މާލޭގެ މަގުތަކަށް ކުނި އަޅައިގެން 190 އަށް ވުރެ ގިނަ މީހުން ޖޫރިމަނާކޮށްފި
މާލޭ މަގުތަކަށް ކުނި އަޅައިގެން މި އަހަރުގެ މިހާތަނަށް 190 އަށް ވުރެ ގިނަ މީހުން ސިޓީ ކައުންސިލުން ޖޫރިމަނާކޮށްފި އެވެ.
މާލެ ސިޓީ ކައުންސިލުގެ މީޑިއާ އޮފިޝަލް އާމިނަތު ޝަތުފާ ''ދެން'' އަށް މިއަދު ވިދާޅުވީ، މަގުތަކަށް ކުނި އަޅައިގެން ޖޫރިމަނާކުރި މީހުންގެ ތެރެއިން ގިނައީ ބިދޭސީންގެ ކަމަށެވެ.
"މަގުމައްޗަށް ކުނިއަޅައިގެން ޖޫރިމަނާކުރި 80 ޕަސެންޓް މީހުންނަކީ ބިދޭސީން'' ޝަތުފާ ވިދާޅުވިއެވެ. އެކަމަކު ސީދާ އަދަދެއްް ހިއްސައެއް ނުކުރެ އެވެ.
މާލެ ތެރެ ރީތިކޮށް ބޭއްވުމަށްޓަކައި ކައުންސިލުން ކުރަމުން އަންނަ މަސައްކަތުގެ ތެރެއިން މި އަހަރު ފެބްރުއަރީ މަހުން ފެށިގެން ސީސީޓީވީގެ އެހީގައި ކުނިއަޅާ މީހުން ހޯދައި ޖޫރިމަނާކުރަން ވަނީ ފަށައިފަ އެވެ. މަގުމަތީގެ ޕޭވްމަންޓު ގައި މުދާ ބަހައްޓައިގެން ވިއްކާތީ އެ ފަރާތްތައް ހުއްޓުވާ ޖޫރިމަނާވެސް ދަނީ ކުރަމުންނެވެ. ގަވާއިދާ ހިލާފަށް ކުނިއަޅާ މީހުން ޖޫރިމަނާ ކުރަނީ 500 ރުފިޔާއިންނެވެ.
މަގުމަތީގައި ކުނި ބަހައްޓަމުންދާ މީހުން ފާހަގަކުރެވޭނެމަ އެ މައުލޫމާތު 9341144 އަށް އެކަން ހިއްސާ ކުރުމަށް ސިޓީ ކައުންސިލުން އެދެ އެވެ.
އަދި މާލޭގެ ބަނދަރުތައް ޗެކުކޮށް ހުއްދަ ނުނަގާ، ފަޅުގައި އަޅާފައި ހުރި އުޅަނދުތަކުގައި ސްޓިކާ ޖެހުމުގެ މަސައްކަތްވެސް ސިޓީ ކައުންސިލުން އެބަކުރެއެވެ. ދިޔަދޮވި އަދި އޭސީތަކުން މަގުމައްޗަށް ފެންފައިބާ މައްސަލަ ހައްލުކުރުމުށް ކައުންސިލުން ފިޔަވަޅުތަކެއް އަޅަން ވަނީ ފަށައިފަ އެވެ.
ޝަތުފާ ވިދާޅުވީ ފެން ފޭބުމުގެ މައްސަލަ ދިމާވާ އިމާރާތުގެ ވެރިންނަށް އެކަން ހައްލުކޮށްދޭން އެދި ނޯޓިސް ފޮނުވަމުންދާ ކަމަށެވެ. އެގޮތުން މިހާތަނަށް 30 ފަރާތަކަށް ސިޓީ ކައުންސިލުން ނޯޓިސް ފޮނުވާފައިވާ ކަމަށް ވިދާޅުވި އެވެ. ފެންފައިބާ މައްސަލަ ހައްލުކުރަން ހަފްތާއެއްގެ މުއްދަތު ދިނުމަށް ފަހު ހައްލުނުވާނަމަ އެ ފަރާތްތައް ޖޫރިމަނާކުރާނެ ކަމަށް ޝަތުފާ ވިދާޅުވި އެވެ.
