށް ގެންނަން ބޭނުންވާ ހައްލުވެސް އެ މީހުން ދިޔައީ ކިޔައިދެމުންނެވެ.
ހިނގާލުމުގެ ބައިވެރިން ތިބި އެމީހުންގެ ޝުއޫރުތައް ލިޔެފައިވާ ބެނާތަކާއި ޕޯސްޓަރުތައް ހިފަހައްޓައިގެންނެވެ. މަސައްކަތްތެރިންގެ ހުރި ކަންބޮޑުވުންތަކަށް ކަމާއި ބެހޭ ފަރާތްތަކުން ހައްލު ހޯދައިދޭން ހަރު އަޑުން ގޮވާލިއެވެ.
https://twitter.com/mtucMV/status/1785637990632763892
ޔޫނިއަންތަކުން ފާޅުކުރި ކަންބޮޑުވުންތަކާއި، ގެންނަން ބޭނުންވާ ހައްލު:
- ރިސޯޓުތަކުގައި މަސައްކަތްކުރާ ދިވެހިންގެ އަދަދު 50 އިންސައްތާގައި ހިފެހެއްޓުން. މަސައްކަތްކުރާ ބޭރު މީހުންގެ އަދަދު މަދުކޮށް ދިވެހިންނަށް ވަޒީފާގެ ފުރުސަތު ހޯދައި ދިނުން
- މަސައްކަތްތެރިންނަށް ކޮންމެ ހަފްތާއެކު ދެ ދުވަސް އޮފް ދުވަހުގެ ގޮތުގައި ކަނޑައެޅުން
- މިނިމަމް ވޭޖްގައި ބިދޭސީން ހިމެނުން
- ރިސޯޓުތަކުގައި ވަޒީފާ އަދާކުރާ މީހުންނަށް ތުނބުޅި ބެހެއްޓޭނެ ގޮތް ހެދުން
- ވަޒީފާތަކަށް ބިދޭސީން ރާއްޖެއަށް އެތެރެކުރުން މަދުކުރުން
- މަސައްކަތްކުރާ ވަގުތު 6 ގަޑިއިރަށް ބަދަލުކުރަން
- މަސައްކަތްތެރިންނަށް މެދުގައި އޮންނަ ތަފާތުކުރުން ނައްތާލުން
- މަސައްކަތުގެ މާހައުލުގެ ސަލާމަތާއި ރައްކާތެރިކަން ކަށަވަރުކުރުން / ސަޕޯޓް ސްޓާފުންގެ މުސަރާ ބޮޑުކުރުން
- ސިއްހީ ދާއިރާގެ އޯޓީ ގެޕް އުވާލަން
- ޓީޗަރުންނަށް އޯވާ ލޯޑްކުރުން މަދުކުރުން






ކޮމެންޓް
މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.