ނޭޕާލް މީހާ ރަހީނުކުރި މައްސަލާގައި އިތުރު މީހަކު 15 ދުވަހަށް ބަންދުކޮށްފި
ގެސްޓް ހައުސްއެއްގައި ނޭޕާލް މީހަކު ބަންދުކޮށްގެން ގެންގުޅުނު މައްސަލާގައި ތުހުމަތުކުރާ އިތުރު މީހަކު 15 ދުވަހަށް ބަންދުކޮށްފި އެވެ.
މި މައްސަލާގައި ބަންގްލަދޭޝް ދެ ފިރިހެނަކަށް ތުހުމަތުކޮށްފައިވެ އެވެ. އެއިން އެކަކުގެ ބަންދަށް 10 ދުވަހުގެ ބަންދެއް ކޯޓުން މިދިޔަ ހޮނިހިރު ދުވަހު ޖެހި އެވެ. އަނެކަކު ދޫކޮށްލީ އެވެ.
ފުލުހުން މިރޭ ބުނީ އެ މައްސަލާގައި ތުހުމަތު ކުރެވޭ އިތުރު މީހަކު ކޯޓު އަމުރެއްގެ ދަށުން ހައްޔަރުކޮށް މިއަދު ކޯޓަށް ހާޒިރު ކުރުމުން ބަންދަށް 15 ދުވަސް ޖަހާފައިވާ ކަމަށެވެ. - އެއީ ވެސް ބަންގްލަދޭޝް ފިރިހެނެކެވެ.
މާލޭގެ މާފަންނުގައި ހުރި ގެސްޓް ހައުސެއްގައި ނޭޕާލް މީހަކު ބަންދުކޮށްގެން ގެންގުޅެނިކޮށް ފުލުހުން އެ މީހަކު ހޯދައި ސަލާމަތް ކުރީ މިދިޔަ ހުކުރު ދުވަހުގެ ރެ އެވެ.
އެ މީހާ ރަހީނުކޮށްގެން ގެންގުޅުނީ ކީއްވެގެން ކަމެއް އަދި ނޭނގެ އެވެ. ފުލުހުން ދަނީ މައްސަލަ އިތުރަށް ތަހުގީގު ކުރަމުންނެވެ.
Ads by STO
