ދެން އޮންލައިންއަށް ނޫސްވެރިން ހޯދަނީ
ދެން އޮންލައިންގައި މަސައްކަތް ކުރާނެ ނޫސްވެރިން ހޯދަން އިއުލާން ކޮށްފި އެވެ.
މި ނޫހުން އިއްޔެ ކުރި އިއުލާނެއްގައި ވަނީ މާލޭގައި މަސައްކަތް ކުރާނެ ތިން ނޫސްވެރިން ހޯދަން އިއުލާން ކޮށްފަ އެވެ. އެ އިއުލާނުގައި ވާގޮތުން އޯލެވެލް ދިވެހި މާއްދާއިން ފާސްވެފައިވާ ކޮންމެ މީހަކަށް ވަޒީފާއަށް އެދި ސީވީ ފޮނުވޭނެ އެވެ.
އެހެންނަމަވެސް ނޫސްވެރިކަމުގެ ދާއިރާއިން މަތީ ތައުލީމު ހާސިލްކޮށްފައިވާ ފަރާތްތަކަށާއި ދާއިރާގައި މަސައްކަތް ކުރުމުގައި ތަޖުރިބާ ހުރި ފަރާތްތަކަށް އިސްކަން ދޭނެ ކަމަށް ނޫހުން ބުންޏެވެ.
މަސައްކަތުގެ މަސްއޫލިއްޔަތުތަކުގެ ތެރޭގައި ހަބަރު ހޯދައި ދިވެހި ބަހުން ހަބަރު ލިޔުމާއި، ނޫސްވެރިންގެ ބައްދަލުވުންތަކަށް ދިޔުމުގެ އިތުރުން އޯޑިއޯ އަދި ވީޑިއޯ އިންޓަވިއުތައް ކުރިއަށް ގެންދިޔުން ހިމެނެ އެވެ.
މަގާމުގެ ސީދާ މުސާރަ ކަނޑައަޅާނީ ވަޒީފާއަށް އެދި ހުށަހަޅާ ފަރާތުގެ ގާބިލުކަމަށް ބެލުމަށްފަހު ކަމަށް ދެން އޮންލައިން އިން ވަނީ ބުނެފަ އެވެ.
މި ނޫހުން ނަގަނީ އޮފީހަށް ހާޒިރުވެ ފުލް ޓައިމް ވަޒީފާއެއްގެ ގޮތުގައި މަސައްކަތް ކުރާނެ މުވައްޒަފުންތަކެކެވެ.
ވަޒީފާއަށް ޝައުގުވެރިވާ ފަރާތްތަކުން [email protected] އަށް ސީވީ ފޮނުވުމަށް އިއުލާނުގައި އެދިފައިވާއިރު ސީވީ ފޮނުވުމުގެ ސުންގަޑިއަކީ މިމަހުގެ 10 އެއް ވާ ހޯމަ ދުވަހުގެ މެންދުރު ފަހު 3:00 އެވެ.
