އިތުރު ވަސީލަތްތަކާއި އެކު ކުޑަގިރި ތަރައްގީކުރަނީ
ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) ގެ ބެލުމުގެ ދަށުގައި އޮންނަ ކުޑަގިރި, މިހާރަށްވުރެ ފުރިހަމަ ވަސީލަތްތަކާއި އެކު ތަރައްގީކުރުމުގެ މަސައްކަތް ކުރަމުން އަންނަ ކަމަށް އެޗްޑީސީގެ މެނޭޖިންގ ޑިރެކްޓަރ ފަޒުލް ރަޝީދު ވިދާޅުވެއްޖެ އެވެ.
އެކްސްގައި ކުރެއްވި ޕޯސްޓެއްގައި ފަޒުލް ވިދާޅުވީ އެ ކޯޕަރޭޝަނުން މިހާރު އަންނަނީ ކުޑަގިރި ތަރައްގީކުރުމުގެ މަސައްކަތް ކުރަމުން ކަމަށެވެ.
ކުރިއަށް އޮތްތަނުގައި ވަރަށް އަވަހަށް ރައްޔިތުންނަށް ވަރަށް ފުރިހަމަ ހިދުމަތްތަކާއި އެކުގައި ކުޑަގިރި ލިބިގެން ދާނެ ކަމަށްވެސް ފަޒުލްގެ ޕޯސްޓުގައި ވަނީ ވިދާޅުވެފަ އެވެ.
މާލެ ސަރަހައްދުގައި ދިރިއުޅޭ ރައްޔިތުން ޕިކްނިކް ދިއުމަށް ތަރައްގީކުރި ކުޑަގިރި ހުޅުވާފައިވަނީ މިދިޔަ އަހަރުގެ ކުރީކޮޅުގަ އެވެ.
މާލެ ސަރަހައްދުގައި ދިރިއުޅޭ މީހުން ޕިކްނިކް ދާނެ ރަށެއް ހޯދައިދިނުމަކީ ކުރީގެ ރައީސް އިބްރާހިމް މުހައްމަދު ސޯލިހުގެ ވައުދުފުޅެ ކެވެ. ތިލަފުށި ކައިރީގައި އޮތް ފަޅެއް ހިއްކުމަށްފަހު އެތަން ހުޅުވުނީ ރައީސް ޞާލިހުގެ ދައުރުގެ ފަހު ކޮޅެވެ.
މިހާރުގެ ސަރުކާރުން އަންނަނީ ކުޑަގިރިއަށް ހިދުމަތްތައް އިތުރުކޮށް ވަސީލަތްތައް މަދުކަމާއި ހުރި ދަތިތަކާގުޅިގެން ލިބެމުންދާ ޝަކުވާތަކަށް ޙައްލެއް ހޯދުމުގެ ގޮތުން މިހާރަށްވުރެ ފުރިހަމައަށް ކުޑަގިރި ތަރައްގީ ކުރުމުގެ މަސައްކަތް ކުރަމުންނެވެ.
