މޫސުން ގޯސްވެ އުތުރަށް ވައިޓް އެލާރޓް ނެރެފި
ރާއްޖޭގެ އެކި ހިސާބުތަކަށް ކުރަމުންދާ ވިއްސާރައިގައި މޫސުން ގޯސްވެ ރާއްޖޭގެ އުތުރުގެ ބައެއް ރަށްތަކަށް ވެސް ވައިޓް އެލާރޓް ނެރެފިއެވެ.
އެގޮތުން މޯލްޑިވްސް މީޓްރޮލޮޖިކަލް ސާރވިސް އިން ވަނީ މިރޭގެ 20:20 އިން ދަންވަރު 02:00 އާ ހަމައަށް ހއ. އަތޮޅުން ބ އަތޮޅަށް ވައިޓް އެލާރޓް ނެރެފައެވެ. އަދި އެ އެލާރޓްގައި ބުނެފައި ވަނީ އެ ވަގުތުތަކުގައި އެ ސަރަހައްދުތަކަށް ގަޑިއަކު 22 މޭލާއި 27 މޭލާއި ދެމެދުގެ ބާރުމިނެއްގައި ވައި ޖެހޭނެ ކަމަށެވެ. އަދި މި ސަރަހައްދުގެ ކަނޑުތައްވެސް ގަދަވާނެ ކަމަށް ލަފާކުރެވޭ ކަމުގައި ވެސް ބުނެފައި ވެއެވެ.
ރާއްޖޭގެ ދެކުނާއި މެދުރާއްޖެތެރެއަށް ވެސް 55 މޭލަށް ވައިގަދަވާނެ ކަމަށް ލަފާކޮށް ވަނީ ރީނދޫ އެލާރޓް ނެރެފައެވެ. މި އެލާރޓް ނެރެފައި ވަނީ މިރޭގެ 20:00 އިން ދަންވަރު 12:00 އަށެވެ. އަދި އެ ސަރަހައްދުތަކަށް އެ ވަގުތުގައި ބޯކޮށް ވާރެ ވެހޭނެ ކަމަށް މެޓް އޮފީހުން ބުނެފައި ވެއެވެ. އަދި ގަޑިއަކު 28 މޭލާއި 35 މޭލާ ދެމެދުގެ ބާރު މިނުގައި ވައިޖެހޭނެ ކަމަށް ލަފާ ކޮށްފައި ވާއިރު، ވިލާގަނޑުގައި 55 މޭލަށް ވައިގަދަވާނެ ކަމަށް ވަނީ ލަފާކޮށްފައެވެ.
މިދުވަސްވަރު ރާއްޖޭގެ ކަނޑުތައްވެސް ގަދަވާނެ ކަމަށް ލަފާކުރެވޭ ކަމަށާއި ކަނޑުދަތުރުފަތުރު ކުރައްވާ ފަރާތްތަކުން ސަމާލުވުމަށްވެސް މެޓު އޮފީހުން އިރުޝާދު ދެއެވެ.
